ચૂંટણી / ઊંઝાના વધુ એક નેતાએ કોંગ્રેસને અલવિદા કહેતા રાજકીય ખળભળાટ

મહેસાણા: ઊંઝા વિધાનસભાની પેટાચૂંટણી પહેલા કોંગ્રેસને મોટો ઝટકો લાગ્યો છે. ઊંઝા તાલુકા પંચાયતના પૂર્વ પ્રમુખ ભાજપમાં જોડાયા છે. શાંતાબેન પટેલ ભાજપમાં જોડાયા છે. શાંતાબેન પટેલ ઊંઝા પેટા ચૂંટણીના ઉમેદવારના હાથે ખેસ પહેરીને તેઓ ભાજપમાં જોડાયા હતા. ત્યારે કોંગ્રેસ માટે આ એક મોટો ઝટકો છે. 

ઉલ્લેખનીય છે કે, લોકસભાની તથા પેટાચૂંટણી નજીક આવી રહ્યા છે ત્યારે નેતાઓ દ્વારા પક્ષ પલટો કરવાની ઘટનાઓ પ્રકાશમાં આવતી રહે છે. આવી જ એક ઘટના ઉત્તર ગુજરાતના ઊંઝા ખાતે બનવા પામેલ. 
ઊંઝા તાલુકા પંચાયતના પૂર્વ પ્રમુખ શાંતાબેન પટેલે પક્ષથી નારાજ થઇને આજરોજ ભાજપમાં જોડાઇ જતાં કોંગ્રેસને વધુ એક ફટકો પડ્યો હતો. શાંતાબહેને પેટા ચૂંટણીના ઉમેદવારના હાથે ભાજપનો ખેસ પહેરીને કેસરિયા કર્યા હતા.

થોડા સમય પહેલા આશાબહેન પટેલે આપ્યું છે રાજીનામું
અત્રે ઉલ્લેખનીય છે કે, થોડા સમય પહેલા કોંગ્રેસના ધારાસભ્ય આશાબહેન પટેલ પણ પક્ષથી નારાજ થયાં હતા અને એકાએક કોંગ્રેસમાંથી રાજીનામું ધરી દેતાં ખળભળાટ મચી જવા પામ્યો હતો. ત્યારે આજરોજ વધુ એક મહિલા કોંગ્રેસી નેતાએ પક્ષને અલવિદા કહેતા રાજકારણમાં ગરમાવો પ્રસરી જવા પામ્યો છે.  
 
ઉત્તર ગુજરાતનું રાજકારણ છેલ્લા કેટલાક સમયગાળાથી છે ચર્ચામાં
લોકસભાની ચૂંટણી આંગણે આવીને ઉભી છે ત્યારે ઉત્તર ગુજરાતનું રાજકારણ વધુ ચર્ચામાં છે. એક તરફ કોંગ્રેસના આશાબહેન પટેલે પક્ષને અલવિદા કહીને ભાજપનો ખેસ ધારણ કર્યો છે તો ભાજપના ગઢ ગણતા ઊંઝાના માજી ધારાસભ્ય નારાયણકાકા પણ પક્ષથી અસંતુષ્ઠ હોવાની અટકળો ચાલી હતી. 

નારણ કાકાનો ગઢ છે ઊંઝા
નારણ પટેલ ભાજપમાં બબ્બે વખત મંત્રી રહી ચૂક્યા છે ઉપરાંત એશિયાના સૌથી મોટા માર્કેટયાર્ડ ઊંઝા એપીએમસીના ચેરમેન પણ રહી ચૂક્યા છે.