BIG NEWS / જુનિયર ક્લાર્ક બાદ વધુ એક પરીક્ષા થઈ રદ્દ: અનેક પરીક્ષાર્થીઓમાં ભયંકર આક્રોશ, જાણો વિગત

• અમદાવાદમાં વધુ એક પરીક્ષા થઈ રદ્દ
• ગુજરાત યુનિવર્સિટીમાં CCCની પરીક્ષા પણ થઈ રદ
• પરીક્ષા રદ્દ થતા 500 થી વધુ ઉમેદવારો અટવાયા
• ટેક્નિકલ ખામીનું કારણ આપી પરીક્ષા છેલ્લી ઘડીએ થઈ રદ

ગુજરાત પંચાયત સેવા પસંદગી મંડળ દ્વારા જુનિયર ક્લાર્કની પરીક્ષા મોકૂફ રખાયા બાદ વધુ એક પરીક્ષા રદ કરાતા પરીક્ષાર્થીઓમાં ભારે આક્રોશ જોવા મળી રહ્યો છે. જુનિયર ક્લાર્કની ભરતી પરીક્ષા રદ થયા બાદ હવે અમદાવાદમાં વધુ એક પરીક્ષા રદ્દ થઈ છે. ગુજરાત યુનિવર્સિટીમાં CCCની પરીક્ષા રદ થઈ છે. પરીક્ષા રદ્દ થતા 500થી વધુ ઉમેદવારો અટવાયા છે. ટેક્નિકલ ખામીનું કારણ આપી પરીક્ષા છેલ્લી ઘડીએ રદ થઈ છે.  જેના કારણે પરીક્ષાર્થીઓમાં ભારે આક્રોશ જોવા મળી રહ્યો છે.

ટૂંક સમયમાં જાહેર કરવામાં આવશે તારીખ
ગુજરાત યુનિવર્સિટી દ્વારા આ મામલે ટેક્નિકલ ખામીનું કારણ જણાવવામાં આવ્યું છે. પરીક્ષાને છેલ્લા ઘડીએ રદ કરાતા પરીક્ષાર્થીઓમાં નિરાશા જોવા મળી રહી છે. આજે યોજાવનારી CCCની પરીક્ષા પાંચ ફેબ્રુઆરીના રોજ યોજાશે. મળતી માહિતી મુજબ ગુજરાત યુનિવર્સિટીમાં આવતી ઇલેક્ટ્રિસિટીની અંદર શોર્ટ સર્કિટ થતા સમગ્ર યુનિવર્સિટીની ઇલેક્ટ્રિસિટી બંધ થઈ ગઈ છે. જેના કારણે કોમ્પ્યુટર ચાલી શકે તેમ નથી માટે આજે યોજાનારી પરીક્ષા મોકૂફ રાખવામાં આવી છે.

VTV પર સૌથી મોટો ખુલાસો
ગુજરાતમાં જુનિયર ક્લાર્કની પરીક્ષા મોકૂફ કરવાને લઈને VTV પર સૌથી મોટો ખુલાસો. વડોદરામાં સમગ્ર કાંડનું એપીસેન્ટર હતું. વડોદરાના પ્રમુખ કોમ્પ્લેકસમાં આવેલ સ્ટેક વાઇસ ટેકનોલોજી નામક ક્લાસીસમાં પેપર વિદ્યાર્થીઓને વહેંચવામાં આવ્યું હતું. અડધી રાતે જ ગુજરાત ATS દ્વારા ક્લાસીસ સંચાલક સહિત 15 લોકોની અટકાયત કરવામાં આવી હતી. સીલ કરેલા કોચિંગ સેન્ટર પર અનેક પરીક્ષાર્થીઓના આધારકાર્ડ, પાનકાર્ડ અને ચૂંટણીકાર્ડ મળી આવ્યા છે. કોચિંગ સેન્ટર પરથી અનેક જૂના પ્રશ્નપત્રો પણ મળી આવ્યા છે. 

ઠેર ઠેર ચક્કાજામના દ્રશ્યો 
સૌરાષ્ટ્ર અને ઉત્તર ગુજરાતનાં અનેક બસ સ્ટેન્ડ પર પોલીસ કાફલો ખડકી દેવામાં આવ્યો છે. મોટી સંખ્યામાં વિદ્યાર્થીઓ દ્વારા ચક્કાજામ કરવાની ઘટનાઓ પણ સામે આવી રહી છે. ST બસ સ્ટેન્ડ પર જ કેટલાક ઉમેદવારોની આંખોમાં આંસુ આવી ગયા હોય તેવી ઘટના પણ સામે આવી છે. ભાવનગર, પાલીતાણા સહિતના જિલ્લાઓમાંથી પરીક્ષા આપવા અમદાવાદ પહોંચેલા ઉમેદવારોએ VTV સાથેની વાતચીતમાં સરકાર વિરુદ્ધ આક્રોશ વ્યક્ત કર્યો. ઉમેદવારોએ કહ્યું, 'સાહેબ, અમે કાલ સાંજના ઘરેથી નીકળ્યા છીએ. રાત્રે બે વાગ્યે અમે અહીં પહોંચી ગયા હતા. અમે આખી રાતના ઠંડીમાં ઉજાગરા કરીને પેપર આપવા માટે આવ્યા છીએ. અહીં પહોંચ્યા બાદ વહેલી સવારે અમને સમાચાર મળ્યા કે પેપર લીક થવાના કારણે પરીક્ષા રદ કરવામાં આવી છે.'

અમારા વાલીઓ અમને કાળી મજૂરી કરીને ભણાવે છેઃ પરીક્ષાર્થીઓ
VTV સમક્ષ પોતાની વ્યથા વ્યક્ત કરતા ઉમેદવારો ભાવુક થઈ ગયા. ઉમેદવારોએ કહ્યું કે, 'અમે પરીક્ષા માટે બે વર્ષથી તૈયારી કરી રહ્યા હતા. અમે છેક પાલીતાણા અને ભાવનગરના ગામડામાંથી અહીં પરીક્ષા આપવા માટે આવ્યા છીએ. અમારા વાલીઓ અમને કાળી મજૂરી કરીને ભણાવે છે. પૈસાવાળી પાર્ટી છે એ પેપર ફોડી નાખે છે. સાહેબ ભરતી નહીં આવે તો ચાલશે પણ પેપર ફૂટવા ન જોઈએ.'