રોગચાળો / સુરતમાં સ્વાઈન ફ્લૂથી વધુ એકનું મૃત્યુ, નવા 11 કેસ નોંધાતા તંત્ર દોડતું થયું, જાણો અત્યાર સુધીમાં કુલ કેટલાં મોત

• સુરતમાં સ્વાઇન ફ્લૂથી વધુ એકનું મૃત્યુ નિપજ્યું
• શહેરમાં સ્વાઈન ફ્લૂના નવા 11 કેસ નોંધાયા
• અત્યાર સુધીમાં સ્વાઈન ફ્લૂથી કુલ ચારના મોત

હાલ ચોમાસાની સિઝન ચાલી રહી છે ત્યારે રાજ્યભર (Gujarat) માં ભારે રોગચાળો વકર્યો છે. જેમાં સ્વાઇન ફ્લૂથી, શરદી-તાવ અને ઉધરસના અનેક કેસો સામે આવી રહ્યાં છે. ત્યારે સુરતમાં સ્વાઇન ફ્લૂથી વધુ એકનું મૃત્યુ નિપજ્યું છે. શહેરના કોઝવે રોડ વિસ્તારના 59 વર્ષીય વૃદ્ધાનું સ્વાઇન ફ્લૂના કારણે મૃત્યુ થયું છે. તમને જણાવી દઇએ કે, શહેરમાં સ્વાઈન ફ્લૂના નવા 11 કેસ નોંધાયા છે. જ્યારે અત્યાર સુધીમાં સ્વાઈન ફ્લુથી કુલ ચાર લોકોના મોત નિપજ્યાં છે. શહેરમાં વધતા જતા સ્વાઈન ફ્લૂના કેસથી મનપાનું આરોગ્ય વિભાગ ચિંતામાં મૂકાયું છે.

બીજી બાજુ રાજકોટમાં પણ રોગચાળો વકર્યો છે. ત્યારે રાજકોટ સહિત સમગ્ર સૌરાષ્ટ્રમાં સ્વાઇન ફ્લૂનો ફુંફાડો જોવા મળી રહ્યો છે. કારણ કે, રાજકોટમાં પણ એક દિવસ અગાઉ સ્વાઇન ફ્લૂથી 1 વ્યક્તિનું મૃત્યુ થયું હતું. વરસાદી ઋતુ અને મિશ્ર ઋતુના કારણે વાયરલ ઇન્ફેક્શનનું પ્રમાણ વધી રહ્યું છે.

સ્વાઇન ફ્લૂના લક્ષણોની જો વાત કરીએ તો તાવ આવવો, ગળું બળવું, માથું દુઃખવું જેવા વગેરે લક્ષણો છે. તેમજ છીંક અને ઉધરસના કારણે પણ સ્વાઇન ફ્લૂ ફેલાઈ શકે છે. આ મુદ્દે ડૉ. પંકજ રાઠોડનું કહેવું છે કે, તહેવારના દિવસોમાં બહારનું ખાવાનું ટાળવું. ઠંડા પીણા અને ગરમ પાણી પીવાનું રાખવું જોઈએ. શહેરમાં સ્વાઇન ફ્લૂથી 1નું મોત નિપજ્યું છે. સાથે સ્વાઇન ફ્લૂના કેસમાં પણ વધારો થયો છે.

જાણો સ્વાઈન ફ્લૂ રોગ શું છે ? 

સ્વાઈન ફ્લૂ એ ખૂબ જ ઝડપથી ફેલાતો ચેપી રોગ છે. અમે તેને H1N1 તરીકે પણ જાણીએ છીએ. તે ડુક્કર દ્વારા ફેલાતો ખતરનાક ચેપી રોગ છે. આ ચેપગ્રસ્ત પ્રાણી અથવા માણસના સંપર્કમાં આવવા પર, H1N1 વાયરસ માનવ શરીરમાં હાજર માનવ ફ્લૂના તાણના સંપર્કમાં આવે છે. જેના કારણે આ રોગ પ્રાણીઓ દ્વારા માણસોમાં પણ ફેલાય છે. જો રોગનું સ્તર વધુ ખરાબ થાય છે તો તે લોકોનો જીવ પણ લઈ લે છે.

જાણો સ્વાઇન ફ્લૂના લક્ષણો શું છે?

આરોગ્ય વિભાગના જણાવ્યા મુજબ સ્વાઈન ફ્લૂ H1N1 વાયરસના ચેપને કારણે ફેલાય છે. આ રોગમાં તાવ, શરદી, છીંક આવવાની સમસ્યા, ગળામાં દુખાવો, થાક, શ્વાસ લેવામાં તકલીફ સહિતની સમસ્યા જાગે છે. જો ચેપ ગંભીર હોય તો ન્યુમોનિયા અને છાતીમાં દુખાવો થઈ શકે છે. સ્વાઈન ફ્લૂના લક્ષણો દેખાય તે પછી 48 કલાકની અંદર દવાઓ લેવાની સલાહ આપવામાં આવે છે. જ્યારે લક્ષણો દેખાય કે તરત જ સારવાર લેવી જોઈએ અને યોગ્ય સમયે દવા લેવી જોઈએ. આ સિવાય સ્વાઈન ફ્લૂથી બચવા માટે આહાર અને જીવનશૈલીનું ધ્યાન રાખવું જોઈએ. ચેપના કિસ્સામાં આરામ કરો અને શરીરની રોગપ્રતિકારક શક્તિમાં વધારો કરે તેવો ખોરાક ખાઓ. આ ચેપમાં, ડૉક્ટરની સલાહ લીધા વિના કોઈ દવા ન લેવી જોઈએ.