આકાશી આફત / માવઠાએ તો ભારે કરી! હજુય ગુજરાત પરથી સંકટ ટળ્યું નથી, જુઓ શું કહે છે હવામાન વિભાગની આગાહી

• આજે રાજ્યના કેટલાક વિસ્તારોમાં માવઠાની શક્યતા
• ભાવનગર, જામનગર, કચ્છમાં માવઠાની આગાહી
• રવિવારથી માવઠાની સંભાવના નહિવત

દક્ષિણ-પશ્ચિમ રાજસ્થાનમાં સર્જાયેલા સાયક્લોનિક સર્ક્યુલેશનના પગલે રાજ્યમાં ચોમાસા જેવો માહોલ સર્જાયો છે. ખેડૂતો માવઠાનો માર સહન કરી રહ્યા છે. જોકે, હજુ પણ માવઠાનું સંકટ પૂરેપૂરું ટળ્યું નથી, કેમ કે સ્થાનિક હવામાન વિભાગની આગાહી મુજબ આજે પણ ગુજરાતના કેટલાક જિલ્લાના છૂટાછવાયા વિસ્તારોમાં વરસાદ પડી શકે છે. 

આજે અહીં ખાબકી શકે છે વરસાદ
હવામાન વિભાગ દ્વારા આજે ઉત્તર ગુજરાત, સૌરાષ્ટ્રમાં કમોસમી વરસાદની આગાહી કરવામાં આવી છે. આજે બનાસકાંઠા, સાબરકાંઠા, ભાવનગર, જામનગર, અમરેલી, કચ્છ અને દ્વારકામાં વરસાદ વરસી શકે છે. તો અમદાવાદમાં પણ આજે ભારે પવન ફૂંકાશે તેવું હવામાન વિભાગે કહ્યું છે.  આ વચ્ચે એક રાહતના સમાચાર પણ છે.
 
રવિવારથી ઊંચકાઈ શકે છે તાપમાનનો પારો
આવતીકાલથી એટલે કે રવિવારથી માવઠાની સંભાવના નહિવત્ છે. આગામી રવિવારથી તાપમાનમાં પણ વધારો થઈ શકે છે. આવતીકાલથી રાજ્યમાં વરસાદનું જોર ઘટી શકે છે અને તાપમાનનો પારો ઊંચકાઈ તેવું જણાઈ રહ્યું છે. ગઈકાલે અમદાવાદ શહેરમાં 22.2 ડિગ્રી સેલ્સિયસ લધુત્તમ તાપમાન નોંધાયું હતું, જે સામાન્ય કરતા એક ડિગ્રી વધુ હતું, રવિવારથી અમદાવાદનું મહત્તમ તાપમાન વધીને 39 ડિગ્રી સુધી પહોંચે તેવી સંભાવના છે.

ખેડૂતોની હાલત કફોડી
આપને જણાવી દઈએ કે, ગુજરાતમાં સાઈક્લોનિક સર્ક્યુલેશનના પગલે ફાગણ મહિનામાં વરસાદી માહોલ છવાયો છે. માવઠાના કારણે શાકભાજીના ભાવ આસમાને પહોંચ્યા છે. મરચાની સિઝન ચાલતી હોઈ મરચા સહિત અન્ય મસાલાના ભાવ પણ ગૃહીણીઓને દઝાડી રહ્યા છે. ગુજરાતમાં છેલ્લા કેટલાક દિવસથી કમોસમી વરસાદ પડવાથી ખેડૂતોની મુશ્કેલીમાં વધારો થયો છે. માવઠાથી ઘઉં, કેરી, તરબૂચ સહિતના પાકને વ્યાપક નુકસાન થયું છે. આ કમોસમી વરસાદથી કેરીના પાકને પણ ખાસ્સું એવું નુકસાન થયું છે. આ બધા કુદરતી મારથી મોંઘીદાટ થયેલી ખેતીથી પરેશાન ખેડૂત છેક ગળા સુધી આવી ગયો છે અને રાહત પેકેજની રાહ જોઈ રહ્યો છે.