હત્યા / અમદાવાદમાં ખુલ્લેઆમ વિધવા માતા સામે યુવાનને ચપ્પાના ઘા ઝીંકી રહેંસી નાંખ્યો

• વિધવા માનો સહારો હતો પારસ
• માતાની સામે જ ચાર નરાધમોએ પુત્રને રહેંસી નાંખ્યો
• એક મહિના પહેલા થઈ હતી પિતાની હત્યા

મેઘાણીનગર વિસ્તારમાં આવેલા ભાર્ગવ રોડ પર રહેતા કમલેશ કૈલાસકુમાર કથિરિયાએ અજય બારોટ, રવિ પટેલ, સંદીપ વિક્રમ અને દીપક ગુપ્તા વિરુદ્ધ હત્યાની ફરિયાદ કરી છે. કમલેશના ભાઇ પારસ કથિરિયાની ગઇ કાલે હત્યા કરવામાં આવી છે. પારસના પિતરાઇભાઇની ચાર પાંચ મહિનાં પહેલાં અજય, રવિ, સંદીપ અને દીપક સાથે કોઇ કારણસર માથાકૂટ થઇ હતી. આ ઘટનામાં ચારેય શખ્સોએ પારસને જોઇ લેવાની ધમકી આપી હતી. 

એક મહિના પહેલા જ થયું હતુ મોત

એક મહિના પહેલાં પારસના પિતા કૈલાસકુમારનું મોત થયું હતું. જેમાં ગઇ કાલે અસ્થિ વિસર્જનનો સામાન લેવા માટે પારસ બહાર ગયો હતો. પારસની હત્યા કરવા માટે ચારેય જણાએ પ્લાન બનાવી દીધો હતો અને ખંજર લઇને તેની રાહ જોઇ રહ્યા હતા. અસ્થિ વિસર્જનનો સામાન લઇને પારસ ઘરે આવ્યો તે સમયે ચારેય જણા તેના ઘરે આવી ગયા હતા. 

માતાની સામે ચાર જણે પુત્રને રહેંસી નાંખ્યો 

પારસની માતાની સામે ચારેય જણાએ તેને ઉપરાછાપરી ખંજરના ઘા ઝીંકી દીધા હતા. જેમાં તેનું ઘટના સ્થળે મોત થયું હતું. ઘટનાની જાણ પોલીસને થતાં તે તાત્કાલીક ઘટના સ્થળે દોડી આવી હતી અને પારસની લાશને પોસ્ટમોર્ટમ માટે હોસ્પિટલમાં મોકલી આપી હતી. પોલીસે ચારેય યુવકો વિરુદ્ધમાં હત્યાનો ગુનો દાખલ કરીને તપાસ શરૂ કરી છે. સ્થાનિક સૂત્રોના જણાવ્યા અનુસાર મરનાર યુવક દારૂની ખેપ મારતો હોવાનું સામે આવ્યું છે. જોકે પોલીસે હજુ સુધી આ વાતની પુષ્ટિ કરી નથી.