હવે બહુ થયુ ! / વડોદરામાં રખડતા ઢોરોનો ત્રાસ યથાવત ! ગાયે વેપારીને હવામાં ફંગોળ્યો, મનપાની કામગીરી સામે ઉઠ્યા સવાલ

• વડોદરામાં રખડતા ઢોરનો ત્રાસ
• શાકભાજી માર્કેટમાં કર્યો હુમલો
• એક યુવકને હવામાં ઉછાળ્યો

રાજ્યમાં છેલ્લા ઘણા સમયથી રખડતા ઢોરોનો ત્રાસ વધી રહ્યો છે. રોજબરોજ કોઇને કોઇ ઘટના સામે આવી જ રહી છે.  રસ્તા વચ્ચે રખડતા ઢોરોને કારણે ઘણા નિર્દોષોએ જીવ ગુમાવવાનો વારો આવ્યો છે. ત્યારે વડોદરામાં ગાયે શિંગડુ મારતા એક વિદ્યાર્થીએ આંખ ગુમાવી હતી આ મામલે હજી સુધી પોલીસ ગાયના માલિકને શોધવા ફાંફા મારી રહી છે. ત્યાં વધુ એક કિસ્સો સામે આવ્યો. 

ગાયે કરેલા હુમલાની ઘટના CCTVમાં કેદ

વડોદરા શહેરમાં રખડતા પશુનો ત્રાસ યથાવત જોવા મળ્યો છે. વધુ એકવાર ગાયે વેપારીને હવામાં ફંગોળી દીધો. નવાયાર્ડ વિસ્તાર પાસે આ બનાવ બન્યો. હવામાં ફંગોળતા યુવકને પગમાં ઇજા થઇ છે. જો કે આ સમગ્ર ઘટનાના સીસીટીવી સામે આવ્યા છે. જેમાં જોઇ શકાય છે કે ટેમ્પા પાસે વેપારીથી આગળ જઇ રહ્યો છે તેવામાં જ એક ગાય ત્યાંથી ભાગતી રોડ પર જઇ રહી છે અને વેપારીને અડફેટે લેતા વેપારી ઇજાગ્રસ્ત થયો. 

ગાયે શિંગડું મારતા આંખ ફૂટી ગઇ હતી

વડોદરાના વાઘોડિયા વિસ્તારમાં એક વિદ્યાર્થીને ગાયે અડફેટે લેતાં ગંભીર અકસ્માત સર્જાયો હતો. MSUમાં અભ્યાસ કરતો એક વિદ્યાર્થી જ્યારે ગોવર્ધન ટાઉનશિપ પાસેથી પસાર થઇ રહ્યો હતો ત્યારે અચાનક એક ગાયે વિદ્યાર્થીને અડફેટમાં લેતા તે એક્ટિવા પરથી નીચે પડ્યો હતો.  આ ગંભીર અકસ્માતમાં ડિવાઈડર કૂદીને ગાયે એક્ટિવા સાથે વિદ્યાર્થીને પછાડ્યો હતો. અકસ્માતમાં વિદ્યાર્થીને ગાયનું શિંગડું આંખમાં વાગતા વિદ્યાર્થીની આંખ ફૂટી ગઈ હતી.  આ સમગ્ર ઘટના CCTVમાં કેદ થઇ ગઇ હતી. જો કે આ મામલે પોલીસ હજી ગાય કે તેના માલિકને શોધી શકી નથી. 

સળગતા સવાલો

• વડોદરા મહાનગરપાલિકા શું કામ કરી રહી છે ? 
• ઢોર પકડવા જતા લોકો કરી રહ્યા છે શું ?
• જાહેર બજારોમાં ઢોર ફરે તો ઢોર પાર્ટીને કેમ દેખાતા નથી?
• ઢોરના વારંવાર હુમલા છતા તંત્રની કામગીરી શું?
• વડોદરામાં વારંવાર બનતા બનાવોને કેવી રીતે અટકાવશો?
• કાયદાનું પાલન ચુસ્તપણે ક્યારે કરાવશે મનપા?