અભિનેતા અક્ષય કુમાર અને સુનિલ શેટ્ટીની ફિલ્મ 'ફિર હેરાફેરી' તો તમે જોઈ જ હશે અને કદાચ તમને યાદ પણ હશે કે ફિલ્મમાં પૈસા ડબલ કરવાના નામે એક કંપની કેવી રીતે લોકો પાસેથી પૈસા પડાવે છે અને ત્યાંથી રફુચક્કર થઈ જાય છે.
કંઈક આવો જ કિસ્સો મહારાષ્ટ્રના ઠાણેમાં સામે આવ્યો છે જેમાં એક વ્યક્તિએ કંપનીની આડમાં ફરજી સ્કીમ મારફતે 500 કરોડની છેતરપિંડી કરી છે. હમણા આ મામલે મહારાષ્ટ્ર આર્થિક ગુના શાખા તપાસ કરી રહી છે.
હકીકતમાં મુંબઈની એક કંપની અથર્વ ફોર યૂ ઈન્ફ્રા એન્ડ એગ્રો પ્રાઈવેટ લિમિટેડ લોકોને તેમના પૈસા પાંચ વર્ષમાં ડબલ સાત વર્ષમાં ત્રણ ગુણા અને દસ વર્ષમાં ચાર ગણા કરવાના દાવા કરીને છેતરપિંડી કરતી હતી.
પૈસા ડબલ કરવાની લાલચમાં લોકો જલ્દી તેમની વાતોમાં ફસાઈ જતા હતા અને પોતાની તમામ જમા કરેલી રકમ ખોઈ બેસતા હતા. આ પ્રકારે કંપનીએ ત્રણ લાખથી વધારે લોકો સાથે છેતરપિંડી કરીને 500 કરોડ રૂપિયાથી વધારે એકઠા કરી લીધા.
આ મામલે ગયા મહિને પોલીસે કંપનીના માલિક આરોપી ગણેશ હજારેની ધરપકડ કરી છે. પોલીસે કંપનીમાં રોકાણ કરનારા કેટલાક રોકાણકારો સાથે મળીને એક યોજના બનાવી હતી અને ગણેશ હજારેને મીટિંગના બહાને ઠાણે બોલાવ્યો હતો. અને આ પ્રકારે આ આરોપીની ફિલ્મી ઢબે ધરપકડ કરી લીધી છે.