મહામારી / કોરોના વાયરસનો ભારત પર પ્રચંડ પ્રહાર : જૂના તમામ રેકોર્ડ તૂટયા, એક લાખથી વધારે કેસ

• ભારતમાં કોરોના વાયરસની બીજી લહેર બની બેકાબૂ 
• પહેલીવાર એક લાખથી વધારે કેસ સામે આવ્યા 
• અમેરિકા બાદ ભારત બીજો દેશ જ્યાં એક લાખથી વધારે કેસ આવ્યા હોય 

કોરોના એક લાખ પાર 

કોરોના વાયરસની બીજી લહેર ભારતમાં વધુને વધુ પ્રચંડ થઈ રહી છે. પ્રતિદિવસ સામે આવી રહેલા આંકડાઓમાં સતત ઉછાળો જોવા મળી રહ્યો છે ત્યારે કોરોના વાયરસે આજે બધા જ રેકોર્ડ તોડી નાંખ્યા છે. રવિવારે દેશમાં કોરોના કેસના આંકડા એક લાખને પાર થઈ ગયા છે. 

કોરોના કેસ અપડેટ 

ભારતમાં સ્વાસ્થ્ય મંત્રાલય દ્વારા જાહેર કરવામાં આવેલા આંકડાઓ અનુસાર એક દિવસમાં 1,03,558 કોરોના વાયરસના કેસ સામે આવ્યા છે જ્યારે 52,847 દર્દીઓ સાજા થયા છે. 24 કલાકમાં 478 લોકોના મોત પણ થયા છે. 

અમેરિકા બાદ બીજો એવો દેશ જ્યાં એક લાખથી વધારે કેસ આવ્યા હોય 

પહેલીવાર દેશમાં આટલા બધા કેસ સામે આવી રહ્યા છે ત્યારે ભારત હવે દુનિયાનો બીજો એવો દેશ બની ગયો છે જ્યાં એક દિવસમાં એક લાખથી વધારે કેસ સામે આવ્યા હોય. એક લાખ કેસમાંથી 57 હજાર કોરોના કેસ માત્ર મહારાષ્ટ્રમાંથી જ સામે આવ્યા છે. મહારાષ્ટ્રમાં અત્યાર સુધી કુલ 30,10,597 કોરોના કેસ નોંધાઈ ગયા છે જ્યારે 55,878 લોકોની મોત થઈ છે. 

pm મોદીએ લીધા આ નિર્ણય 

પ્રધાનમંત્રી નરેન્દ્ર મોદીએ રવિવારે કોરોના વાયરસની પરિસ્થિતિ તથા વેક્સિનનેશન અભિયાન મુદ્દે હાઇલેવલ બેઠક કરી હતી. આ બેઠકમાં નિર્ણય લેવામાં આવ્યો છે કે 6થી 14 એપ્રિલની વચ્ચે સાફ-સફાઇ અને કોરોના વાયરસ સામે એક વિશેષ જાગરૂકતા અભિયાન કરવામાં આવશે. પીએમ મોદીએ ભારતમાં મહારાષ્ટ્ર, પંજાબ અને છત્તીસગઢમાં એક વિશેષ ટીમ મોકલવાના પણ નિર્દેશ આપ્યા છે. પીએમ મોદીએ કહ્યું કે 100 ટકા માસ્કનો ઉપયોગ, સ્વચ્છતા અને જાહેર જગ્યાઑ પર સફાઇ તથા સુવિધાઓ પર ધ્યાન આપવામાં આવે તે માટે 6 એપ્રિલથી 14 એપ્રિલની વચ્ચે એક વિશેષ અભિયાન પણ ચાલુ કરી દેવામાં આવે.