મેઘમહેર / મધ્ય ગુજરાતમાં મેઘરાજાની ધડબડાટી, 12 ક્લાકમાં એકથી બે ઇંચ સુધીનો વરસાદ, વડોદરાની ફ્લાઇટ ડાયવર્ટ કરવી પડી

• વડોદરામાં મેઘો મહેરબાન
• વીજળીના કડાકા ભડાકા સાથે  1 ઇંચ વરસાદ 
• દિલ્હી થી વડોદરા આવતી ફ્લાઇટને ડાયવર્ટ કરાઈ

ગુજરાતમાં મેઘો મહેરબાન થયો છે. સૌરાષ્ટ્ર સહિત દક્ષિણ ગુજરાતમાં વરસાદી માહોલ જામ્યો છે ત્યારે હવે ધીરે ધીરે મેઘરાજાએ મધ્ય ગુજરાત અને ઉત્તર ગુજરાતમાં પણ એન્ટ્રી કરી છે. રવિવાર 26 જૂનથી મેઘરાજાની ધમાકેદાર એન્ટ્રી થઇ. ઉત્તર ગુજરાત સહિત મધ્ય ગુજરાતમાં ભારે પવન સાથે મેઘરાજા વરસ્યા. ત્યારે વાત કરીએ વડોદરાની તો અહીં એક જ દિવસમાં એક ઇંચ વરસાદ વરસતા રોડ રસ્તા પાણી પાણી થયા હતા. 

વડોદરામાં એક જ દિવસમાં 1 ઇંચ

વડોદરામાં  વરસાદી માહોલ જામ્યો.  વડોદરા ઉપરાંત સાવલી, વાઘોડિયામાં પણ વરસાદી માહોલ જામ્યો.એક જ દિવસમાં એક ઇંચ વરસાદ તા વડોદરાના રોડ રસ્તા પાણીમાં ગરકાવ થયા હતા. મકરપુરા એરફોર્સ પાસે વૃક્ષ ધરાશાયી થતા ટ્રાફિક જામના દ્રશ્યો સર્જાયા હતા.  રસ્તા પર ઠેર ઠેર તોતિંગ વૃક્ષો ધરાશાયી થયા હતા. 

ફ્લાઇટ કરાઇ ડાયવર્ટ

તો આ તરત ખરાબ હવામાનને કારણે  દિલ્હીથી વડોદરા આવતી ફ્લાઇટ ડાયવર્ટ કરાઇ હતી.  જો કે શહેરમાં વરસાદી માહોલ જામતા શહેરીજનોએ રાહતની લાગણી અનુભવી હતી.  વાતાવરણમાં ઠંડકની લહેર પ્રસરી ગઇ હતી. છેલ્લા ઘણા સમયથી શહેરીજનો કાગડોળે વરસાદની રાહ જોઇ રહ્યા હતા અને હવે વરસાદની એન્ટ્રી થતા બફરાથી રાહત મળી હતી.

પંચમહાલમાં સાર્વત્રિક વરસાદ

તો આ તરફ પંચમહાલમાં સાર્વત્રિક વરસાદ વરસ્યો.   પંચમહાલના મોટાભાગના વિસ્તારોમાં એક ઇંચ વરસાદ વરસતા ખેડૂતો ખુશીથી ઝૂમી ઉઠ્યા હતા. ગોધરા, હાલોલ, જાંબુઘોડા, ઘોઘંબા, કાલોલમાં વરસાદ થતા વાતાવરણમાં ઠંડકની લહેર ફરી વળી હતી.

હવામાન વિભાગે રાજ્યમાં આગામી 5 દિવસ વરસાદની આગાહી કરી

રાજ્યમાં મેઘો મહેરબાન થયો છે. અત્યાર સુધીમાં રાજ્યમાં સરેરાશ 2 ઈંચ વરસાદ નોંધાયો, ત્યારે હવામાન વિભાગે રાજ્યમાં આગામી 5 દિવસ વરસાદની આગાહી કરી છે. હવામાન વિભાગની આગાહી અનુસાર આજે સૌરાષ્ટ્ર,દક્ષિણ ગુજરાત અને કચ્છમાં વરસાદની સંભાવના છે. સૌરાષ્ટ્રમાં રાજકોટ, જામનગર, પોરબંદર, જૂનાગઢ, અમરેલી, બોટાદ, ભાવનગર, દ્વારકા અને ગીર સોમનાથમાં આજે વરસાદની આગાહી કરવામાં આવી છે. 

રાજ્યભરમાં ધીમે ધીમે ચોમાસું જામ્યુ

આ સાથે 28 જૂનના રોજ ઉતર ગુજરાત, દક્ષિણ ગુજરાત અને સૌરાષ્ટ્રમાં વરસાદની આગાહી કરવામાં આવી છે.જેમાં સારબકાંઠા, અરવલ્લી, ખેડા, આણંદ, પંચમહાલ, દાહોદ,  મહીસાગર, અમરેલી, ગીર સોમનાથ, જૂનાગઢ, પોરબંદર અને દીવમાં વરસાદની આગાહી કરવામાં આવી છે. ઉપરાંત 29 જૂનના રોજ ઉત્તર ગુજરાત, દક્ષિણ ગુજરાતમાં વરસાદની આગાહી કરવામાં આવી છે. જેમાં ગાંધીનગર, ખેડા, અરવલ્લી, આણંદ, પંચમહાલ, અમદાવાદ દીવ, દમણ અને દાદરાનગર હવેલીમાં વરસાદ થવાની સંભાવના છે. તેમજ 30 જૂનના રોજ જામનગર, રાજકોટ, પોરબંદર, જૂનાગઢ, અમરેલી, ભાવનગર, દ્વારકા, ગીર સોમનાથ અને દીવમાં વરસાદની આગાહી કરવામાં આવી છે. ઉલ્લેખનીય છે કે, હજુ સુધી રાજ્યના 11 તાલુકામાં વરસાદની એન્ટ્રી થઇ નથી..