રાજ્યમાં છેલ્લા ઘણા સમયથી ગુનાખોરીનું પ્રમાણ વધી રહ્યું છે. મહાનગરો સહિત છેવાડાના ગામોમાં પણ ગેરકાયદેસર રીતે ગોરખધંધા ધમધમી રહ્યા છે. બોટાદ કેમિકલકાંડ બાદ રાજ્યની પોલીસ હરકતમાં આવી ગઇ છે. દરોડા પાડીને દેશી દારૂની ભઠ્ઠીઓનો નાશ કરવામાં આવી રહ્યો છે. તો બીજી તરફ ગુજરાતના યુવાધનને બરબાદ કરવા માટે ડ્રગ્સ ઘુસાડવામાં આવતુ હોય તેવા અનેક બનાવો સામે આવે છે. ત્યારે રાજકોટ ગ્રામ્ય SOG પોલીસે નશાના કારોબારનો પર્દાફાશ કર્યો.
જસદણમાં પ્રતિબંધિત સીરપ સાથે 1 ઝડપાયો
રાજ્યમાં નશાનો વેપાર અને વેચાણ વકર્યું હોવાની અનેક ફરિયાદો ઉઠી રહી છે. નશાનું દૂષણ આજના યુવાધનને આર્થિક અને શારીરિક રીતે ઊધયની માફક કોરી ખાય રહ્યું છે. વારંવાર આવા કારોબારનો પર્દાફાશ થતો હોવા છતાં આવા દૂષણ અટકવાનું નામ લેતા નથી. ત્યારે રાજકોટના જસદણમાં પ્રતિબંધિત સીરપની બોટલ સાથે એક શખ્સની ધરપકડ કરવામાં આવી. રાજકોટ ગ્રામ્ય SOG પોલીસે પ્રતિબંધિત સીરપ બોટલનો જથ્થો ઝડપી પાડ્યો. કુલ 119 સીરપની બોટલ રાજકોટ ગ્રામ્ય SOG પોલીસે કબ્જે કરીને કાયદેસરની કાર્યવાહી હાથ ધરી છે. છેલ્લા કેટલા સમયથી પ્રતિબંધિત બોટલની હેરાફેરી ચાલી રહી છે, કોના ઇશારે આ કામગીરી થઇ રહી છે આ જથ્થો કોને પહોંચાડવામાં આવતો હતો ? કોણ પ્રતિબિંધિત સીરપ સપ્લાય કરતુ હતુ તે તમામ બાબતોને લઇને પોલીસે તપાસચક્રો ગતિમાન કર્યા છે.
સીરપના નશો કેટલો ભારે પડે ?
સીરપમાં આલ્કોહોલિક કન્ટેટ હોવાથી નશો થાય છે
સીરપનું સેવન કરવાથી ફેફસાંમાં નુકસાન થાય છે
હાથ-પગના હાડકા નબળા પડે છે
કેટલીકવાર હાથ-પગના હાડકા ઊંઘમાં તૂટી જાય છે
નશાના કારણે પેટના ગંભીર પ્રકારના રોગ થાય છે
સીરપની લતથી ભૂખ નથી લાગતી પરિણામે શરીર પર ગંભીર અસર થાય છે
સીરપથી મગજના કોષોને અત્યંત નુકસાન થાય છે
નશો ન મળવાને કારણે મન બેચેન રહે છે
ક્યાં સુધી ગુજરાતનું યુવાધન થશે બરબાદ ?
મહત્વનું છે કે ગુજરાતના યુવાધનને નશાના રવાડે ચઢાવવાના અવારનવાર પ્રયાસો થઇ રહ્યા છે પરંતુ આ કામગીરી પાછળ માસ્ટરમાઇન્ડ કોણ છે તે હજુ તપાસનો વિષય છે. ક્યાં સુધી પોલીસ માત્ર જથ્થો ઝડપીને સંતોષ માનશે ? આવા કાળા કારોબારના મૂળ સુધી ક્યારે પહોંચશે પોલીસ ? ક્યાં સુધી આ રીતે બરબાદ થતુ રહેશે ગુજરાતનું યુવાધન ? ગુજરાતના ભવિષ્ય સાથે ચેડા કરનાર વિરુદ્ઘ કડક કાર્યવાહી ક્યારે કરાશે ? હાલ તો જસદણની આ ઘટનાને લઇને રાજકોટ ગ્રામ્ય SOG પોલીસે દ્વારા તપાસનો ધમધમાટ શરૂ કરવામાં આવ્યો છે.