ગોંડલમાં રેન્જ આઈજીના આર.આર. સેલે દરોડો પાડી ક્રિકેટ સટ્ટાના નેટવર્કનો પર્દાફાશ કર્યો છે. ૬ મોબાઈલ સાથે લોહાણા શખ્સની ધરપકડ બાદ આ ક્રિકેટ સટ્ટાના નેટવર્કમાં રાજકોટ, ભાવનગર, જૂનાગઢ અને વાસાવડના બુકીનાં નામ બહાર આવતાં તેમની શોધખોળ શરૂ કરાઈ છે.
ગોંડલના જેતપુરરોડ પર ત્રણ ખૂણિયા પાસે આવેલ માલવિયાનગર સોસાયટીમાં ક્રિકેટ સટ્ટાનું નેટવર્ક ચાલતું હોવાની બાતમીના આધારે આર.આર. સેલની ટીમે દરોડો પાડ્યો હતો, જેમાં ગોંડલના આશિષ ઉર્ફે રામ જીતેન્દ્રભાઈ સોમૈયા (ઉ.ંવ.૩પ)ને ઝડપી લીધો હતો.
આઈપીએલની મેચ ઉપર બેટિંગ તેમજ રનફેરનો જુગાર રમતા આશિષ પાસેથી આઠ હજારની કિંમતના ૬ મોબાઈલ અને એક ડાયરી મળી આવી હતી, જેની ઊંડાણપૂર્વક તપાસ કરતાં આ ક્રિકેટ સટ્ટાના નેટવર્ક સાથે જોડાયેલા જૂનાગઢના યોગેશ ઉર્ફે વાય.જે., ભાવનગરના પેશ ઉર્ફે આર.એસ., વાસાવડના ઈમરાન ઉર્ફે એપલ અને રાજકોટના અલી નામના બુકીનાં નામ ખૂલ્યાં છે.
આ તમામના મોબાઈલ નંબરના આધારે પોલીસે શોધખોળ શરૂ કરી છે. ગોંડલના બસ સ્ટેન્ડ પાસેથી પોલીસે અમીન મામદ તૈલી નામના શખસને વરલી-મટકાના જુગાર રમતાં ઝડપી લઈ રોકડ સહિત રૂ. ર૦૯૦નો મુદ્દામાલ કબજે કર્યો હતો.