સતત વધી રહેલા કેસના કારણે સ્થિતિ વકરતા હવે પોલીસ તંત્ર પણ એલર્ટ થયું છે અને લોકો કોવિડ ગાઈડલાઈન્સનું પાલન કરે તે માટે કડક હાથે કામ કરી રહ્યું છે. લોકોની કોરોના ગાઈડલાઈન નહીં પાળવાની બેદરકારીનું પરિણામ હવે ધીમે ધીમે સામે આવી રહ્યું છે, જેમાં કોરોના સાથે ઓમિક્રોનના કેસ પણ વધી રહ્યા છે ત્યારે તેને અટકાવવા માટે હવે તંત્ર પણ સતર્ક થયું છે.
અમદાવાદીઓ ચેતી જજો
માસ્ક નહીં પહેરવાનું કોઈ બહાનું હવે નહીં ચાલે
સ્થિતિ વકરતાં પોલીસ ઓચિંતી એક્શન મોડ પર
દેશ અને દુનિયાને હચમચાવી દેનારી ઘાતક કોરોના મહામારી હવે ફરી માથું ઊંચકી રહી છે. તેમાં પણ કોરોના વાઈરસનો નવો ખતરનાક વાઇરસ ઓમિક્રોન ભયાનક ઝડપે ફેલાઈ રહ્યો છે ત્યારે આવા સંજોગોમાં લોકોએ ફરી એક વખત માસ્ક પહેરવાના નિયમનો કડક અમલ કરવો જ પડશે. બહાર નીકળતી વખતે જો પહેલાં માસ્ક નહીં પહેરો તો દંડ સ્વરૂપે રૂ. ૧,૦૦૦ ચૂકવવાની તૈયારી રાખવી પડશે. આમ માસ્ક નહીં પહેરવાનું આર્થિક અને આરોગ્ય એમ બંને દૃષ્ટિએ મોંઘું પડશે. લોકો ફરીથી માસ્ક પહેરતા થાય અને કોરોનાની ગાઈડલાઈનનું કડકાઈથી પાલન થાય તે માટે પોલીસ એક્શન મોડ પર આવી ગઈ છે.
દિવાળી સહિતના તહેવારોમાં બજારોમાં થયેલી ભારે ભીડ અને સોશિયલ ડિસ્ટન્સનો અભાવ તેમજ માસ્ક નહીં પહેરવાની બેદરકારીથી કોરોનાના કેસ વધ્યા હતા, જ્યારે હવે ઓમિક્રોન વેરિઅન્ટના કારણે કેસમાં જોરદાર ઉછાળો જોવા મળ્યો છે. અમદાવાદ સહિત રાજ્યનાં મોટા ભાગનાં શહેરમાં કોરોના ફરી એક વાર પગ પેસારો કરી રહ્યો છે. હવેથી નિયમિતપણે માસ્ક વિનાના લોકોને દંડ ફટકારવામાં આવશે. કોરોનામાં માસ્કનો મેમો આપવાની કામગીરી ધીમી ગતિએ ચાલી રહી હતી. જેને વેગ મળ્યો છે. કોરોના અન્વયે સરકારે જાહેર કરેલી ગાઈડલાઈન યથાવત્ છે. જેમાં માસ્ક પહેરવું ફરજિયાત છે અને જો કોઇએ માસ્ક પહેર્યું ના હોય તો પોલીસ તેને ૧,૦૦૦ રૂપિયા દંડ કરીને મેમો આપે છે. જોકે પોલીસ ગમે ત્યારે સાઈડમાં ઊભી રહીને માસ્ક વગર વાહન ચલાવતા લોકોને ઝડપી લે છે. જેમાં સ્કૂટરવાળા ક્યારેક છટકી જવામાં સફળ રહે છે પરંતુ કાર ચાલકો ઝડપાઇ જાય છે.
લોકોનાં અવનવા બહાનાં પોલીસને હસાવી જાય છે: માસ્ક વગર ફરી રહેલા લોકો જયારે પોલીસના હાથે ઝડપાઇ જાય છે ત્યારે અવનવાં બહાનાં રજૂ કરે છે. ‘સાહેબ, માસ્કની દોરીથી કાન દુઃખે છે’ ‘હજુ હમણાં જ ચોકલેટ ખાવા માસ્ક ઉતાર્યો’, ‘સાહેબ માત્ર શ્વાસ મુંઝાતો હતો એટલે એક સેકન્ડ માટે માસ્ક નાકની નીચે કર્યો, આટલું ચલાવી લોને’, ‘ચા-પાણીના લઈને જવા દો’ આવાં અનેક બહાનાં પહેલેથી જ જાણી ગયેલી પોલીસ માટે મનોરંજન બની જાય છે પણ છેવટે દંડ તો વસૂલાય જ છે.
પંચાયતોની ચૂંટણીમાં જમા થયેલી ભીડના કારણે કોરોના ભારે પડશે: તાજેતરમાં ગ્રામ પંચાયતો અને સરપંચની સંપન્ન થયેલી ચૂંટણીઓમાં સોશિયલ ડિસ્ટન્સ ભૂલાયું હતું. લોકોનાં ટોળેટોળાં મત ગણતરી કેન્દ્રો પર એકઠાં થયાં હતાં, તે પણ કોરોનાના કેસોમાં વધારો થવાનું એક કારણ બની શકે છે. ચૂંટણીમાં જમા થયેલી ભીડ પર કોરોના ભારે પડશે. હવે ક્રિસમસની ઉજવણી શરૂ થઇ ચૂકી છે. હાલમાં નવા વર્ષની ઉજવણીમાં લોકો એક જ સ્થળે ભેગા ન થાય તેના માટે પણ નિયમો વધુ કડક બનાવવામાં આવી રહ્યા છે.