On This Day / આજના જ દિવસે વિરેન્દ્ર સેહવાગે રચ્યો હતો ઇતિહાસ, બન્યો હતો સૌથી ઝડપી ત્રેવડી સદી ફટકારનાર બેટ્સમેન

• માત્ર 278 બોલમાં ત્રેવડી સદી પૂરી કરી.
• સેહવાગે સાઉથ આફ્રિકા સામેની ટેસ્ટ મેચમાં ઇતિહાસ રચ્યો.
• આ ઇનિંગમાં 42 ચોગ્ગા અને પાંચ છગ્ગા માર્યા હતા.

પૂર્વ ભારતીય બેટ્સમેન વિરેન્દ્ર સેહવાગ (Virender Sehwag) પોતાની શાનદાર બેટીંગ માટે ખૂબ જ ફેમસ છે. વિરેન્દ્ર સેહવાગ એક એવા બેટ્સમેન હતા, જેમણે ક્રિકેટ રમવાના અંદાજમાં ફેરફાર કર્યો હતો. તેઓ ત્રણેય ફોર્મેટમાં એક સમાન રીતે જ રમતા હતા. 28 માર્ચ 2008ના રોજ વિરેન્દ્ર સેહવાગે સાઉથ આફ્રિકા સામેની ટેસ્ટ મેચમાં ઇતિહાસ રચ્યો હતો અને સૌથી ફાસ્ટ ત્રેવડી સદી ફટકારી હતી. માત્ર 278 બોલમાં ત્રેવડી સદી પૂરી કરી હતી. વિરેન્દ્ર સેહવાગનો સૌથી ઝડપથી ત્રેવડી સદી ફટકારવાનો રેકોર્ડ આજ દિન સુધી કોઈ તોડી શક્યું નથી.

319 રનની ઇનિંગ રમી 

વર્ષ 2008માં ભારતમાં સાઉથ આફ્રિકા અને ભારત વચ્ચે ત્રણ ટેસ્ટ મેચની સીરીઝ રમવામાં આવી હતી. સીરીઝની પહેલી મેચમાં વિરેન્દ્ર સેહવાગે 304 બોલમાં 319 રનની ઈનિંગ રમીને ઇતિહાસ રચ્યો હતો. આ ઇનિંગમાં 42 ચોગ્ગા અને પાંચ છગ્ગા માર્યા હતા. ચેન્નઈના એમ. એ. ચિદમ્બરમ્ સ્ટેડિયમમાં આ ટેસ્ટ મેચ રમવામાં આવી હતી.

ભારત તરફથી પહેલી ઇનિંગમાં રેકોર્ડ નોંધાવ્યો

સાઉથ આફ્રિકાએ ટોસ જીતીને પહેલા બેટીંગ કરી હતી અને 540 રન કર્યા હતા. જેના જવાબમાં ભારતે 627 રન કર્યા હતા. આ 627 રનમાં વિરેન્દ્ર સેહવાગે કરેલ ત્રેવડી સદી પણ સામેલ હતી. ટેસ્ટ ક્રિકેટના ઇતિહાસમાં અત્યાર સુધીમાં માત્ર ચાર ખેલાડીઓએ બે વાર ત્રેવડી સદી ફટકારી છે. સાઉથ આફ્રિકા સામે રમાયેલ આ મેચ‌ ડ્રો થઈ હતી.

વિરેન્દ્ર સેહવાગનું આંતરરાષ્ટ્રીય કરિઅર

વિરેન્દ્ર સેહવાગે આંતરરાષ્ટ્રીય મેચમાં કુલ 104 ટેસ્ટ મેચ, 251 વન-ડે મેચ અને 19 T20 મેચ રમી છે. ટેસ્ટ કરિઅરમાં 49.34ની સરેરાશથી 8,586 રન, વન-ડે મેચમાં 35.06ની સરેરાશથી 8,273 રન અને T20 ઇન્ટરનેશનલ મેચમાં 145.39ના સ્ટ્રાઈક રેટથી 394 રન કર્યા છે.