એક કાર્યક્રમમાં સ્ટેજ ઉપર ભાષણ ચાલી રહ્યું હતું ત્યારે ભાજપના ઉમેદવાર સૂઈ રહ્યા હોઇ તેમનું નામ લેતા તેમની નિંદ્રા તૂટી હોવાનો વિડીયો સોશિયલ મીડિયામાં વાયરલ
ગુજરાતમાં વિધાનસભાની ચૂંટણી જાહેર થયા બાદ હવે રાજકીય પક્ષો ચૂંટણી પ્રચારમાં લાગી ગયા છે. તેવામાં ભાવનગરના મહુવાના ભાજપના ઉમેદવારનો એક વિડીયો સામે આવ્યો છે. જેમાં ચાલુ કાર્યક્રમ દરમ્યાન તેઓ સ્ટેજ ઉપર સૂઈ રહ્યા હોવાનું દેખાઈ રહ્યું છે. એક કાર્યક્રમમાં સ્ટેજ ઉપર ભાષણ ચાલી રહ્યું હતું ત્યારે ભાજપના ઉમેદવાર સૂઈ રહ્યા હોઇ તેમનું નામ લેતા તેમની નિંદ્રા તૂટી હતી. જોકે હવે આ ઘટનાનો વિડીયો સોશિયલ મીડિયામાં વાયરલ થઈ રહ્યો છે.
ભાવનગરની મહુવા સીટ ઉપર ભાજપે શિવાભાઈ ગોહિલને ટિકિટ આપી છે. જેને લઈ હબે શિવાભાઈ ચૂંટણી પ્રચારમાં લાગી ગયા છે. તેવામાં હાલ શિવાભાઈ ગોહિલનો એક વિડીયો સોશિયલ મીડિયામાં વાયરલ થઈ રહ્યો છે. વાત જાણે એમ છે કે, એક કાર્યક્રમમાં મહુવાના ભાજપ ઉમેદવાર શિવા ગોહિલ ઝોકા ખાતા જોવા મળ્યા છે. શિવા ગોહિલ સ્ટેજ પર ભાષણ દરમિયાન નિદ્રા કરતા જોવા મળ્યા હતા. જોકે બાદમાં સ્ટેજ પરથી નામ બોલાતા શિવા ગોહિલની નિદ્રા તૂટી હતી. મહત્વનું છે કે, આ કાર્યક્રમમાં મહારાષ્ટ્રના ઉપમુખ્યમંત્રી દેવેન્દ્ર ફડણવીસ પણ હાજર રહ્યા હતા.
મહુવામાં કોંગ્રેસે કનુ કલસરિયાને આપી ટિકિટ
મહુવા બેઠક પરથી કોંગ્રેસના ઉમેદવાર તરીકે કનુ કલસરિયાના નામની જાહેરાત કરવામાં આવી છે. અગાઉ VTV સાથેની વાતચીતમાં કનુ કલસરિયાએ જણાવ્યું હતું કે, ગુજરાતના લોકો મોંઘવારીથી ત્રસ્ત થયા છે. આથી શિક્ષણ, આરોગ્યની સુવિધા ઊભી કરવીએ કોંગ્રેસનો મુખ્ય મુદ્દો છે. વધુમાં આમ આદમી પાર્ટી અંગેના સવાલમાં કનુ કલસરિયાએ કહ્યું કે, AAP અંગે ચિંતા કરવાની જરૂર નથી. AAPએ વાતાવરણ સારૂં બનાવ્યું છે, પરંતુ ગુજરાતમાં ક્યારેય પણ ત્રીજો પક્ષ ફાવ્યો નથી. AAPનું ગુજરાતમાં જમીની અસ્તિત્વ જ નથી. તેમ જણાવી કનું કલસરિયાએ જીતનો હુંકાર કર્યો હતો અને અમે કોંગ્રેસના વચનો પુરા કરીશું. તેવો દાવો પણ કર્યો હતો.