MCDની આ કાર્યવાહી બાદ અહીં રહેતા લોકો રસ્તા પર રહેવા માટે મજબૂર બન્યા છે. જાણકારી અનુસાર, અહીં ઝૂંપડપટ્ટીમાં રહેતા એક પરિવારના ઘરે 8 ફેબ્રુઆરીના રોજ યુવતીના લગ્ન હતા
દિલ્હીના ખ્યાલા વિસ્તારમાં MCDનું બુલડોઝર ચાલ્યું
લોકોએ કોર્ટમાંથી મળેલો સ્ટે ઓર્ડર પણ અધિકારીઓને બતાવ્યો
એક પરિવારના ઘરે 8 ફેબ્રુઆરીના રોજ દિકરીના લગ્ન હતા
અધિકારીઓએ કોઈની વાત સાંભળી નહી અને ઝૂંપડપટ્ટી તોડવાનું કામ શરૂ કર્યું
પશ્ચિમ દિલ્હીના ખ્યાલા વિસ્તારમાં MCDનું બુલડોઝર ચાલ્યું અને અહી આશરે એક ડઝનથી વધારે ઝૂંપડપટ્ટીઓને ગેરકાયદેસર ગણાવીને MCDએ સંપૂર્ણપણે તોડી પાડી હતી. MCDની આ કાર્યવાહી બાદ અહીં રહેતા લોકો રસ્તા પર રહેવા માટે મજબૂર બન્યા છે. જાણકારી અનુસાર, અહીં ઝૂંપડપટ્ટીમાં રહેતા એક પરિવારના ઘરે 8 ફેબ્રુઆરીના રોજ દિકરીના લગ્ન હતા.
પરિવારે તેમના તમામ સંબંધીઓને લગ્નમાં બોલાવ્યા હતા. ગુરુવારે દિકરીના લગ્નની ડોલી ઉઠી અને તે જ દિવસે MCDના અધિકારીઓ બુલડોઝર લઈને ઘરે પહોંચી ગયા ઘર ખાલી કરવાનો આદેશ આપવા લાગ્યા હતા. પરિવાર મહેમાનોની વિદાય પણ યોગ્ય રીતે ન કરી શક્યો. આ દરમિયાન અહીં રહેતા લોકોએ કોર્ટમાંથી મળેલો સ્ટે ઓર્ડર પણ અધિકારીઓને બતાવ્યો હતો. પરંતુ તેમ છતા અધિકારીઓએ કોઈની વાત સાંભળી નહી અને ઝૂંપડપટ્ટી તોડવાનું કામ શરૂ કર્યું હતું.
સ્થાનિકોનું શું કહેવું છે ?
અહીં રહેતા લોકોનું કહેવું છે કે તેઓ લગભગ 30 વર્ષથી અહીં રહે છે. તેમની પાસે ઝૂંપડપટ્ટીના સરનામા પર આધાર કાર્ડ, પાન કાર્ડ, મતદાર આઈડી કાર્ડ, વીજળી કનેક્શન અને પાણીનું કનેક્શનની સાથે બેંક એકાઉન્ટ પણ છે. તેમ છતાં વહીવટીતંત્રે તેમની ઝૂંપડપટ્ટીઓને ગેરકાયદે ગણાવીને તોડી પાડી હતી.
સ્થાનિક ધારાસભ્ય પાસે દોડ્યા
સ્થાનિક લોકો આમ આદમી પાર્ટીના ધારાસભ્ય ધનવતી ચંદેલા પાસે ગયા હતા. પરંતુ ત્યાંથી પણ તેમને કોઈ મદદ ન મળી. બેઘર પરિવારને ખુલ્લા આકાશ નીચે રાત વિતાવવાની ફરજ પડી છે.
કન્યાની માતાએ શું કહ્યું ?
આ મામલે કન્યાની માતાએ જણાવ્યું કે 31મીએ ઘર ખાલી કરવાની નોટિસ આપવામાં આવી હતી. લગ્નવાળા ઘરમાં માત્ર ત્રણ દિવસમાં કઈ રીતે કંઈ થઈ શકે. ઘરમાં લગ્ન છે અને હજુ વિદાય પણ થઈ નથી. ઘરે આવી બુલડોઝર ચલાવ્યું અને બધો સામાન દબાઈ ગયો હતો. સંબંધિઓને પણ પાછા મોકલવા પડ્યા છે.