પાણીની સમસ્યાને લઇને ભૂજ નગરપાલિકાની બહાર 'માટલાફોડ' મહિલાઓએ ચેમ્બરને લગાવ્યા તાળા

કચ્છઃ ઉનાળો ચરમસીમાએ પહોંચ્યો છે ત્યારે ભુજમાં પાણીની તંગી તીવ્ર બન્યો છે. અનેક વિસ્તારોમાં અઠવાડીયે માંડ એકવાર નામ માત્રનું અપૂરતું પાણી અપાય છે. જેથી લોકોનો આક્રોશ ઘેરો બન્યો છે. 

ત્યારે ભુજના વૉર્ડ નંબર 1 2 3 અને 8માં પાણીની કારમી તંગીથી કંટાળેલી મહિલાઓએ આજે ભુજ નગરપાલિકા કચેરીમાં માટલાં ફોડી વિરોધ પ્રગટ કર્યો હતો.

વિપક્ષી નેતા અને અન્ય કોંગ્રેસી નગરસેવકોની હાજરીમાં માટલાધારી મહિલા મોરચો પાલિકા પ્રમુખ કારોબારી ચેરમેન અને પાણી પુરવઠા સમિતિના ચેરમેનને રજૂઆત કરવા પહોંચ્યો હતો.  જોકે પરિસ્થિતિ પામી ગયેલાં એકપણ પદાધિકારી ત્યાં હાજર નહોતાં અને તેમની ચેમ્બર બહાર અલીગઢી તાળાં લટકતાં હતા. 



જેથી મહિલાઓએ તેમની ચેમ્બર આગળ માટલાં ફોડી તેમના નામના છાજિયાં લીધા હતા. વૉર્ડ નંબર 8માંથી ખુદ પાલિકા પ્રમુખ ચૂંટાયેલા છે. તો વૉર્ડ નંબર એક અને બેમાં મુસ્લિમ મતદારોનું પ્રભુત્વ છે. 

વિપક્ષી નેતા જાડેજાએ પાલિકાના પાણી વિતરણની વ્યવસ્થાને નિષ્ફળ ગણાવી અમુક વિસ્તારોમાંથી કોંગ્રેસી નગરસેવકો ચૂંટાતા હોઈ કિન્નાખોરી રખાઈ ત્યાં પાણી ન અપાતું હોવાનો આક્ષેપ કર્યો હતો. પદાધિકારીઓની ગેરહાજરીથી રોષે ભરાયેલાં મહિલા મોરચા અને કોંગ્રેસે પાલિકાની કચેરીને તાળાબંધી કરી સૂત્રોચ્ચાર કર્યો હતો