CM ભૂપેન્દ્ર પટેલ દિલ્લીમાં મુખ્યમંત્રી અને ચીફ જસ્ટીસ જોઇન્ટ કોન્ફરન્સ ભાગ લેવા જશે જ્યારે કેજરીવાલ AAP-BTPના ગઠબંધનને લઈ ગુજરાત આવશે
આવતીકાલે CM ભૂપેન્દ્ર પટેલ દિલ્લી જશે
મુખ્યમંત્રી અને ચીફ જસ્ટીસ જોઇન્ટ કોન્ફરન્સમાં ભાગ લેશે
અરવિંદ કેજરીવાલ આજે રાત્રે પહોંચશે સુરત
1મેના રોજ AAP-BTP ગઠબંધન કરશે જાહેરાત
ગુજરાત સીએમ ભૂપેન્દ્ર પટેલ જશે દિલ્હી
મુખ્યમંત્રી ભૂપેન્દ્ર પટેલ શનિવાર, તા.૩૦ એપ્રિલ-ર૦રરના નવી દિલ્હીમાં વિજ્ઞાન ભવન ખાતે સવારે ૧૦ વાગ્યે યોજાનારી જોઇન્ટ કોન્ફરન્સ ઓફ ચીફ મિનીસ્ટર્સ એન્ડ ચીફ જસ્ટીસીઝ ઓફ હાઇકોર્ટસમાં સહભાગી થવા નવી દિલ્હી જશે. વડાપ્રધાન નરેન્દ્ર મોદીની અધ્યક્ષતામાં યોજાનારી આ કોન્ફરન્સમાં કાયદા મંત્રી શ્રી કિરન રિજ્જુ અને સુપ્રિમ કોર્ટના ચીફ જસ્ટીસ એન. વી. રમણા સહિત દેશના રાજ્યોના મુખ્યમંત્રીઓ અને રાજ્યની વડી અદાલતોના મુખ્ય ન્યાયમૂર્તિઓ પણ જોડાશે.
દિલ્હી સીએમ અરવિંદ કેજરીવાલ આવશે ગુજરાત
દિલ્લીના CM અરવિંદ કેજરીવાલ ફરીવાર ગુજરાતના પ્રવાસે આવશે. આજે રાત્રે તેઓ 9 વાગે સુરત પહોંચશે. અને સુરતમાં જ રાત્રિ રોકાણ કરશે. ત્યાર બાદ તેઓ 1 મેના રોજ ભરૂચ ખાતેના કાર્યક્રમમાં હાજરી આપશે. જ્યાં આમ આદમી પાર્ટી અને છોટુ વસાવાની ભારતીય ટ્રાયબલ પાર્ટીના મહાસંમેલનમાં હાજરી આપશે. જ્યાં તેઓ બીટીપી સાથે ગઠબંધનની પણ જાહેરાત કરશે.
ગુજરાતના સ્થાપના દિવસે થશે AAP-BTPનું ગઠબંધન
ગુજરાત વિધાનસભા ચૂંટણીને લઈને દરેક પાર્ટીઓ દ્વારા તૈયારીઓ ચાલી રહી છે ત્યારે આમ આદમી પાર્ટી દ્વારા મોટું એલાન કરવામાં આવ્યું છે. આમ આદમી પાર્ટી અને BTP વચ્ચે ગઠબંધન કરવાનું એલાન કરવામાં આવ્યું છે અને આગામી ચૂંટણી બંને પાર્ટી સાથે મળીને ચૂંટણી લડશે. ગઠબંધનની જાહેરાત વખતે ગુજરાત AAPના અધ્યક્ષ ગોપાલ ઈટાલિયાએ કહ્યું હતું કે છોટુ વસાવાએ ગરીબો અને આદિવાસીઓ માટે ગુજરાતમાં લડત આપી છે. ભૂતકાળની સરકારોએ હંમેશા આદિવાસીઓ સાથે અન્યાય કર્યો છે અને એટલે જ આમ આદમી પાર્ટીની છોટુ વસાવા સાથે લાંબા સમયથી ચર્ચા ચાલી રહી હતી. આગામી પહેલી તારીખે અરવિંદ કેજરીવાલ અને છોટુ વસાવા સંમેલનમાં ગઠબંધનનું એલાન કરશે.
ગુજરાત સ્થાપના દિવસે અમે નવા ગુજરાતનું મોડલ આપીશુ: મહેશ વસાવા
BTP નેતા મહેશ વસાવાએ પણ ભાજપ અને કોંગ્રેસ બંને પાર્ટીઓ પર આકરા પ્રહાર કર્યા હતા અને કહ્યું હતું કે આજે પણ આદિવાસીઓ બે ટંકના રોટલા માટે પોતાનું ઘર છોડી જાય છે. સરકારે સ્કૂલો બંધ કરી આદિવાસી સમાજને નુકસાન કર્યું અને એવામાં અમે સામે પક્ષે AAP નું કામ જોયું છે. ગુજરાત સ્થાપના દિવસે અમે નવા ગુજરાતનું મોડલ આપીશુ.