અમેરિકાના પ્રમુખ ડોનાલ્ડ ટ્રમ્પના 24-25 ફેબ્રુઆરી યોજાનારા ભારત પ્રવાસ અગાઉ બંને દેશ વચ્ચે થનારા વધુ બે સંરક્ષણ સોદાને અંતિમ સ્વરૂપ આપી દેવામાં આવ્યું છે. 30 હેવી-ડ્યુટી સશસ્ત્ર હેલિકોપ્ટર માટે 3.5 અબજ ડોલર (અંદાજે 25,000 કરોડ રૂપિયા)ની આ સોદો થવાનો છે.
24 એમએચ-60 'રોમિયો' સીહોક મેરીટાઇમ હેલિકોપ્ટર માટે 2.6 અબજ ડોલરનો સોદો કરાઇ રહ્યો છે
એમએચ-60 આર હેલિકોપ્ટર માટે ભારત પ્રથમ હપતા તરીકે 15 ટકા રકમ ચૂકવશે
નૌકાદળ માટે 24 એમએચ-60 'રોમિયો' સીહોક મેરીટાઇમ મલ્ટિ-મિશન હેલિકોપ્ટર માટે 2.6 અબજ ડોલરનો સોદો કરવામાં આવી રહ્યો છે. આ હેલિકોપ્ટર અમેરિકન કંપની લોકહિડ માર્ટિન પાસેથી ખરીદવામાં આવશે. ભારતીય સેના માટે 6 એએચ-64 ઈ અપાચે એટેક હેલિકોપ્ટર માટે 930 મિલિયન ડોલરનો સોદો થવાનો છે.
સંરક્ષણ વિભાગના ઉચ્ચસ્તરીય સૂત્રોનાં જણાવ્યા અનુસાર, કેબિનેટ કમિટી ઓન સિક્યોરિટી (સુરક્ષા અંગેની કેબિનેટ સમિતિ) દ્વારા આ સોદાને આગામી સપ્તાહે ઔપચારિક મંજૂરી આપવામાં આવશે.
સૂત્રોના જણાવ્યા પ્રમાણે, યુએસ ફોરેન મિલિટરી સેલ્સ (FMS) ગવર્મેન્ટ-ટુ-ગવર્મેન્ટ ડીલ હેઠળ એમએચ-60 આર હેલિકોપ્ટર માટે ભારત પ્રથમ હપતા તરીકે 15 ટકા રકમ ચૂકવશે. કરાર પર હસ્તાક્ષર થયા બાદ બે વર્ષમાં હેલિકોપ્ટરની પહેલી ડિલિવરી ભારતને મળી જશે. ચારથી પાંચ વર્ષમાં તમામ 24 હેલિકોપ્ટર ભારત આવી જશે.
હેલફાયર મિસાઈલ, એમકે-54 ટોરપીડો અને ચોકસાઇથી નિશાન પર પ્રહાર કરનારા રોકેટોથી સજ્જ એમએચ-60 આર હેલિકોપ્ટર ભારતીય સંરક્ષણ દળોને સપાટી અને સબમરીન-ભેદી લડાઈ અભિયાનોને સફળતાથી અંજામ આપવામાં સક્ષમ બનાવશે. આ હેલિકોપ્ટર ફ્રિગેટ, વિધ્વંસક જહાજ, ક્રૂઝર અને એરક્રાફ્ટ કેરિયર શિપ પરથી પણ ચલાવી શકાય છે. આ હેલિકોપ્ટર વિશ્વના સૌથી અત્યાધુનિક સમુદ્રી હેલિકોપ્ટર ગણાય છે.
હિંદ મહાસાગરમાં ચીનના આક્રમક વ્યવહારને ધ્યાનમાં રાખતા ભારત માટે આ હેલિકોપ્ટર ખૂબ જરૂરી છે. આ હેલિકોપ્ટર હાલમાં યુએસ નેવીમાં તહેનાત છે. આ ક્ષેત્રનાં યુદ્ધ જહાજ દળ પાસે અત્યાર સુધી લગભગ એક ડઝન જૂના સી કિંગ અને 10 કામોવ-28 એન્ટી સબમરીન લડાઇ હેલિકોપ્ટર છે.
ઉલ્લેખનીય છે કે, અમેરિકાએ ગત વર્ષે એપ્રિલમાં ભારતને સીહોક હેલિકોપ્ટર વેચવાની મંજૂરી આપી હતી. એવું માનવામાં આવી રહ્યું છે કે, આ હેલિકોપ્ટર ભારતીય નૌકાદળને એન્ટિ-ગ્રાઉન્ડ અને એન્ટિ-સબમરીન લડાઇમાં વધુ તાકાત પૂરી પાડશે. આ હેલિકોપ્ટર સબમરીનને શોધીને તેને નષ્ટ કરવા માટે ખાસ બનાવવામાં આવ્યું છે. સીહોક બ્રિટનમાં બનેલા અને હવે બહુ જૂનાં થઈ ગયેલાં સી કિંગ હેલિકોપ્ટરનું સ્થાન લેશે.
વિશ્વની મહાસત્તા અમેરિકાના પ્રેસિડેન્ટ ડોનાલ્ડ ટ્રમ્પ આ મહિનાની 24-25 તારીખે ભારત આવી રહ્યા છે. 24 ફેબ્રુઆરીએ વડા પ્રધાન નરેન્દ્ર મોદી ડોનાલ્ડ ટ્રમ્પનું ભવ્ય સ્વાગત કરશે. અમદાવાદમાં ટ્રમ્પના ઐતિહાસિક સ્વાગત માટે તડામાર તૈયારીઓ ચાલી રહી છે.
ટ્રમ્પની આ ભારત મુલાકાત એટલા માટે પણ ખાસ છે કેમ કે ભારત અને અમેરિકા વચ્ચે આધુનિક હથિયારોની સાથે સાથે ટેકનોલોજીના ક્ષેત્રમાં પણ ઘણા મહત્ત્વના કરાર થવાના છે. સંરક્ષણ વિભાગના સત્તાવાર સૂત્રોએ જણાવ્યું હતું કે, ભારત દ્વારા 1.86 અબજ ડોલરની કિંમતે મિસાઇલ ડિફેન્સ સિસ્ટમ ખરીદવાની વાતચીત પણ અંતિમ તબક્કામાં છે.
અમેરિકન સંરક્ષણ ઉત્પાદક કંપની બોઇંગે સંકેત આપ્યો છે કે, તે ડોનાલ્ડ ટ્રમ્પના ભારત પ્રવાસ દરમિયાન ભારતીય વાયુસેનાને એફ-15 ઈએક્સ ઈગલ ફાઇટર જેટ વિમાન વેચવાનો પ્રસ્તાવ મૂકવા પર પણ વિચારણા કરી રહી છે.