અરવલ્લી / ટ્રક સાથે અકસ્માતમાં કારમાં આગની ઘટના, ડૉક્ટર પતિ અને પત્નીનું કારમાં જ મોત

• અરવલ્લીમાં કારમાં સળગી જતા દંપત્તિ થયું ભડથું
• બાયડ-દહેગામ રોડ પરની ઘટના 
• બાયડનું ડોક્ટર દંપત્તિ સળગી જતા મોત 

અરવલ્લી ખાતે કારમાં આગની ઘટનામાં એક ડૉક્ટર અને તેમના પત્નીનું સળગી જવાથી મોત નિપજ્યું છે. બાયડ-દહેગામ રોડ પર આ દુઃખદ ઘટના સર્જાઈ છે. લિહોડા ગામ નજીક કાર અને ટ્રક વચ્ચે અકસ્માત થયો હતો. અકસ્માત બાદ કારમાં ભયંકર આગના કારણે સવાર પતિ-પત્નીનું નિધન થયું છે. મૃતક બાયડની વાત્સ્યલ્ય હોસ્પિટલમાં કાર્યરત ડૉ.મયુર શાહ હતા. 

ટ્રક સાથે અકસ્માતની થોડી મિનિટમાં જ કારમાં ભયંકર આગ લાગી ગઈ હતી. તો લોકોમાં પણ દોડાદોડી થઈ ગઈ હતી. સ્થાનિકોએ આગને ઠારવાની કોશિશ કરી હતી. પણ કારમાં લાગેલી આગે મોટું સ્વરૂપ લઈ લીધું હતું. ફાયર બ્રિગેડ પણ પહોંચે તે પહેલા કારમાં સવાર દંપતી આગની ઝપટમાં આવી ગયા હતા. અકસ્માતની જાણ થતા પુત્ર પણ ઘટનાસ્થળે દોડી આવ્યો હતો.