હર ઘર તિરંગા / 15મી ઓગસ્ટે એક કરોડની સામે 1.40 કરોડ ગુજરાતીઓએ લહેરાવ્યો તિરંગોઃ જીતુ વાઘાણી

• હર ઘર તિરંગા અભિયાનને ગુજરાતમાં વ્યાપક પ્રતિસાદ મળ્યો :જીતુ વાઘાણી
• કેબિનેટ બેઠકમાં વડાપ્રધાનને અભિનંદન આપતો આભાર પ્રસ્તાવ પસાર કરાયો
• રાજ્યમાં યોજાઇ ૨,૪૦૦થી વધુ તિરંગા યાત્રા 

આઝાદીના અમૃત મહોત્સવને પગલે દેશભરમાં સ્વાતંત્ર્ય પર્વની શાનદાર ઉજવણી કરવામાં આવી હતી. આ રાષ્ટ્રીય પર્વની ઉજવણીને લઈને રાજ્ય સરકારના પ્રવક્તા જીતુ વાઘાણીએ જણાવ્યું છે કે, તા. ૧૫મી ઓગસ્ટ, ૧૯૪૭ના રોજ ભારતની આઝાદી સમયે જોવા મળેલો રાષ્ટ્ર ભક્તિનો જુસ્સો આજે ૭૫ વર્ષ બાદ આઝાદીના અમૃત મહોત્સવ પ્રસંગે ‘હર ઘર તિરંગા’ અભિયાન થકી ગુજરાત સહિત દેશભરમાં જોવા મળ્યો હતો. તે બદલ મુખ્યમંત્રી ભૂપેન્દ્ર પટેલના અધ્યક્ષસ્થાને કેબિનેટ બેઠકમાં વડાપ્રધાન નરેન્દ્ર મોદીને અભિનંદન આપતો આભાર પ્રસ્તાવ પસાર કરાયો છે.

૧.૪૦ કરોડ તિરંગા લહેરાવીને ગુજરાતે રાષ્ટ્ર ભક્તિમાં નવો કીર્તિમાન સ્થાપિત કર્યો 

વડાપ્રધાન નરેન્દ્ર મોદીની પ્રેરણાથી શરૂ થયેલાં હર ઘર તિરંગા અભિયાનને ગુજરાતમાં વ્યાપક પ્રતિસાદ મળ્યો છે. રાજ્યમાં એક કરોડના લક્ષ્યાંકની સામે ૧.૪૦ કરોડ તિરંગા લહેરાવીને ગુજરાતે રાષ્ટ્ર ભક્તિમાં નવો કીર્તિમાન સ્થાપિત કર્યો છે તે બદલ પ્રવક્તા મંત્રીએ લોકોનો આભાર માન્યો હતો. આ અવસરે હર ઘર તિરંગા અભિયાનની વિગતો આપતાં જીતુ વાઘાણીએ જણાવ્યું હતું કે, રાજ્યના તમામ ૩૩ જિલ્લાઓના તમામ ગામ-શહેરો અને નગર-મહાનગરોમાં સરકારી-ખાનગી કચેરીઓ, વિવિધ સંસ્થાઓ, વિવિધ ધાર્મિકસ્થાનો, ઐતિહાસિક ઈમારતો, શાળા-કોલેજો, નાના-મોટા ઉદ્યોગગૃહો, મુખ્ય જળાશયો, જંગલ, દરિયાઈ વિસ્તાર, રણ વિસ્તાર, પર્વત વિસ્તાર, માર્કેટ, ઝુંપડું કે મકાન તમામ વિસ્તારોમાં તિરંગા લહેરાવવામાં આવ્યા હતા અને દેશપ્રેમના અદ્વિતીય વાતાવરણનું નિર્માણ કરવામાં આવ્યું હતું.

૨,૪૦૦થી વધુ તિરંગા યાત્રાઑ યોજાઇ

આઝાદીના અમૃત મહોત્સવ નિમિતે રાજ્યના તમામ જિલ્લાઓ સહીત ૨,૪૦૦થી વધુ તિરંગા યાત્રાઓનું આયોજન થયું હતું. જેમાં નાગરિકો ઉત્સાહભેર જોડાયા હતા. આ ઉપરાંત રાજ્યભરમાં હર ઘર તિરંગા કાર્યક્રમ અંતર્ગત ગ્રામસભાઓ, સંકલ્પ પત્રનું વાંચન, શાળામાં વિવિધ સ્પર્ધાઓ, પ્રભાતફેરીનું આયોજન કરવામાં આવ્યું હતું, જેમાં બહોળી સંખ્યામાં લોકોએ ભાગ લઈને રાષ્ટ્રભક્તિના ગગનભેદી નારા લગાવ્યા હતા.