BIG NEWS / ઓમિક્રૉન વેરિયન્ટ વિકરાળ બન્યો: બ્રિટન અને અમેરિકાના ધ્રુજાવી તેવા આંકડા

• બ્રિટન અને અમેરિકામાં ઓમિક્રોનના પગલે કોરોનાની સ્થિતિ વધુને વધુ વિકરાળ
• બ્રિટનમાં એક જ દિવસમાં કોરોનાના રેકોર્ડબ્રેક ૧.૧૯ લાખથી વધુ નવા કેસ
• યુએસમાં છેલ્લા ૨૪ કલાકમાં જ કોરોનાના બે લાખ નવા કેસ સામે આવ્યા 

ઓમિક્રૉન વેરિયન્ટ હવે ટોપ ગિયરમાં 
દુનિયાભરમાં કોરોના વાઈરસનો નવો વેરિઅન્ટ ઓમિક્રોન ભારે કહેર મચાવી રહ્યો છે અને મોટાભાગના દેશોને પોતાની ઝપટમાં લઈ લીધા છે. બ્રિટન, અમેરિકા, યુરોપના તમામ દેશો, ઈઝરાયલ વગેરે દેશોમાં ઓમિક્રોન કેસની રીતસર સુનામી જોવા મળી છે. એમાંય બ્રિટન અને અમેરિકામાં ઓમિક્રોનના પગલે કોરોનાની સ્થિતિ વધુને વધુ વિકરાળ બનતી જાય છે. છેલ્લા ૨૪ કલાકમાં બ્રિટનમાં કોરોનાના રેકોર્ડબ્રેક ૧,૧૯,૭૮૯ નવા કેસ નોંધાતા ખળભળાટ મચી ગયો છે. આમ યુકેમાં ૪૮ કલાકમાં જ સવા બે લાખથી વધુ નવા કેસ નોંધાયા છે અને અત્યારે યુકેમાં એક્ટિવ કેસની સંખ્યા ૧૬.૫૦ લાખથી વધી ગઈ છે. 

૨૮ દિવસમાં યુકેમાં ૧૪૭ સંક્રમિતોના મોત થયાં છે. ઓમિક્રોનના કારણે દુનિયામાં ૨૦થી વધુ લોકોએ જીવ ગુમાવ્યા છે, જેમાં બ્રિટનમાં ૧૮, અમેરિકામાં એક અને ઈઝરાયલના એક મોતનો સમાવેશ થાય છે.

ધ્રુજાવી દે તેવા આંકડા સામે આવ્યા 
દુનિયાના બે વિકસિત દેશ અમેરિકા અને બ્રિટન સહિત યુરોપમાં ધ્રુજાવી દે એવા કોરોનાના આંકડા સતત સામે આવી રહ્યા છે. યુએસમાં છેલ્લા ૨૪ કલાકમાં જ કોરોનાના બે લાખ નવા કેસ સામે આવ્યા છે અને છેલ્લા ૭૨ કલાકમાં કોરોનાના છ લાખથી વધુ નવા કેસ નોંધાયા છે.

ઓમિક્રોનના ૭૩ ટકાથી વધુ કેસ અમેરિકામાં 
ફ્રાન્સની વાત કરીએ તો છેલ્લા ૨૪ કલાકમાં કોરોનાના રોકોર્ડબ્રેક ૯૧,૦૦૦ નવા કેસ નોંધાયા છે. જ્યારે સ્પેનમાં છેલ્લા ૨૪ કલાકમાં ૭૨,૦૦૦ અને ઈટાલીમાં ૪૪,૦૦૦થી વધુ નવા કેસ નોંધાયા છે.
એક રિપોર્ટ અનુસાર, બ્રિટનમાં કોવિડ-૧૯ના કેસમાં એક સપ્તાહમાં ૬૦ ટકાનો જંગી ઉછાળો જોવા મળ્યો છે. એક અનુમાન અનુસાર, જાન્યુઆરીથી માર્ચ દરમિયાન અમેરિકામાં ઓમિક્રોનના ૧૪ કરોડ કેસ સામે આવી શકે છે. જોકે, તેના લક્ષણો ગંભીર નહીં હોય. અત્યારે પણ ઓમિક્રોનના ૭૩ ટકાથી વધુ કેસ અમેરિકામાં નોંધાઈ ચૂક્યા છે. વોશિંગ્ટન યુનિવર્સિટીના હેલ્થ મેટ્રિક્સ એન્ડ ઈવેલ્યુએશન ઈન્સ્ટિય્ૂટના નવા મોડલ અનુસાર, આગામી બે મહિનામાં દુનિયાભરમાં કોરોના સંક્રમણના ત્રણ અબજ કેસ સામે આવી શકે છે અને તેનું પીક જાન્યુઆરીના મધ્યમાં જોવા મળશે. સંશોધકોનું અનુમાન છે કે ઓમિક્રોનના કારણે લોકોનો હોસ્પિટલમાં દાખલ થવાનો દર ૯૦થી ૯૬ ટકા ઓછો રહેશે અને સંક્રમણનો મૃત્યુદર પણ ૯૭થી ૯૯ ટકા ઓછો રહેશે.