ચિંતા / સરકાર તાત્કાલિક લે પગલા! IMAએ કહ્યું- જો આ કામ ન થયું તો ત્રીજી લહેરની ભયંકર સ્થિતિ માટે રહેવું પડશે તૈયાર

• ઓમિક્રોનની દહેશત વચ્ચે આવ્યા ચિંતાજનક સમાચાર
• IMAએ સરકારને બૂસ્ટર ડોઝ માટે કરી અપીલ
• કહ્યું- જો તાત્કાલિક પગલા ન લીધા તો ત્રીજી લહેર નક્કી

IMAએ આ માગણી કરી છે કે, સરકાર 12-18 ઉંમરના બાળકો માટે રસીકરણ પ્રસ્તાવ પર ઝડપથી વિચાર કરે, દેશમાં ઓમિક્રોનના 23  કેસ નોંધાઈ ચૂક્યા છે, ત્યારે સરકારને તાબડતોબ એક્શન લેવા માટે અપીલ કરી છે.

 IMAના દાવાએ વધાર્યું ટેન્શન

ઈન્ડિયન મેડિકલ એસોસિએશન દ્વારા કહેવામાં આવ્યું છે કે, ભારતના મુખ્ય રાજ્યોમાં વાયરસના નવા વેરિયન્ટના કેસ નોંધાઈ ચૂક્યા છે અને આગામી દિવસોમાં ચિંતાજનક રીતે તે વધવાની આશંકા છે. IMAએ દાવો કર્યો છે કે, ઉલબ્ધ વૈજ્ઞાનિક તથ્યો અને તેની ઉત્પત્તિ વાળા રાષ્ટ્રોના અનુભવથઈ ખબર પડે છે કે, ઓમિક્રોન ખૂબ જ ઝડપથી ફેલાયો છે અને મોટી સંખ્યામાં લોકો તેની ઝપેટમાં આવી શકે છે. 

જો સાવચેત ન રહ્યા તો ત્રીજી લહેરનો કરવો પડી શકે છે સામનો 

 IMAએ કહ્યું કે, આ સમયગાળામાં જ્યારે ભારત સામાન્ય સ્થિતિ તરફ આગળ વધી રહ્યું છે ત્યારે આ મોટા ઝટકા તરીકે સાબિત થઈ શકે છે. જો આપણે પર્યાપ્ત ઉપાય નહીં કરીએ તો આપણે મહામારીની ભયંકર ત્રીજી લહેરનો સામનો પણ કરવો પડી શકે છે.  IMAએ આ સ્થિતિના અણસારને જોતા આરોગ્ય કર્મીઓ, ફ્રન્ટલાઈન વર્કર્સ અને ઓછી રોગ પ્રતિકાત્મક શક્તિ ધરાવતા લોકોને કોવિડ રસીનો બુસ્ટર ડોઝ આપવા માટેની ભલામણ કરી છે.

બૂસ્ટર ડોઝને લઈને ભારતમાં ચાલી રહી છે ચર્ચા

જણાવી દઈએ કે બૂસ્ટર ડોઝને લઈને સોમવારે નેશનલ ટેકનિકલ એડવાઈઝરી ગ્રુપ (NTAGI)ની બેઠકમાં કોઈ નિર્ણય લેવામાં આવ્યો નથી. NTAGI એ Omicron સંબંધિત ડેટાનું મૂલ્યાંકન કર્યું છે, જે દર્શાવે છે કે દેશમાં કોરોના સંક્રમણનું જોખમ ઘણું વધારે છે. જો કે, કેટલાક નિષ્ણાતો માને છે કે સૌ પ્રથમ આરોગ્ય કર્મચારીઓને બૂસ્ટર ડોઝ આપવો જોઈએ. નિષ્ણાતો કહે છે કે ફ્રન્ટ લાઇન વર્કર્સ સાથે, વૃદ્ધોને પણ બૂસ્ટર ડોઝ આપવો જોઈએ, જેમને પ્રથમ રસી આપવામાં આવી હતી. આ બધા લોકોને રસી મળ્યાને લાંબો સમય થઈ ગયો છે અને તેઓને ચેપ લાગવાની શક્યતા વધુ છે. એક અધિકારીએ કહ્યું, "NTAGI આ મુદ્દે વિશ્વ આરોગ્ય સંસ્થાના માર્ગદર્શિકાની રાહ જોઈ રહ્યું છે, ત્યાર બાદ જ બૂસ્ટર ડોઝ અંગે નિર્ણય લેવામાં આવશે."