દેશમાં રોજના 1.5 લાખથી વધારે કોરોના કેસ નોંધાઈ રહ્યા છે અને ઓમિક્રોનના ઑફિશિયલી 4461 કેસ નોંધાઈ ચૂક્યા છે ત્યારે ઓમીક્રોનની રસી આવી જશે એવા રાહતના સમાચાર મળી રહ્યા છે.
ઓમિક્રોનના કારણે દુનિયાભરમાં મચ્યો હાહાકાર
અલગથી બની રહી છે વેક્સિન
માર્ચ સુધીમાં બનીને તૈયાર થઈ જશે
કોવિડ-19 ના કેસ દેશમાં વધી રહ્યા છે અને પ્રતિદિન 1.5 લાખથી વધારે કેસ નોંધાઈ રહ્યા છે ત્યારે કોરોનાનાં નવા વેરિયન્ટ ઓમિક્રોનથી બધા પરેશાન છે. કોરોના સંક્રમણ ભારત સહિત વિશ્વના તમામ દેશોમાં ઝડપથી ફેલાઈ રહ્યું છે. તેના જોખમને ધ્યાનમાં રાખતાં, ઘણા દેશોમાં રસીના બૂસ્ટર ડોઝ પણ આપવામાં આવી રહ્યા છે. ભારતમાં પણ ફ્રન્ટ લાઇન વર્કર્સ અને જરૂરિયાત ધરાવતા વૃદ્ધોને બુસ્ટર ડોઝ આપવાની પ્રક્રિયા શરૂ થઈ ગઇ છે.
ઓમીક્રોન માટે અલગથી બની રહી છે રસી
ઓમિક્રોનના સંક્રમણને રોકવાના હેતુથી તૈયાર કરવામાં આવી રહેલી રસી માટે પણ કામ ચાલી રહ્યું છે. વેટરન ફાર્મા કંપની ફાઈઝરને આશા છે કે ઓમિક્રોન વેરિઅન્ટને લક્ષ્ય બનાવતી કોવિડ-19 ના ઓમીક્રોન વેરિયન્ટની રસી માર્ચમાં તૈયાર થઈ જશે. કંપનીના વડાએ સોમવારે આ માહિતી આપી.
માર્ચમાં તૈયાર થઈ જશે વેક્સિન
કંપનીના વડા બોરલાએ કહ્યું હતું કે "આ રસી માર્ચમાં તૈયાર થઈ જશે. જો કે મને ખબર નથી કે અમને તેની જરૂર પડશે કે નહીં. મને ખબર નથી કે બાદમાં તેનો ઉપયોગ કેવી રીતે કરવામાં આવશે"
બેક થ્રુ ઇન્ફેકશન સામે પણ રક્ષણ
ફાઈઝરના સીઈઓએ જણાવ્યું હતું કે વેક્સીનના બે ડોઝ અને એક બૂસ્ટર ડોઝની હાલની સિસ્ટમ ઓમિક્રોનથી ગંભીર સ્વાસ્થ્ય અસરો સામે "જરૂરી તમામ" રક્ષણ પૂરું પાડે છે. જો કે, એક રસી જે ઓમિક્રોન વેરિઅન્ટને સીધું લક્ષ્ય બનાવે છે તે સ્ટ્રેઇનનાં બેક થ્રુ ઇન્ફેકશન સામે પણ રક્ષણ આપશે.
મોડર્નાના સીઇઓનું નિવેદન
એક અલગ ઇન્ટરવ્યુમાં, મોડર્નાના સીઇઓ સ્ટીફન બન્સેલએ જણાવ્યું હતું કે કંપની એક બૂસ્ટર વિકસાવી રહી છે જે ઓમિક્રોન અને અન્ય ઉભરતા સ્ટ્રેઇનનો સામનો કરી શકે છે. તેમણે કહ્યું હતું કે તેઓ સંભવિત બૂસ્ટર માટે વિશ્વભરના આરોગ્ય ક્ષેત્રના અનુભવીઓ સાથે વાત કરી રહ્યા છે.
ભારતમાં કોરોનાની સ્થિતિ
દેશમાં છેલ્લા 24 કલાકમાં 1 લાખ 68 હજાર 63 નવા કેસ નોંધાયા છે જ્યારે 277 લોકોના મોત થયા છે. ગઈકાલની સરખામણીમાં આજે કોરોનાના નવા કેસોમાં 6.4 ટકાનો ઘટાડો નોંધાયો છે. સોમવારે 1 લાખ 79 હજાર નવા કેસ નોંધાયા હતા.