મહામારી / ભારતમાં હવે ઓમિક્રોનનું સ્થાનિક સંક્રમણ શરુ થયું, સ્વાસ્થ્ય મંત્રાલયની સંસ્થા INSACOGની મોટી ચેતવણી

• સ્વાસ્થ્ય મંત્રાલયની સંસ્થા INSACOGની ચેતવણી
• ભારતમાં હવે ઓમિક્રોનનો કમ્યુનિટી સ્પ્રેડ શરુ થયો
• દેશમા નવા કેસોમાં ઝડપ આવી 

ઓમિક્રોન વેરિયન્ટને લઈને સૌથી મોટા સમાચાર આવ્યાં છે. આખરે જેની રાહ જોતા હવે તે ભય સાચો પડ્યો છે. ભારતમાં હવે ઓમિક્રોન સ્થાનિક સ્તરેથી ફેલાવા લાગ્યો છે. કેન્દ્રીય સ્વાસ્થ્ય મંત્રાલયની હેઠળની સંસ્થા INSACOGએ તેના એક લેટેસ્ટ બુલેટિનમાં એવું જણાવ્યું છે કે ભારતમાં હવે ઓમિક્રોનનો કમ્યુનિટી સ્પ્રેડ (સ્થાનિક સંક્રમણ) શરુ થયો છે. સંસ્થાએ કહ્યું કે દેશના ઘણા મહાનગરોમાં ઓમિક્રોન ઝડપથી ફેલાઈ રહ્યો છે અને નવા કેસમાં ઝડપી વધારો આવી રહ્યો છે. 

7 અઠવાડિયાની અંદર ઓમિક્રોન કમ્યુનિટી ટ્રાન્સમિશનની સ્થિતિમાં પહોંચ્યો 

સંસ્થા્એ કહ્યું કે ઓમિક્રોનનો સબ વેરિયન્ટ  BA.2 દેશમાં ઘણી જગ્યાએ મળ્યો છે. ભારતમાં ઓમિક્રોનનો પહેલો કેસ 2 ડિસેમ્બરે કન્ફર્મ થયો હતો અને 7 અઠવાડિયાની અંદર તે કમ્યુનિટી ટ્રાન્સમિશનની સ્થિતિમાં પહોંચી ગયો. ઓમિક્રોનની આટલી ઝડપી રફતાર ફક્ત ભારતમાં નહીં પણ આખી દુનિયામાં જોવા  મળી છે. ઓમિક્રોને તો ડેલ્ટા વેરિયન્ટને પણ પાછળ રાખી દીધો છે. 

ભારતમાં હવે ઓમિક્રોન સ્થાનિક સ્તરેથી ફેલાવા લાગ્યો 
સંસ્થાએ કહ્યું કે  ઓમિક્રોનનો મોટાભાગના કેસ લક્ષણો વગરના છે તેમ છતાં પણ તેનું જોખમ વધી રહ્યું છે અને હવે તે સ્થાનિક સ્તરેથી ફેલાવા લાગ્યો છે. 

ક્યારેક પીક આવશે
નિષ્ણાંતોના જણાવ્યાનુસાર ભારતમાં હવે ઓમિક્રોનનું સ્થાનિક સંક્રમણ શરુ થયું છે અને આગામી થોડા દિવસોમાં તે પીક પર પહોંચી જશે અને માર્ચ મહિનામાંથી કોરોના વિદાય થઈ જશે. 

Omicron is now in community transmission stage in India and has become dominant in multiple metros: INSACOG pic.twitter.com/AURS2eu66R

— ANI (@ANI) January 23, 2022

કોરોના નથી આવી રહ્યો કાબૂમાં 
ભારતમાં કોરોના વાયરસની ખતરનાક ત્રીજી લહેરમાં દરરોજ કોરોના વાયરસના કેસ સતત વધી રહ્યા છે. છેલ્લા 24 કલાકમાં ભારતમાં કોરોના વાયરસના નવા ત્રણ લાખ 33 હજાર કેસ નોંધાય છે જ્યારે 533 દર્દીઓ વાયરસ સામેની લડાઈ હારી ગયા અને જીવ ગુમાવ્યો છે. 

સતત વધી રહ્યા છે કેસ 
ભારતમાં ચિંતાની બાબત છે કે પોઝિટીવીટી રેટ વધીને 17.78 પર પહોંચી ગયો છે અને એક્ટિવ કેસની સંખ્યા 21 લાખ 87 હજારને પાર જતી રહી છે. સ્વાસ્થ્ય મંત્રાલય દ્વારા આપવામાં આવેલ આંકડાઓ અનુસાર 2 લાખ 59 હજાર દર્દીઓ સાજા પણ થયા છે. 

નવા વેરિયન્ટથી ખળભળાટ 
દેશ અને દુનિયામાં કોરોના વાયરસના વધતાં કેસ ફરી એક વાર ચિંતાનો વિષય બન્યા છે, કેટલાક વૈજ્ઞાનિકો માને છે કે હજુ તો ઓમિક્રૉન બાદ અનેક વેરિયન્ટ સામે આવવાના છે ત્યારે ઓમિક્રૉનમાંથી જ ઉત્પન્ન થયેલા વેરિયન્ટને કારણે ટેન્શન વધે તેવા સમાચાર સામે આવી રહ્યા છે. બ્રિટનમાં ઓમિક્રૉનની વંશાવલીનો નવો વેરિયન્ટ ઓમિક્રૉન BA.2 સામે આવ્યો છે જેના કારણે તંત્ર દોડતું થઈ ગયું છે. હાલમાં સ્વાસ્થ્ય તંત્ર દ્વારા નવા વેરિયન્ટની તપાસ અને રિસર્ચ શરૂ કરી દેવામાં આવ્યું છે અને જાણકારી અનુસાર ભારત સહિત આ વેરિયન્ટ દુનિયાના 40 દેશોમાં પહોંચી ગયો છે અને ઓમિક્રૉનની તુલનામાં આ નવા વેરિયન્ટથી સંક્રમણ વધુ તેજીથી ફેલાઈ રહ્યું છે.