પરીક્ષા આપનાર પિતાએ પરિવાર ચલાવવા માટે નોકરી કરવાની મજબૂરીને કારણે ધોરણ 7 માં ભણવાનું છોડી દીધું હતું
પૂણેમાં પિતા-પુત્રએ સાથે પરીક્ષા આપી
ધો.10ની બૉર્ડની પરીક્ષામાં પિતા પાસ-પુત્ર નાપાસ
હવે પુત્રને પાસ કરવામાં મદદ કરશે તેના પિતા
તાજેતરમાં મહારાષ્ટ્ર બોર્ડનું પરિણામ જાહેર થયું છે. મહારાષ્ટ્રના પુણેમાંથી એક રસપ્રદ કિસ્સો સામે આવ્યો છે. જ્યાં 43 વર્ષીય પિતા અને તેના પુત્રએ સાથે મળીને 10ની પરીક્ષા આપી હતી. આમાં પિતા પાસ થયા, પરંતુ પુત્ર સફળ ન થઈ શક્યો.
મહારાષ્ટ્ર સ્ટેટ બોર્ડ ઓફ સેકન્ડરી એન્ડ હાયર સેકન્ડરી એજ્યુકેશન દ્વારા લેવાયેલ ધોરણ 10નું પરિણામ શુક્રવારે જાહેર કરવામાં આવ્યું હતું. જેમાં પિતા-પુત્રએ સાથે પરીક્ષા આપી હતી. પરીક્ષા આપનાર ભાસ્કર વાઘમારેએ પરિવાર ચલાવવા માટે નોકરી કરવાની મજબૂરીને કારણે ધોરણ 7 માં ભણવાનું છોડી દીધું હતું અને તે ફરીથી અભ્યાસ શરૂ કરવા માટે ખૂબ જ ઉત્સાહિત હતા. જેથી 30 વર્ષના ગાળા બાદ આ વર્ષે તેણે પુત્ર સાથે પરીક્ષા આપી.
પિતા-પુત્રએ સાથે પરીક્ષા આપી
પુણે શહેરના બાબાસાહેબ આંબેડકર વિસ્તારમાં રહેતા વાઘમારે ખાનગી ક્ષેત્રમાં નોકરી કરે છે. તેમણે મીડિયાને કહ્યું, 'હું હંમેશાથી વધુ અભ્યાસ કરવા માંગતો હતો, પરંતુ પારિવારિક જવાબદારીઓને કારણે તે પહેલા કરી શક્યો નહીં.' વાઘમારેએ કહ્યું, “કેટલાક સમયથી હું મારો અભ્યાસ ફરીથી શરૂ કરવા અને કોઈ કોર્સ કરવા આતુર હતો જે મને વધુ કમાવામાં મદદ કરશે. તેથી મેં ધોરણ 10ની પરીક્ષા આપવાનું નક્કી કર્યું. મારો પુત્ર પણ આ વર્ષે પરીક્ષા આપી રહ્યો હતો અને તેનાથી મને મદદ મળી.
હવે પુત્રને પાસ કરવામાં મદદ કરશે તેના પિતા
વાઘમારેએ જણાવ્યું હતું કે, તેઓ દરરોજ અભ્યાસ કરતા હતા અને કામ કર્યા પછી પરીક્ષાની તૈયારી શરૂ કરતા હતા. જો કે, હવે તે પરીક્ષા પાસ કરીને ખુશ છે. પરંતુ તેમનો દીકરો બે વિષયમાં નાપાસ થયો હોવાનું તેને દુઃખ છે. વાઘમારેએ કહ્યું, "હું મારા પુત્રને પૂરક પરીક્ષામાં મદદ કરીશ મને ખાતરી છે કે તે આ પરીક્ષા પાસ કરશે.