ઓલિમ્પિક વિલેજમાંથી મોટીવેશનલ સ્ટોરી તો દરરોજ આવતી હોય છે. પરંતુ ગઈ કાલે એક લવ સ્ટોરી પણ સામે આવી હતી જેમાં ખેલાડી રમત તો હારી ગઈ પરંતુ દિલની બાજી જીતી ગઈ હતી.
ટોક્યો ઓલિમ્પિકમાં એક રસપ્રદ કિસ્સો બન્યો છે જેને જગતભરના મીડિયાનું ધ્યાન ખેંચ્યું હતું. આ ખેલાડી આર્જેન્ટિનની મહિલા તલવારબાજીની ખેલાડી છે. તેણીનું નામ છે મારિયા બેલેન મોરિસ.
પહેલા જ રાઉન્ડમાં પરાજય
ઓલિમ્પિકની મહિલા તલવારબાજીના પહેલા જ રાઉન્ડમાં આર્જેન્ટિનાની મહિલા ખેલાડી મારિયા બેલેન પેરેજ મોરિસનો પરાજય થયો હતો. આ પરાજ્યના કારણે તે ખૂબ નિરાશ થઈ હતી. આ તેની અને અનેક દેશવાસીઓની અપેક્ષાથી તદ્દન વિપરીત ઘટના હતી માટે પરાજય પચાવવો મુશ્કેલ હતો.
પોતાના જ કોચે કર્યુ પ્રપોઝ
પરાજય પામેલી ખેલાડી મારિયા નિરાશ હતી અને પત્રકારોને સંબોધન કરી રહી હતી એ દરમિયાન એવી ઘટના બની હતી કે તેના ગમગીન ચહેરા પર ખુશીનું મોજું ફરી વળ્યું હતું. મારીયાના કોચે તેણીને લગ્ન માટે પ્રપોઝ કરી દીધું હતું અને બાદમાં તેણે આ પ્રેમ પ્રસ્તાવનો સહર્ષ સ્વીકાર કર્યો હતો. કોચ લુકાસે ઘૂંટણીયે બેસીને મારીયાને પ્રપોઝ કર્યું હતું. જ્યારે મારિયા પત્રકારો સાથે ભાવુક થઈને વાત કરી રહી હતી ત્યારે લુકાસ પાછળ ઊભા હતા અને તેમના હાથમાં એક કાર્ડ હતું. જ્યારે મારિયાએ પાછળ ફરીને જોયું તો કોચ લુકાસ પ્રેમ પ્રસ્તાવ લઈને ઊભા હતા. એક પળ માટે તો અચંભીત થઈ ગયેલી મારિયા બાદમાં ખુશીથી જૂમી ઉઠી હતી અને લુકાસને ભેટી પડી હતી
Y después del combate de esgrima le pidieron casamiento a María Belén Pérez Maurice en vivo. pic.twitter.com/wEmGuOW7CB
17 વર્ષથી હતા રિલેશનશીપમાં
અત્રે ઉલ્લેખનીય છે કે કોચ લુકાસ છેલ્લા 17 વર્ષથી રિલેશનશીપમાં છે. કોચ લુકાસે 2010 માં થયેલી વર્લ્ડ ચેમ્પિયનશીપ દરમિયાન પણ મારીયાને પ્રપોઝ કર્યું હતું પરંતુ મારિયાએ ત્યારે પોતે લગ્ન માટે ખૂબ નાંની હોવાનું કહીને લુકાસનાં પ્રસ્તાવને નકારી દીધો હતો અને હવે ટોક્યો ઓલિમ્પિકમાં ફરી લૂકસે પ્રપોઝ કરતાં તેણે સરાજાહેર આ પ્રસ્તાવનો સ્વીકાર કર્યો હતો.
વતન પાછા જઈને સેલિબ્રેટ કરીશું
મારિયાએ કહ્યું હતું કે આ પ્રપોઝલથી તે સ્તબ્ધ થઈ ગઇ હતી પણ આ પ્રકારના જાહેર પ્રપોઝલથી તે ખુશ થઈ ગઈ હતી. અમે ઘણાં લાંબા સમયથી સાથે છીએ અને હવે આર્જેન્ટિના જઈને સાથે સેલિબ્રેટ કરીશું.
જો કે કોરોના ગાઈડલાઇન્સનાં કારણે તેઓ તુરંત આર્જેન્ટિના નહીં જઈ શકે પણ નિયંત્રણો હળવા થયા બાદ થોડા સમય પછી વતન જઈને જીવનની નવી ઇનિંગનો પ્રારંભ કરશે.