માનવતા / રાજકોટના સાથી સેવા ગ્રુપે ઘરમાં બંધ વૃદ્ધાને લોક તોડીને છોડાવ્યા, વૃદ્ધાએ રડતા રડતા કહ્યું- 'જમવાનું માંગતી તો મારતા પછી મને પુરી દીધી'

• રાજકોટમાં સાથી સેવા ગૃપના જલ્પા પટેલે એક વૃદ્વને છોડાવ્યા 
• 2 અઠવાડિયાથી ઘરમાં બંધક બનાવેલા વૃદ્વને છોડાવ્યા 
• આકાશવાણી ચોક પાસેના આવાસ યોજનાના મકાનમાંથી વૃદ્વને છોડાવ્યા

રાજકોટ શહેરમાંથી અત્યાર સુધીમાં અનેક બંધક લોકોને સાથી સેવા ગ્રુપ દ્વારા છોડાવવામાં આવ્યા છે. ત્યારે ગુરૂવારે સેવા સાથી ગ્રુપ અને મહિલા પોલીસે સાથે મળીને આવાસ યોજનાના મકાનમાં બંધ વૃદ્ધાને છોડાવ્યા હતા. વૃદ્ધાના જણાવ્યા અનુસાર, તેમને છેલ્લા 2 અઠવાડિયાથી મકાનમાં પુરી દેવાયા હતા. આ રીતે અગાઉ પણ પુરી દેવાયા હતા. જેને સાથી સેવા ગ્રુપે છોડાવ્યા હતા. આ દરમિયાન વૃદ્ધા દયનીય હાલતમાં જોવા મળ્યા હતા. આનો એક વીડિયો પણ સામે આવ્યો છે.

વૃદ્ધાને માથા અને પગ પર માર મારવામાં આવ્યો, ગરમ પાણી છાંટીને દઝાડ્યા!

વીડિયોમાં વૃદ્ધા સાથી સેવા ગ્રુપના જલ્પા પટેલના કેટલાક સવાલોના જવાબ આપે છે. જેમાં વૃદ્ધા રડતા રડતા જણાવે છે કે, તેમના નણંદ અને દેરાણીએ તેમને બંધ બનાવ્યા હતા. એવું પણ કહે છે કે, દેરાણી દ્વારા માથામાં અને પગમાં માર મારવામાં આવ્યો હતો. કામ ન કરતા ગરમ પાણી છાંટીને દઝાડવામાં પણ આવ્યા હતા. કોઇ ભાળે નહીં તે માટે કબાટ મૂકીને પુરી દીધા હતા. વૃદ્ધાએ જણાવ્યું હતું કે, ઘરે જમવાનું નહોતા આપતા તો ઘરે ઘરે માંગવા જતી હતી, જેથી મને ઘરવાળા મારતા હતા. પછી મને આ ઘરમાં બંધ કરીને વયા ગયા, હું 2 અઠવાડિયાથી પુરાયેલી હતી. કામ ન કરતી એટલે અને જમવાનું માગતી એટલે મારતા અને પુરી દીધી હતી.

કબાટ આડો રાખીને કાળ કોઠરીમાં હોય તેવી રીતે પુરી રાખવામાં આવ્યા હતાઃ જલ્પા પટેલ

સાથી સેવા ગ્રુપના જલ્પા પટેલે જણાવ્યું હતું કે, સાથી સેવા ગ્રુપમાં અલગ અલગ નંબર પરથી વારંવાર પાડોશીઓના ફોન આવ્યા હતા. પાડોશીએ અમને આ અંગે જાણ કરી હતી. ત્યારબાદ અમને મામલો ગંભીર લાગતા તપાસ કરી હતી. તપાસ કરતા જાણ થઇ કે, એક વૃદ્ધા બંધક છે, તે બહેન ઘણા સમયથી ઘરમાં પુરાયેલા છે. ત્યારબાદ મહિલા પોલીસ અને પત્રકારોના સહયોગથી સ્થળ પર તપાસ કરવામાં આવી હતી. ઘર પર પહોંચ્યા જ્યાં મેઇન રૂમ લોક હતો. ત્યારબાદ લોક તોડવામાં આવ્યો હતો. રૂમની અંદર માજીને કબાટ આડો રાખીને કાળ કોઠરીમાં હોય તે રીતે પુરવામાં આવ્યા હતા. 

મહત્વનું છે કે, અગાઉ પણ રાજકોટમાં એક ચોંકાવનારી ઘટના સામે આવી હતી. જેમાં કોલેજ સુધીનો અભ્યાસ કરી ચૂકેલા ત્રણ ભાઈ બહેનો 10 વર્ષથી ઘરમાં પુરાયેલા હતા અને તેમની હાલત કોઈ અઘોરી માફક થઈ ચૂકી હતી. ત્યારે જલ્પા પટેલ અને તેમની સંસ્થાએ આ ત્રણેય ભાઈ-બહેનને 10 વર્ષ બાદ ઘર બહાર લાવી સ્વસ્થ જીવન આપ્યું હતું. આ રીતે જ રાજકોટના સાધુ વાસવાણી રોડ પર એક ઘરમાં 25 વર્ષની યુવતી છેલ્લા 6 મહિનાથી એક જ રૂમમાં પૂરાઈ રહી હતી. તો 8 દિવસથી તેણે કંઈ ભોજન પણ લીધુ નહોતું. જેના કારણે તે કોમામા સરી પડી હતી. જે બાદ જલ્પા પટેલે તેને છોડાવી સારવાર માટે હોસ્પિટલ ખસેડી હતી. જોકે આ યુવતીનું સારવાર દરમિયાન મૃત્યુ થયું હતું.