કવાયત / 1000 કર્મચારીઓની હકાલપટ્ટી કરવાની તૈયારીમાં છે OLA, હવે નવા ધંધામાં લગાવશે જોર 

• ઓલા તેમના 1,000 કર્મચારીઓને છૂટા કરવાની તૈયારીમાં 
• કંપનીનું મુખ્ય ધ્યાન હવે ઇલેક્ટ્રિક મોબિલિટી બિઝનેસ પર 
• કંપની કાર મેન્યુફેક્ચરિંગ અને સેલ ડેવલપમેન્ટ માટે 800ને નોકરી રાખશે ? 

એપ આધારિત ટ્રાવેલ એગ્રીગેટર કંપની ઓલા તેના હાલના 1,000 કર્મચારીઓને છૂટા કરવાની તૈયારી કરી રહી છે. અગાઉ એવી માહિતી મળી હતી કે, કંપની 400 થી 500 લોકોને નોકરીમાંથી કાઢી મૂકવાનું વિચારી રહી છે. જોકે હવે તાજેતરના મીડિયા રિપોર્ટ્સ અનુસાર હવે લગભગ 1,000 લોકોને નોકરીમાંથી કાઢી મૂકવામાં આવી શકે છે. જે કર્મચારીઓને નોકરીમાંથી બરતરફ કરવા પડશે તેઓને કંપનીએ પોતાનું રાજીનામું આપી દેવા જણાવ્યું છે.

વાર્ષિક પગાર વધારાની રાહ જોઈ રહ્યા છે કર્મચારી 

મીડિયા રિપોર્ટ્સ અનુસાર હવે લગભગ 1,000 લોકોને નોકરીમાંથી કાઢી મૂકવામાં આવી શકે છે. તેવામાં ઘણા કર્મચારીઓ હજુ પણ વાર્ષિક પગાર વધારાની રાહ જોઈ રહ્યા છે. કંપની એવા કર્મચારીઓના રાજીનામાની રાહ જોઈ રહી છે જેમને નોકરીમાંથી કાઢી મૂકવામાં આવનાર છે. જેના કારણે આ વર્ષનો ઈન્ક્રીમેન્ટ હજુ પણ હોલ્ડ પર છે. 

નવા ધંધામાં લગાવશે જોર 

ઓલામાં પુનઃરચનાનું કામ ચાલી રહ્યું છે જે કદાચ ચાલુ રહેશે. એક તરફ કંપની 1,000 કર્મચારીઓને બરતરફ કરવા જઈ રહી છે, તો બીજી તરફ તે પોતાના ઈલેક્ટ્રિક મોબિલિટી બિઝનેસ માટે લોકોને હાયર કરવામાં વ્યસ્ત છે. કંપનીનું મુખ્ય ધ્યાન હવે ઇલેક્ટ્રિક મોબિલિટી બિઝનેસ પર છે. ઓલા મોબિલિટી, હાઇપરલોકલ, ફિનટેક અને યુઝ્ડ કાર બિઝનેસ માટે લોકોને હાયર કરી રહી છે. ઓલા લિથિયમ-આયન બેટરી સેલ અને ઇલેક્ટ્રિક કાર બનાવવાની પ્રક્રિયામાં છે. કંપની કાર મેન્યુફેક્ચરિંગ અને સેલ ડેવલપમેન્ટ માટે 800 નવા લોકોને હાયર કરવાની યોજના બનાવી રહી છે. 

મોટી સંખ્યામાં સ્ટાર્ટઅપ કંપનીઓએ લોકોને નોકરીમાંથી કાઢી મૂક્યા

તાજેતરના સમયમાં મોટી સંખ્યામાં સ્ટાર્ટઅપ કંપનીઓએ લોકોને નોકરીમાંથી કાઢી મૂક્યા છે. અગાઉ દેશની એડટેક કંપનીઓએ પણ સતત તેમના કર્મચારીઓની છટણી કરી છે. જેમાં ઓનલાઈન લર્નિંગ સર્વિસ ફર્મ બાયજુસએ તેની અલગ-અલગ ગ્રુપ કંપનીઓમાંથી મોટી સંખ્યામાં લોકોને નોકરીમાંથી કાઢી મૂક્યા છે. આ કર્મચારીઓમાં કાયમીથી કોન્ટ્રાક્ટ સુધી કામ કરતા કર્મચારીઓનો સમાવેશ થતો હતો.