આ જાણકારી ઓલા ગ્રુપના સીઈઓ અને ચેરમેન ભાવિશ અગ્રવાલે ટ્વિટર દ્વારા આપી છે. ઓલા ઇલેક્ટ્રિક સ્કૂટર 10 અલગ -અલગ રંગોમાં ઉપલબ્ધ છે. ઈવી મેટ અને ગ્લોસ શેડ્સમાં લોન્ચ થશે, જેમાં બ્લેક અને બ્લૂ, લાલ, ગુલાબી અને યેલ્લો સિવાય વ્હાઈટ અને સિલ્વર શેડમાં લોન્ચ કરવામાં આવશે. ઓલાએ થોડાં સમય પહેલાં સીરિઝ એસ, એસ 1 અને એસ 1 પ્રોનો ટ્રેડમાર્ક હાંસલ કર્યો છે. જે આગામી સ્કૂટરના વેરિઅન્ટ્સના નામ છે.
ઓલા ઇલેક્ટ્રિક સ્કૂટર માટે બુકિંગ થોડાં દિવસો પહેલાં જ શરૂ થયું છે અને કંપનીને 24 કલાકમાં 1 લાખથી વધુ ગ્રાહકો તરફથી ઓર્ડર મળ્યા છે. ઓલાના ઇલેક્ટ્રિક સ્કૂટરમાં રસ ધરાવતા લોકો કંપનીની વેબસાઇટ દ્વારા 499 રૂપિયા ટોકન એમાઉન્ટ ભરીને બુક કરાવી શકે છે. જ્યારે ટૂ-વ્હીલર ઈવી માટે બુકિંગ શરૂ થઈ ચૂક્યું છે, કંપની આગામી થોડા અઠવાડિયામાં તેને ભારતમાં લોન્ચ કરી દેશે. સંભવિત છે કે આ મહિને ભારતમાં તેને લોન્ચ કરાશે. આશ્ચર્યજનક વાત એ છે કે, જાન્યુઆરી અને જૂન 2021ની વચ્ચે ભારતમાં કુલ 30,000 ઈલેક્ટ્રિક ટૂ-વ્હીલર્સ વેચાયા છે, તેમ છતાં કંપનીએ માત્ર 24 કલાકમાં આટલો દમદાર બુકિંગનો આંકડો હાંસલ કર્યો છે.
હાલમાં જે ગ્રાહકોએ ઓલા સ્કૂટર માટે રિઝર્વેશન કરાવ્યું છે, ડિલિવરી શરૂ થાય ત્યારે આ ગ્રાહકોને પ્રાથમિકતા આપવામાં આવશે. સ્કૂટરની સંભવિત રેન્જ 100-150 કિમી છે અને તેમાં અલગ પાડી શકાય તેવી બેટરી, ડિજિટલ ઇન્સ્ટ્રુમેન્ટ કન્સોલ, ક્લાઉડ કનેક્ટિવિટી, એલોય વ્હીલ્સ, ટેલિસ્કોપિક સસ્પેન્શન અને ઘણાં બધાં ફીચર્સ આપવામાં આવ્યા છે. ગયા વખતે જારી કરાયેલા વીડિયોમાં સ્કૂટર સીટની નીચેમોટું સ્ટોરેજ, એક્સેલરેશન અને સેગમેન્ટમાં શ્રેષ્ઠ રેન્જની માહિતી આપવામાં આવી હતી. જોકે, ચોક્કસ ટેક્નિકલ માહિતી હજુ પ્રાપ્ત થઈ નથી.
ઓલાના તમિલનાડુ પ્લાન્ટ ઈન્ડસ્ટ્રીએ 4.0 સ્ટાન્ડર્ડ્સ પૂર્ણ કર્યું છે. અહીં વાર્ષિક 1 કરોડ ઈલેક્ટ્રિક ટૂ-વ્હીલર્સનું ઉત્પાદન કરી શકાય છે. પ્રથમ તબક્કામાં ઉત્પાદન ક્ષમતા 20 લાખ યુનિટ વાર્ષિક હશે. આ પ્લાન્ટમાં 10 એસેમ્બલી લાઇન હશે અને દર સેકન્ડમાં ઇલેક્ટ્રિક સ્કૂટર એસેમ્બલી લાઇનમાંથી બહાર આવશે, જ્યારે દરરોજ 25,000 સ્કૂટરનું ઉત્પાદન કરી શકાશે. ભારતમાં આ સ્કૂટર વેચવા ઉપરાંત યુરોપ, યુકે, લેટિન અમેરિકા, એશિયા પેસિફિક, ઓસ્ટ્રેલિયા અને ન્યૂઝીલેન્ડમાં પણ નિકાસ કરવામાં આવશે.