રાજ્યમાં સિંગતેલના ભાવમાં સતત વધારો થઈ રહ્યો છે, ભાવમાં ઉછળો જોવા મળતા મગફળીનો સ્ટોક કરી દેવામા આવે છે જેથી મગફળી પુરતા પ્રમાણમાં મળતી નથી અને તેલના ભાવમાં ઉછાળો જોવા મળે છે.
મગફળીની આવક ઘટતા તેલના ભાવ વધ્યાં
1500 રુપિયા આપતા પણ સારી મગફળી મળતી નથી
સિંગતેલનો ડબ્બો પહોંચ્ચો રૂ.2800-2850 પર
રાજ્યમાં સિંગતેલના ભાવમાં સતત વધારો જોવા મળી રહ્યો છે. છેલ્લા બે ત્રણ દિવસમા સિંગતેલમાં ફરી વધારો ઝીંકાયો છે. 30 રૂપિયાના ભાવવધારા સાથે સિંગતેલના ડબ્બાનો ભાવ 2800 રૂપિયાએ પહોંચ્યો છે. જ્યારે કપાસિયા તેલમાં 10 રૂપિયાના વધારા સાથે ડબ્બાનો ભાવ 2730 રૂપિયા થયો છે. આમ, સિંગતેલ અને કપાસિયા તેલના ભાવ આસમાને પહોંચ્યા છે. એકબાજુ લગ્નનની સિઝન ચાલી રહી છે એવામાં ખાદ્યતેલમાં ભાવવધારો જનતા માટે માથાના દુ:ખાવો સાબિત થઈ રહ્યો છે. ખાદ્યતેલમાં છેલ્લા ત્રણ દિવસમાં કૃત્રિમ ભાવ વધારો થઈ રહ્યો છે. જેથી મોંઘવારીમાં પિસાતી ગૃહિણીઓનું બજેટ ખોરવાઈ રહ્યું છે. ખાસ કરીને મગફળીના ભાવમા ઉછળો જોવા મળતા મગફળીનો સ્ટોક કરી દેવામા આવે છે જેથી મગફળી પુરતા પ્રમાણમા મળતી નથી અને તેલના ભાવમા ઉછાળો જોવા મળે છે.
'મગફળીની આવક ઓછી છે એટલે સિંગતેલ મોંઘુ બન્યું છે'
રાજકોટના તેલના વેપારી ભાવેશ પોપટે વીટીવી સાથેની વાતચીતમાં જણાવ્યું હતુ કે, મગફળીના ભાવ છેલ્લા દિવસોમા ખાસ્સા વધ્યા છે, સારી મગફળી બજારમા મળતી નથી જેથી સારુ તેલ વેચનારા મિલરો પોતાની મિલ બંધ કરી બેસી ગયા છે. કેમ કે, તેને મગફળીના ઉંચા ભાવ પોશાય તેમ નથી. સારી મગફળી 1500 રુપિયાથી નીચે મળતી નથી. ઉંચાભાવ થતા અમુક લોકોએ મગફળીનો મબલક સ્ટોક કરી લીધો છે. આવનારા દિવસોમા મગફળીના ભાવ હજુ વધી શકે તેમ છે. જેથી કરીને સંગ્રહ કરનારાઓને મગફળીમાં ઉંચા ભાવની લાલચ છે ત્યારે તે લોકો વેચશે એટલે ફરી ગાડી પાટે ચડી જશે પરંતુ મગફળીના ભાવ વઘશે તો તેલ પણ હજુ થોડુ મોંઘુ મળશે. હાલના ભાવમાં વધુ ઉછાળો નહી આવે પરંતુ છે એ ભાવમા નજીવો વધારો જરુર થશે. ટૂંકમા મગફળીની આવક ઓછી છે એટલે સિંગતેલ મોંઘુ બન્યું છે. અન્ય તેલમાં રોજ 20થી25 રુપિયા ઘટાડો જોવા મળે છે પરંતુ સિંગતેલમાં 25-30 રુપિયાનો વધારો જોવા મળે છે.
સિધ્ધો ડિમાન્ડ અને સપ્લાયનો નિયમ લાગુ પડ્યો
ગુજરાત અડિબલ ઓઇલ એન્ડ ઓઇલશિલ્ડ એસોસિએશનના પ્રમુખ સમીર શાહે જણાવ્યું હતુ કે, દર નવેમ્બર-ડિસેમ્બરમાં મગફળીની આવક વધુ હોય છે જે આવક ડિસેમ્બર પછી ઘટતી જાય છે આ ઘણા સમયથી ચાલતી પ્રક્રિયા છે બે મહિના પહેલા મગફળીના ભાવ સારા હતા જે ઝડપથી વેંચાઇ પણ ગઇ હવે મગફળીની આવકમા ઘટાડો નોંધાયો છે. તેની અસર સિંગતેલમા જોવા મળી રહી છે. અહી સિધ્ધો ડિમાન્ડ અને સપ્લાયનો નિયમ લાગુ પડે છે.
નક્કર પગલા લેવામાં આવતા નથી
ઉલ્લેખનીય છે કે, તેલના ભાવ ભડકે બળી રહ્યા છે. છેલ્લા આ કારણે લોકોના ખિસ્સા પર તેની ભારે અસર આવી રહી છે. આમ છતાં આ ભાવને કાબૂમાં કરવા માટે પુરવઠા તંત્ર પાસે કોઇ જ રસ્તો નથી અને માત્ર પ્રાઈઝ મોનિટરિંગ સિસ્ટમ પર નજર રાખી હોવાનું ગાણુ અધિકારીઓ ગાઈ રહ્યા છે. કોઇ નક્કર પગલા લેવામા ન આવતા સંગ્રહખોરો ખેડૂત હોય કે ઓઇલમીલરો કોઇનુ ચેકિંગ થતુ નથી કે કોઇ ચોકકસ ભાવબાંઘણુ થતુ નથી જેનો માર પ્રજાએ સહન કરવા પડે છે.
સસ્તાભાવે લેવાનો પ્રયાસ!
રાજ્યના પુરવઠા વિભાગે ટેકાના ભાવે મગફળી અને કપાસની ખરીદી કરી છે જેના ગોડાઉન ભર્યા છે. આ માલ પર અલગ અલગ ખર્ચ સહિત નાફેડ વેચવા સમયાંતરે પ્રયત્ન કરે છે. જો કે, આ ભાવ ઊંચા પડે છે તેમ કહીને ખરીદી કરાતી નથી અને તેલના ભાવ વધી રહ્યા છે. આ રીતે ભાવ વધારો કરીને નાફેડના ગોડાઉનની મગફળી પણ સસ્તાભાવે લેવાનો પ્રયાસ કરવા ઘણા તત્વોએ પ્રયત્નો શરૂ કરી દીધા છે.