એક તરફ જ્યાં સમાજમાં સંતાન તરીકે દીકરીઓના જન્મ અંગે હજુ પણ રૂઢીચુસ્તપણુ સ્પષ્ટ જણાય છે. ત્યારે આણંદના એક અધિકારીએ નિરાધાર બાળકીને દત્તક લઈને માનવતાની મહેંક ફેલાવી છે. વાસદ આરોગ્ય કેદ્રમાં એક બાળકીનો જન્મ થયો પરંતુ તેની માતાનું મોત નિપજ્યું. પરંતુ આણંદના એક અધિકારીએ આ બાળકીને તરત જ દત્તક લઈને બેટી બચાવોના સૂત્રને જીવી બતાવ્યુ છે.
ગુલાબના ફૂલ જેવી નવજાત બાળકીને કશી ખબર નથી કે તેની સાથે કુદરતે કેવી રમત રમી છે. એક હાથે કુદરતે તેની પાસેથી સગી સગી જનેતા છીનવી લીધી છે તો બીજા હાથે તેને એક પાલક માતા-પિતાને તુરત જ હાજર કરી દીધા છે. એમ કહીયે તો પણ ચાલે કે કુદરતે આ બાળકી પાસેથી એક હાથે છીનવી લીધું છે અને હજાર હાથે આપી પણ દીધું છે. હા આપ ટીવી ક્રીન પર જોઈ રહ્યા છો તે બાળકીનો જન્મ આણંદની સરકારી હોસ્પિટલમાં થયો હતો. પરંતુ કમનસીબી કહો કે કુદરતની ઈચ્છા કહો આ બાળકીને જન્મ આપ્યાના કલાકોમાં જ તેની માતાનું અવસાન થઈ ગયું. બાળકી 14 કલાક સુધી માતાના ધાવણ વિના તરફડતી મારતી રહી. પરંતુ વિધાત્રીએ આ બાળકી માટે કંઈક જુદું જ વિચારી રાખ્યું હતું.
હા તેમને કુદરતી તક મળી છે અને બાળકીને જાણે પાલક માતા પિતા રૂપે નવા આશીર્વાદ મળ્યા છે. બેટી બચાવોના સૂત્રને જીવતું રાખતી અને માનવતાની મિસાલ રજૂ કરતી આ ઘટના જે રીતે આકાર પામી છે તે ઘણી રસપ્રદ છે. વાસદની સરકારી હોસ્પિટલમાં એક બાળકીની માતાનું અવસાન થયુ અને બાળકી નિરાધાર બની. આ સમાચાર સાંભળ્યા તો આણંદ જિલ્લા વિકાસ અધિકારી અમિત પ્રકાશ યાદવ અને તેમના પત્ની ચિત્રા રત્નું બાળકીની મુલાકાત લેવા વાસદ સરકારી હોસ્પિટલ પહોંચી ગયા.
આમ તો તેઓ હોસ્પિટલ બાળકી માટે કોઈ વ્યવસ્થા કરવા આવ્યા હતા. પરંતુ બાળકીને જોતાં જ તેમનું હૃદય દ્રવી ઉઠયું. ચિત્રા રત્નુંના અંતરના ઊંડાણમાં પડેલું માતૃત્વ જાગૃત થયું. તેમણે બાળકીને જોતાં જ તેને છાતી સરસી ચાંપી દીધી. તેમણે જરા પણ વિલંબ કર્યા વગર 14 કલાકથી માતાના ધાવણથી વંચિત નવજાત બાળકીને સ્તનપાન પણ કરાવીને નવજીવન આપ્યું. આપને જણાવી દઈએ કે ચિત્રા રત્નું પોતે આણંદ જિલ્લામાં એડિશન જજ છે.
ડીડીઓ અમિત પ્રકાશ યાદવે જ્યારે નવજાત બાળકીના સગા પિતા સાથે વાત કરી તો જાણવા મળ્યું કે અગાઉ પણ તેમને ત્યાં બે દીકરીઓ જન્મી ચૂકી છે. એ પરિવાર ભરણપોષણ કરવા સક્ષમ નહતો. જેથી અમિત પ્રકાશ યાદવે જરા પણ વિલંબ વિના આ નવજાત બાળકીને દત્તક લઈ લીધી. જેને તેમની પત્ની ચિત્રા રત્નુએ પણ વધાવી લીધી. અને તેનું મહિસાગર નદીના નામ પરથી 'મહી' એવું નામાકરણ પણ કરી દીધું. જિલ્લા વિકાસ અધિકારી અમિત પ્રકાશ યાદવ આ બાબતને કુદરતે આપેલી તક ગણાવી રહ્યા છે.
જિલ્લા વિકાસ અધિકારી તરીકે આણંદમાં ફરજ બજાવતા અમિત પ્રકાશ યાદવના પત્ની ચિત્રા રત્નું પોતે પણ આણંદમાં એડિશનલ જજ તરીકે કાર્યરત છે. અગાઉ ચિત્રા રત્નુએ પોતાની પ્રસુતિ પ્રાથમિક આરોગ્ય કેદ્રમાં કરાવીને સમાજમાં દાખલો બેસાડયો હતો. એમ કરીને તેમણે લોકોને સરકારી આરોગ્ય સેવાનો લાભ લેવા લોકોને જાગૃત કર્યા હતા. ત્યારે હવે ફરીવાર આ દંપતીએ માનવતાની મહેંક ફેલાવવાનું કામ કર્યું છે.
આ દંપનીને પહેલેથી એક બાળક છે જ છતાં એક નિરાધાર દીકરીને બચાવવા માટે આ દંપતીએ તેને દત્તક લીધી છે. સગી માતાની ગોદ ગુમાવી ચૂકેલી `મહી'ને હવે ચિત્રા રત્નુ નામની નવી માતા મળી છે. ચિત્રા રત્નુંને આ બાળકીના ઉછેર માટે ઈશ્વર શક્તિ આપશે તેવી અપાર શ્રદ્ધા છે. આજે આ માસૂમ અને ગુલાબ જેવી મહીને પાલક માતા જયારે આ દંપતીને એક દીકરી પ્રાપ્ત થઇ છે. એક નિરાધાર દીકરીને દત્તક લઈને અધિકારી દંપતીએ સમાજમાં એક ઉત્તમ ઉદાહરણ પૂરું પાડયું છે.