વહેતી ચર્ચા / શું ચૂંટણી પરિણામ બાદ વડોદરામાં બદલાશે મેયર સહિતના હોદ્દેદારો? તાજેતરમાં જ એક કાર્યક્રમ બનેલો ચર્ચાનો વિષય

વડોદરા: એક તરફ જ્યાં દેશનાં તમામ લોકોની નજર 4 જૂને આવનારા લોકસભા ચૂંટણીના પરિણામો પર ટકેલી છે, ત્યારે બીજી તરફ વડોદરામાં ભાજપ માટે ફેરફાર કરવાના દિવસો આવી રહ્યા છે. ચૂંટણી પૂરી થતા જ પક્ષની નાગરિક સંસ્થાની ચૂંટાયેલી પાંખના હોદ્દેદારોની ટીમમાં ફેરફાર થઈ શકે છે.

ઇન્ડિયન એક્સપ્રેસના અહેવાલ અનુસાર, વરિષ્ઠ નેતાઓએ જણાવ્યું હતું કે સ્થાનિક નેતાઓ દ્વારા ચૂંટાયેલા અને રાજકીય પાંખો વચ્ચે પ્રચલિત મતભેદ અંગે ફરિયાદો કરાયા બાદ, ભાજપ હાઈકમાન્ડ VMCની ચૂંટાયેલી પાંખના હોદ્દેદારોને બદલવા માટે ગંભીરતાથી વિચારી રહી છે. જ્યારે એક તરફ એવી અફવાઓ ચાલી રહી છે કે અન્ય ચૂંટાયેલા સભ્યોમાં મેયર અને સ્ટેન્ડિંગ કમિટીના ચેરમેનને બદલવાની ભાજપ યોજના ઘડી રહી છે, ત્યારે વરિષ્ઠ નેતાઓએ જણાવ્યું હતું કે ચૂંટણી પછી, મોટાભાગે ફેરફાર થવાનો છે.

રાજ્ય કારોબારીના એક વરિષ્ઠ સભ્યએ જણાવ્યું હતું કે, "કેટલીક ચેતવણીઓ આપવામાં આવી હોવા છતાં અને રાજ્ય પક્ષ પ્રમુખ દ્વારા બેઠકો યોજવામાં આવી હોવા છતાં, નેતાઓ વચ્ચે મતભેદો દૂર નથી થઈ રહ્યા, કોલ્ડવોરમાં કોઈ ફેરફાર થયો નથી. તેનાથી પાર્ટીની ઈમેજને ઘણું નુકસાન થઈ રહ્યું છે. આ વખતે, પક્ષની અંદરની ખેંચતાણનો અંત લાવવા માટે પદાધિકારીઓને બદલવાનો નિર્ણય લેવામાં આવી શકે છે."

વધુ વાંચો: માનવ તસ્કરીના કેસમાં NIAની ટીમ તપાસ માટે આવશે વડોદરા, જાણો શું છે સમગ્ર મામલો

ત્યારે તાજેતરમાં જ આનો એક કિસ્સો જોવા મળ્યો કે વીર સાવરકરની જન્મજયંતી નિમિત્તે તેમની પ્રતિમાને પુષ્પાંજલિ અર્પણ કરવાનો કાર્યક્રમ યોજવામાં આવ્યો હતો, જેમાં સાયજીગંજના ધારાસભ્ય કેયુર રોકડીયા, પૂર્વ સૈનિકો, કાઉન્સિલરો હાજર રહ્યા હતા, જયારે કોર્પોરેશનના મેયર સહિતના પાંચ મુખ્ય પદાધિકારી તથા ભાજપ પક્ષના મુખ્ય હોદ્દેદારો ગેરહાજર રહ્યા હતા. આ કિસ્સો હવે ચર્ચાનો વિષય બની ગયી છે અને આ જોઇને એવું લાગી રહ્યું છે કે ચેતવણીઓ અને બેઠકો છતાં પણ નેતાઓ વચ્ચે કોલ્ડવોરમાં કોઈ ફેરફાર નથી આવ્યો. ત્યારે હવે કદાચ કોઈ મોટા બદલાવના એંધાણ વર્તાઈ રહ્યા છે.