WORLD / ભાજપનો મોટો નિર્ણય; અમેરિકામાં ચૂંટણી પ્રચાર સમયે આ બધુ બંધ કરી દો, શું ટ્રમ્પને લાગશે ઝટકો?

રિપબ્લિકન પાર્ટી પોતાના ઈલેક્શન કેમ્પેઈનમાં હાઉડી મોદી અને નમસ્તે ટ્રમ્પના કાર્યક્રમના વિઝ્યુઅલ્સનો ઉપયોગ કરી રહ્યા છે જેમાં ભારતીય અમેરિકનોને ટ્રમ્પને વોટ કરવા માટે અપીલ કરવામાં આવી હતી. જો કે હવે અહેવાલ પ્રમાણે ભાજપે એવી કડક સૂચના આપી છે કે તેઓ તેમના અમેરિકા માટેના કોઈ પણ ઈલેક્શન કેમ્પેઈનમાં ભાજપનું નામ ન લે અને સ્વતંત્ર રીતે પ્રચાર કરે. તેઓ રિપબ્લિકન કે ડેમોક્રેટ્સ કોઈ પણ પાર્ટીનું કેમ્પેઈન કરતા હોય તેમને ભાજપનું કે નરેન્દ્ર મોદીનું નામ ન વાપરવાની કડક સૂચના આપવામાં આવી છે. 

અમેરિકાના જસ્ટિસ ડિપાર્ટમેન્ટે ofbjp સામે તપાસના આદેશ આપ્યા હોવાની ચર્ચા

ભાજપના નામે અમેરિકાના કોઈ નેતાને સમર્થન ન કરવાની ભાજપની આ સૂચના પાછળ એક ચોક્કસ કારણ ગણવામાં આવે છે. અમેરિકાના સૂત્રો તરફથી મળતી માહિતી પ્રમાણે અમેરિકાના જસ્ટિસ ડિપાર્ટમેન્ટે ઓવરસીઝ ફ્રેન્ડ્સ ઓફ BJPના અમેરિકાના સમુદાય સામે તપાસના આદેશ આપ્યા છે. આ ચર્ચા આ સંસ્થાના વૉટ્સએપ ગ્રુપની ચેટમાંથી જાણવા મળી છે તેવું કહેવાય રહ્યું છે.

વિદેશમાં સ્થાયી ભાજપના સભ્યો આ ચુંટણીમાં ભાગ લઇ પરંતુ ભાજપની કોઈ ભૂમિકા નહીં

ભાજપના વિદેશ વિભાગના ઇન્ચાર્જ વિજય ચોથાઈવાલેએ ઓવરસીઝ ફ્રેન્ડ્સ ઓફ BJPના અમેરિકાના સમુદાયને પત્ર લખીને કહ્યું હતું કે તેઓએ કોઈ પણ પાર્ટીના સમર્થન માટે ભાજપના નામનો ઉપયોગ કરવાની મનાઈ છે. ચોથાઈવાલા કહ્યું હતું કે દરેક નાગરિકને જે તે દેશની ચુંટણીમાં ભાગ લેવાનો અધિકાર છે. વિદેશમાં સ્થાયી ભાજપના સભ્યો આ ચુંટણીમાં ભાગ લઇ શકે છે પરંતુ તેમાં ભાજપની કોઈ ભૂમિકા નહીં હોય.

ભારતીય-આફ્રિકન મૂળના અમેરિકન સાંસદ કમલા હેરિસ ઉપરાષ્ટ્રપતિ પદના ઉમેદવાર હોવા અંગે, ચોથાઈવાલાએ કહ્યું કે સ્વાભાવિક રીતે, અમે ખુશ છીએ કે ભારતીય મૂળનો વ્યક્તિ અમેરિકાના બીજા સૌથી મોટા પદ માટે લડી રહી છે. જો કે ભાજપ અહીં તટસ્થ ભૂમિકામાં રહેવા માંગે છે. કોને સમર્થન કરવું એ આપણા સભ્યોની પસંદગી પર આધારીત છે કારણ કે તે તેમનો અધિકાર છે.

તેમણે કહ્યું, અમને ખાતરી છે કે અમેરિકાની ચૂંટણી એક લોકશાહી પ્રક્રિયા છે અને આ પ્રક્રિયામાં ભાજપની કોઈ ભૂમિકા નથી. ભારત અને અમેરિકા વચ્ચે ઊંડા વ્યૂહાત્મક સંબંધો છે જેને બંને દેશોના લોકો સમર્થન આપે છે.

ofbjpનો દાવો આવી કોઈ તપાસ શરુ કરાઈ નથી

અમેરિકાના જસ્ટિસ ડિપાર્ટમેન્ટે ઓવરસીઝ ફ્રેન્ડ્સ ઓફ BJPના અમેરિકાના સમુદાય સામે તપાસના આદેશ આપ્યા છે તે આક્ષેપને ઓવરસીઝ ફ્રેન્ડ્સ ઓફ BJPના અમેરિકાના સમુદાયના નેશનલ પ્રેસિડેન્ટ ક્રિષ્ના રેડ્ડીએ અચાનક રાજીનામુ આપી દેતા આ ચર્ચાને વધુ જોર મળ્યું છે. જો કે ઓવરસીઝ ફ્રેન્ડ્સ ઓફ BJPના અમેરિકાના સમુદાયે સત્તાવાર રીતે આવા આક્ષેપોને નકારી દીધા છે અને કહ્યું છે કે તેમના વિરુદ્ધમાં આવી કોઈ તપાસ શરુ કરાઈ નથી.

આ સાથે ટ્વીટર ઉપર એક ફોટો વાયરલ થઇ રહ્યો છે જેમાં ભારતીય મૂળના અમેરિકી સાંસદ તુલસી ગબાર્ડ છે. તેઓએ ફોટોમાં ભાજપનો ખેસ પહેરેલો છે. આ મુદ્દે તુલસીએ નિવેદન આપ્યું હતું કે તેમને કોઈ પાછળથી આવીને ખેસ પહેરાવીને આવો ફોટો પાડી લીધો હતો.

આ ઉપરાંત ઓવરસીઝ ફ્રેન્ડ્સ ઓફ BJPની વેબસાઈટને પણ ધડમૂળથી બદલી નાખવામાં આવી છે. 2019માં આ વેબસાઈટ ઉપર નરેન્દ્ર મોદીના ફોટા અને તેમની અલગ અલગ પ્રવૃત્તિઓને લગતી માહિતી હતી.

જયારે અત્યારે આ વેબસાઈટ ઉપર ફક્ત એક જ પેજ છે જેમાં આ જૂથના નિર્માણના શું હેતુ છે તે વિષે લખવામાં આવ્યું છે. આ ઉપરાંત લાલ રંગના ફોન્ટમાં એવું પણ લખવામાં આવ્યું છે કે આ વેબસાઈટનું હેન્ડલિંગ એક રજીસ્ટર્ડ ફોરેઈન એજન્ટ દ્વારા કરવામાં આવે છે.

આ ગતિવિધિઓ દર્શાવે છે કે ભાજપ અમેરિકાની ચુંટણીમાં પોતાનું પ્રત્યક્ષ રીતે યોગદાન ટાળી રહ્યું છે અને ભાજપ કે મોદીના નામે વોટ માંગવાની પ્રવૃત્તિ ઉપર મનાઈ ફરમાઈ રહ્યું છે.