મદદ / ફેની વાવાઝોડાને પગલે ગુજરાતથી NDRFની 6 ટીમ જશે ઓડિશા

ઓડિશા તટ પર આખરે ફની વાવાઝોડું ટકરાઈ ગયું છે. હાલ ઓડિશામાં 200 કિમીની ઝડપે પવન ફૂંકાઈ રહ્યો છે. ઓડિશા તટ પર વાવાઝોડું ટકરાતાં જ દરિયો ગાંડોતૂર થયો છે તો બીજી બાજુ કેટલાક વૃક્ષો પણ ધરાશાયી થયા છે. વાવાઝોડાના કારણે વીજળી ગુલ થવાના પણ બનાવો સામે આવ્યા છે. વાવાઝોડના કારણે મોબાઈલ નેટવર્ક પણ ખોરવાયું છે. જ્યારે ફેની વાવાઝોડાને પગલે ગુજરાતની NDRFની 6 ટીમ 18 બોટ સાથે ઓડિશા જશે. જ્યાં અસરગ્રસ્ત વિસ્તારોમાં લોકોને મદદ કરશે. 

ફની વાવાઝોડાને પગલે ગુજરાતથી 18 બોટ સાથે NDRFની 6 ટીમ જશે ઓડિશા pic.twitter.com/fERk5UcZA3

— VTV Gujarati News (@VtvGujarati) May 3, 2019

'ફેની' વાવાઝોડાની ગંભીરતાને ધ્યાનમાં લઇને પહેલાંથી જ અંદાજે 12 લાખ લોકોને સુરક્ષિત સ્થળે ખસેડી દેવામાં આવ્યા છે. જ્યારે વાવાઝોડાને ધ્યાનમાં રાખતા 223 જેટલી ટ્રેન પણ રદ કરી દેવામાં આવી છે. જ્યારે બીજી તરફ સાવચેતીના પગલાને લઇને NDRF અને આર્મી પણ તૈનાત કરવામાં આવી છે. જો કે ફેની વાવાઝોડાની તબાહીને ધ્યાનમાં લઇને ભુવનેશ્વર અને કોલકાતા એરપોર્ટ પણ બંધ કરી દેવામાં આવ્યાં છે. ઓડિશા તટ પર સમુદ્રમાં ઉંચા મોજા પણ ઉછળવાના શરૂ થઈ ગયા છે.  

લોકો પણ દરિયા કિનારે નજારો જોવા માટે એકઠા થયા છે. જો કે ફેની વાવાઝોડાને લઇને રાજ્યમાં હાઇ અલર્ટ જાહેર કરી દેવામાં આવ્યું છે. જો કે એક અનુમાન મુજબ આ તોફાનની ચપેટમાં 10 હજાર ગામડા અને અંદાજે 52 શહેર આવી શકે છે. જો કે આ ફેની વાવાઝોડું પશ્ચિમ બંગાળ, આંધ્ર પ્રદેશ, ઓડિશા અને તમિલનાડૂને પ્રભાવિત કરવાની આશંકા છે. જો કે સૌથી વધારે પ્રભાવ ઓડિશામાં જોવા મળશે.