NRI / 'અમેરિકા ન આવતા.. ગ્રીન કાર્ડ મળવામાં લાગી શકે છે 100 વર્ષ': એન્જિનિયરે આપી ભારતીય વિદ્યાર્થીઓને ચેતવણી

ઘણા એવા ઇન્ડિયન સ્ટુડન્ટસ છે કે જેને વિદેશ ભણવા જવાની ઇચ્છા હોય છે અને પછી ત્યાં જ સ્થાયી થઈ જવાનું વિચારતા હોય છે. વિદેશ અભ્યાસ કરવા જવાની ઇચ્છા ધરાવતા ભારતીય વિદ્યાર્થીઓ માટે એમ તો કેનેડા પહેલી પસંદ છે, પરંતુ હાલમાં કેનેડાની ઇમિગ્રન્ટસની ખરાબ પરિસ્થિતિ અને કેનેડામાં કડક થઈ રહેલા ઇમિગ્રેશનના નિયમોને કારણે હવે ભારતીય વિદ્યાર્થીઓ અમેરિકા, ઓસ્ટ્રેલિયા, જર્મની જેવા દેશોને પ્રાથમિકતા આપતા થઈ ગયા છે. ત્યારે હવે અમેરિકા ભણવા જવાનું વિચારી રહેલા ભારતીય વિદ્યાર્થીઓને એક એન્જિનિયરે કડક ચેતવણી આપી છે.

સોશિયલ મીડિયા પ્લેટફોર્મ X પર યુઝરનેમ @TheSuren એકાઉન્ટ પર ભારતીય મૂળના ટેક્સાસ સ્થિત સોફ્ટવેર ડેવલપરે ચિંતા વ્યક્ત કરી અને લખ્યું કે ગ્રેજ્યુએશન પછી H1B વિઝા મળવા એ જીવનભર રાહ જોતા રહેવા જેવું છે. તેણે લખ્યું - ગ્રીન કાર્ડ મળવામાં 100 વર્ષ જેટલો સમય પણ લાગી શકે છે.

સુરેનની આ પોસ્ટ યુએસ એમ્બેસેડર એરિક ગારસેટ્ટીની પોસ્ટના રીએક્શનમાં આવી, જેમાં સમગ્ર ભારતમાં યોજાનાર આગામી એજ્યુકેશન યુએસએ ફેરની જાહેરાત કરવામાં આવી હતી. પ્રમોશનલ વીડિયોમાં, ગારસેટ્ટીએ વિદ્યાર્થીઓ અને વાલીઓને એડમિશન અને સ્કોલરશીપ વિશે જાણવા માટે 80 થી વધુ યુ.એસ. યુનિવર્સિટીઓના પ્રતિનિધિઓને મળવા આમંત્રણ આપ્યું.

પોતાની પોસ્ટમાં, સુરેને સંભવિત વિદ્યાર્થીઓને તેમના પ્લાન પર પુનર્વિચાર કરવા વિનંતી કરીને કહ્યું, "મહેરબાની કરીને #USA ન આવો. આ જૂઠાણાં છે. મારા પર વિશ્વાસ નથી થતો? છેલ્લા દાયકામાં અહીં ભણવા આવેલા કોઈને પણ પૂછી લો. તમારો અભ્યાસ પૂરો થયા પછી કોઈ ભવિષ્ય નથી." સુરેને અમેરિકામાં ભારતીય વિદ્યાર્થીઓને જે મુશ્કેલીઓનો સામનો કરવો પડે છે તેના વિશે વિગતવાર જણાવ્યું. તેણે લખ્યું, " તમારી આખી કારકિર્દી #H1B વિઝાની રાહ જોવામાં લાગી જશે. ભારતીય મૂળના વ્યક્તિઓ માટે ગ્રીન કાર્ડ માટે રાહ જોવાનો સમય લગભગ 100 વર્ષ હોય છે."

સુરેનની પોસ્ટ પણ ઘણા યુઝરની કોમેન્ટ્સ આવી, જેમાં યુઝર્સે વિઝા અને ગ્રીન કાર્ડ મેળવવાના પડકારો અંગે તેમની લાગણીઓને પડઘો પાડ્યો. એક યુઝરે H1B વિઝા પર કામ કરતી વખતે યુએસ નાગરિકતા માટે લાંબી રાહ જોવી વિશે જાણ્યા પછી તેમનો આઘાત શેર કર્યો. અન્ય વ્યક્તિએ જણાવ્યું કે ભારત આવનારા દાયકામાં શિક્ષિત અને પ્રતિભાશાળી વ્યક્તિઓ માટે વધુ સારી તકો પ્રદાન કરી રહ્યું છે. આ કોમેન્ટ અમેરિકામાં ગ્રીન કાર્ડની "દુઃખદાયક" રાહ જોવાના સમયને પ્રકાશિત કરે છે.

આ પણ વાંચો: ધો. 12 બાદ તમે પણ ઉઠાવી શકશો વિદેશમાં ફ્રી એજ્યુકેશનનો લાભ, બસ આ રીતે કરો એપ્લાય

નોકરીની સુરક્ષા અંગેની ચિંતાઓ પણ વ્યકત કરવામાં આવી, જેમાં એક યુઝરે જણાવ્યું કે ભારતીય વ્યાવસાયિકો ઘણીવાર H1B વિઝા પર નોકરી ગુમાવવાના ડરમાં જીવે છે. તેમણે જણાવ્યું હતું કે, 'જે ભારતીયો હવે ઉચ્ચ શિક્ષણ માટે અમેરિકા આવવાની યોજના ધરાવે છે તેઓ #H1B વિઝાને રિન્યૂ કરવાનું ચાલુ રાખશે. તેમનું બાકીનું જીવન હંમેશા તેમની નોકરી ગુમાવવાના ડરની તલવાર પર રહેશે. ભારતીયો માટે કોઈ ગ્રીન કાર્ડ નથી.'

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ