નેશનલ પેમેન્ટ્સ કોર્પોરેશન ઓફ ઇન્ડિયા (NPCI) એ દર મહિને, દર ત્રિમાસિક અથવા દર અર્ધ વાર્ષિક એટલે કે રિકરિંગ પેમેન્ટ્સ માટે યુપીઆઈ ઓટો-પે સુવિધા શરૂ કરી છે. એનપીસીઆઇએ કહ્યું કે આ યુપીઆઈ- 2.0 હેઠળ આ નવી સુવિધા શરૂ કરવા આવી છે. આ અંતર્ગત, યુઝર્સ મોબાઈલ બિલ, વીજળી બિલ, ઇએમઆઈ ચુકવણી, એન્ટરટેનમેન્ટ / ઓટીટી સબ્સ્ક્રિપ્શન, વીમા, મ્યુચ્યુઅલ ફંડ, લોન ચુકવણી અને મેટ્રો કાર્ડ બિલ જેવી ચુકવણી કરી શકશે.
રિકરિંગ પેમેન્ટ માટે પસંદ કરવું પડશે ઈ-મેન્ડેટ વિકલ્પ
એનપીસીઆઇએ કહ્યું કે આ નવી સુવિધા અંતર્ગત 2,000 રૂપિયા સુધીની ચુકવણી માટે યુપીઆઈ પિન જરૂરી રહેશે નહીં. જોકે, આનાથી વધુ રકમ ચૂકવવા માટે દર વખતે પિનની જરૂર પડશે. દરેક યુપીઆઈ એપ્લિકેશનમાં હવે ઇ-મેન્ડેટ વિકલ્પ હશે. આ વિકલ્પ પસંદ કરીને યુઝર્સ કોઈપણ રિકરિંગ પેમેન્ટને મંજૂરી આપી શકશે. એટલું જ નહીં, જો તમને એવું લાગે છે કે તમારે કોઈ પેમેન્ટ રોકી દેવું છે તો તમે આ જ વિકલ્પ પર જઈને રિકરિંગ પેમેન્ટ રોકી શકો છો. સાથે જ પેમેન્ટની રકમ વધારી કે ઓછી પણ કરી શકો છો.
ડેઈલીથી લઈને વાર્ષિક પેમેન્ટ માટે મળશે વિકલ્પ
યુપીઆઈ ઓટો-પે સુવિધા હેઠળ સિંગલ પેમેન્ટની સાથે ડેઈલી, સાપ્તાહિક, માસિક, દર બીજા મહિને, ત્રિમાસિક, અર્ધ વાર્ષિક અને વાર્ષિક પેમેન્ટ કરવાની સુવિધા મળશે. આનાથી યુઝર્સ અને ઉદ્યોગપતિ બંનેને ફાયદો થશે. એક્સિસ બેન્ક, બેંક ઓફ બરોડા, એચડીએફસી બેંક, એચએસબીસી બેંક, આઈસીઆઈસીઆઈ બેંક, આઈડીએફસી બેંક, ઈન્ડસઇન્ડ બેંક, પેટીએમ પેમેન્ટ્સ બેંક, ઑટોપે-દિલ્હી મેટ્રો, ઑટોપે-ડીશ ટીવી, પોલિસી બજાર, પેટીએમ, પેયુ, રેઝરપે જેવી ઘણી બેંક અને વ્યવસાય આ સુવિધાને પહેલાં જ શરૂ કરી ચૂક્યા છે.
યુપીઆઈ ઑટોપે સુવિધા ડિજિટલ પેમેન્ટને વેગ આપશે
જિયો પેમેન્ટ્સ બેંક, એસબીઆઇ અને યસ બેન્ક ટૂંક સમયમાં યુપીઆઈ ઑટો-પેની સુવિધા શરૂ કરવા જઈ રહ્યાં છે. સ્ટેટ બેંક ઓફ ઇન્ડિયાના અધ્યક્ષ રજનીશ કુમારે કહ્યું, 'અમારું માનવું છે કે આ સુવિધા ગ્રાહકોને તેમના રિકરિંગ પેમેન્ટની ચિંતાથી મુક્તિ આપશે. કોર્પોરેશન દ્વારા ગ્લોબલ ફિનટેક ફેસ્ટની વર્ચુઅલ ઇવેન્ટમાં ઓનલાઇન પેમેન્ટની આ સરળ સુવિધા લોન્ચ કરી છે. ઇન્ફોસિસના સહ-સ્થાપક અને કંપની બોર્ડના નોન-એક્ઝિક્યુટિવ ચેરમેન નંદન નિલેકણીએ જણાવ્યું કે, અમે છેલ્લાં ઘણાં સમયથી ડિજિટલ પેમેન્ટ ઇકોનોમીની યોજના બનાવી રહ્યા છીએ. તેમણે કહ્યું કે યુપીઆઈ ઑટોપે સુવિધા ડિજિટલ પેમેન્ટને પ્રોત્સાહન આપશે.