કેન્દ્ર સરકારે 15 વર્ષ જુના વાહનો પર પ્રતિબંધ મૂકી દીધો છે. સરકારી કર્મચારીઓ 15 વર્ષ જુના વાહનો હવેથી નહીં વાપરી શકે.
સરકારી કર્મચારીઓ 15 વર્ષ જુની ગાડીઓનો ઉપયોગ નહી કરી શકે
કેન્દ્રીય નાણા મંત્રાલયે બહાર પાડ્યો આદેશ
15 વર્ષ જુના વાહનો ભંગારમાં ફેરવી નાખવા પડશે
કેન્દ્રની મોદી સરકારે 15 વર્ષથી વધુ જૂના વાહનો માટે મોટો નિર્ણય લીધો છે. હવે સરકારી કર્મચારીઓ 15 વર્ષથી વધુ જૂના વાહનોનો ઉપયોગ કરી શકશે નહીં. નાણા મંત્રાલય હેઠળના ખર્ચ વિભાગે નિર્ણય લીધો છે કે દેશમાં પ્રદૂષણ ઘટાડવા અને મુસાફરોની સલામતી અને ઇંધણ કાર્યક્ષમતાને સુધારવા માટે આ નિર્ણય લેવામાં આવ્યો છે. નાણાં મંત્રાલયે તમામ વિભાગોને આદેશ આપ્યો છે કે તેઓ 15 વર્ષથી વધુ જૂના અને હવે 'સર્વિસિંગ' માટે યોગ્ય ન હોય તેવા તમામ વાહનોને ભંગારમાં ફેરવી નાખે.
નિયમમાં શું ફેરફાર કરાયો
નાણા મંત્રાલયના ખર્ચ વિભાગે એક નોટિફિકેશન બહાર પાડીને કહ્યું છે કે, દેશમાં યાત્રીઓની સુરક્ષા અને પ્રદૂષણને ઓછું કરવાને ધ્યાનમાં રાખીને અમે નીતિ આયોગ અને માર્ગ પરિવહન મંત્રાલયની સલાહ પર આ નિર્ણય લઈ રહ્યા છીએ. માર્ગ પરિવહન મંત્રાલયે કહ્યું હતું કે સરકારે 15 વર્ષથી વધુ જૂના વાહનોને જંકમાં રૂપાંતરિત કરવા અંગે વિચારણા કરવી જોઈએ. માર્ગ પરિવહન અને રાજમાર્ગ મંત્રાલયે જૂના વાહનોના રિન્યૂ મામલે એક ડ્રાફ્ટ તૈયાર કર્યો હતો. આ ડ્રાફ્ટમાં જણાવવામાં આવ્યું હતું કે 1 એપ્રિલ 2022થી 15 વર્ષ જૂનાં કોઈ પણ વાહનોને રિન્યૂ કરવાનો આદેશ આપવામાં આવ્યો નથી. જેમાં કેન્દ્ર સરકાર, રાજ્ય સરકાર, કેન્દ્રશાસિત પ્રદેશ, પીએસયુ અને મ્યુનિસિપલ બોર્ડ વાહનો વગેરે જેવા તમામ પ્રકારના સરકારી વાહનોનો સમાવેશ થાય છે. આ મામલે માહિતી આપતા માર્ગ પરિવહન વિભાગે સોશિયલ મીડિયા હેન્ડલ્સ દ્વારા આ આદેશની જાણકારી આપી દીધી હતી.
લોકો જૂની ગાડીઓ ચલાવી શકતા નથી
દેશમાં પ્રદૂષણના સ્તર અને લોકોની સુરક્ષાને ધ્યાનમાં રાખીને સરકારે નાણાકીય વર્ષ 2021-22 ના બજેટમાં 'વોલન્ટરી વ્હીકલ સ્ક્રેપિંગ પોલિસી' લાવવાની જાહેરાત કરી હતી. તેના દ્વારા સરકારે યોજના બનાવી હતી કે હવે કોઈ પણ સરકારી વિભાગ 15 વર્ષથી જૂના વાહનનો ઉપયોગ નહીં કરે. સામાન્ય લોકો 20 વર્ષથી વધુ જૂના પોતાના પર્સનલ અને કોમર્શિયલ વાહનોનો ઉપયોગ નહીં કરી શકે. આ સાથે વાહનના ઉપયોગના 15 વર્ષ બાદ ઓટોમેટિક ફિટનેસ ટેસ્ટ કરાવવો જરૂરી બનશે. જેનાથી ખબર પડશે કે કારની હાલત કેવી છે. આ સાથે જો આ ટેસ્ટમાં વાહન નિષ્ફળ જાય તો વાહનના માલિકને પણ ભારે દંડ ફટકારવાની જોગવાઈ છે. આ સાથે કારને જપ્ત કરવાનો નિર્ણય પણ લઈ શકાય છે.