પરિપત્ર / 'હવે અમદાવાદમાં ગમે ત્યારે અને ગમે ત્યાં આડેધડ રસ્તા ખોદી નહીં શકાય' : કમિશનરે લીધો મોટો નિર્ણય

• આડેધડ રસ્તા ખોદનારી એજન્સીઓ સામે મ્યુનિ. કમિશનર  લાલ આંખ  
• મંજુરી મેળવી કામગીરી ઝડપથી પૂર્ણ કરવા સૂચના
• ખોદકામ મુજબ રોડ ઓપનીંગ પરમીટ ઇસ્યુ કરવાની રહેશે

અમદાવાદમાં ગમે ત્યારે ગમે તે રસ્તાને ગમે તે કામ માટે ખોદી નાખવામાં આવે છે તે બાબતથી શહેરીજનો સારી રીતે પરિચિત છે. મોડી સાંજ સુધી સોસાયટી-ફ્લેટ બહારના રસ્તાને સહી સલામત જોનાર નાગરિક વહેલી સવારે બ્રશ કરતો ઘરની બહાર જ રસ્તો ખોદી નંખાયેલો જોઈને આશ્ચર્ય પામે છે. પાછો આ રસ્તો એવી આડેધડ રીતે ખોદાય છે કે ઘરની બહાર નીકળવા માટે તેને ઓળંગવો ભારે પડે છે. આ પ્રકારનાં ખોદકામ માટે સરકારી, અર્ધસરકારી કે ખાનગી  એજન્સી મહદંશે જવાબદાર જોવા મળે છે. 

આડેધડ રસ્તા ખોદનારી એજન્સીઓ સામે મ્યુનિ. કમિશનર  લાલ આંખ  

આવી રીતે આડેધડ રસ્તા ખોદાતા હોઈ લોકોમાં ભારે રોષ જોવા મળે છે અને હવે ખુદ મ્યુનિ. કમિશનર લોચન સહેરાએ લોકોના રોષને વાચા આપતા હોય તેમ આડેધડ રસ્તા ખોદનારી એજન્સીઓ સામે લાલ આંખ કરી છે, હવે  12 મીટર પહોળાઈના તેમજ તેથી વધુ પહોળાઈના તમામ રીસરફેસ કરેલા રસ્તાઓ જેના ડીફેક્ટ લાયેબીલીટી પીરિયડ ચાલુ હોય તેવા તમામ રસ્તાઓ તેમજ તેને જોડતા તમામ જંકશનો ઉપર સરકારી/અર્ધ સરકારી/ખાનગી એજન્સી મારફતે જુદા જુદા હેતુ માટે રોડ તોડવા અંગેની આવેલી દરખાસ્ત માટે રોડ ઓપનીંગ પરમીશન ઈસ્યુ કરતા પહેલા તેમજ કોર્પોરેશન દ્વારા પણ કોઈપણ પ્રકારની સર્વિસ લાઈનના કામ માટે રોડ તોડતા પહેલા મ્યુનિસિપલ કમિશનરની પૂર્વ મંજુરી મેળવવાની રહેશે.

મંજુરી મેળવી કામગીરી ઝડપથી પૂર્ણ કરવા સૂચના

તે ઉપરાંત શહેરમાં તાત્કાલિક ધોરણે કરવામાં આવતી કામગીરી જેવી કે પાણીનું લીકેજ, બ્રેકડાઉન તેમજ પોલ્યુશન વગેરે કામગીરી માટે ડીફેક્ટ લાયેબીલીટી પીરિયડ અંતર્ગતના રસ્તા તોડવાની કામગીરી માટે જે તે ઝોનના ડેપ્યુટી સિટી એન્જિનિયર દ્વારા સ્થળ તપાસ કરી ડેપ્યુટી મ્યુનિસિપલ કમિશનરની મંજુરી મેળવી વિના વિલંબે કામગીરી શરૂ કરવાની રહેશે. ટેક્નિકલ યોગ્ય ડીઝાઈન મુજબ રોડ રીઈન્સટેટમેન્ટ ની કામગીરી શક્ય તેટલી ઝડપી પૂર્ણ કરાવવા પણ સુચના આપવામાં આવી છે.

ખોદકામ મુજબ રોડ ઓપનીંગ પરમીટ ઇસ્યુ કરવાની રહેશે

ડીફેક્ટ લાયેબીલીટી પીરિયડ અંતર્ગતના રોડ ઉપર ઓછામાં ઓછો વિસ્તારમાં ખોદાણ થાય તે મુજબ રોડ ઓપનીંગ પરમીટ ઇસ્યુ કરવાની રહેશે. આ ઉપરાંત ઈસ્યુ કરેલા રોડ ઓપનીંગ પરમીટ અન્વયે કામ ચાલુ હોય તેવા સમયે જે તે એજન્સી,કોન્ટ્રાકટર કે કોર્પોરેશનના નામ સાથેના પુરતા પ્રમાણમાં બેરીકેડીંગ રાખી સલામતીના તમામ પગલા લેવામાં આવે અને કામગીરી પૂર્ણ થયા બાદ ટેક્નિકલ રીતે પુરતા પ્રમાણમાં વોટરીંગ,અને કોમ્પશનની કામગીરી કરવામાં તે જોવાનું કરવાનું રહેશે.

પૂરાણની કામગીરી સમય મર્યાદામાં પૂર્ણ કરવાની રહેશે

ખોદાણ-પૂરાણની કામગીરી સમય મર્યાદામાં પૂર્ણ કરાવ્યા બાદ યોગ્ય ડીઝાઈન મુજબ રોડ રીઈન્સ્ટમેન્ટની કામગીરી પણ સમય મર્યાદામાં પૂર્ણ થાય તે રીતે આયોજન કરવા જણાવવામાં આવ્યું છે. કોર્પોરેશન દ્વારા કરવામાં આવતી તમામ પ્રકારની સર્વીસ લાઈનોના કામમાં વોટરીંગ, કોમ્પશન યોગ્ય રીતે કરવા બાબતે તેમજ એક ચોમાસા સુધી રોડની જાળવણી બાબતે તેમજ રોડ રીઈન્સ્ટમેન્ટની આઇટમનો ટેન્ડરમાં સમાવેશ કરવા બાબતે ટેન્ડર સ્પેસીફીકેશનમાં અચુક પણે સમાવેશ કરવાનો રહેશે.