રેલવે બોર્ડના અધ્યક્ષે રેલવે કર્મચારીઓ માટે ઓનલાઇન ઈ-પાસ બનાવવા અને ટિકિટ બુકિંગ માટે સીઆરઆઈએસ દ્વારા હ્યુમન રિસોર્સ મેનેજમેન્ટ સિસ્ટમ (એચઆરએમએસ) પ્રોજેક્ટ અંતર્ગત વિકસિત ઈ-પાસ મોડ્યુલનું આજે વીડિયો કોન્ફરન્સના માધ્યમથી શરૂઆત કરવામાં આવી છે. આ પ્રસંગે રેલવે બોર્ડના તમામ સભ્યો, ચેરમેન, આઈઆરસીટીસીના સહ-મેનેજિંગ ડિરેક્ટર, સીઆરઆઈએસના મેનેજિંગ ડિરેક્ટર, તમામ જનરલ મેનેજરો, પીસીપીઓએસ, પીસીસીએમએસ, પીએફએ અને ડીઆરએમ ઉપસ્થિત રહ્યા હતા.
હ્યૂમન રિસોર્સના ડિરેક્ટરે આ અવસર પર ઈ-પાસ મોડ્યૂલ અને તેના તબક્કાવાર અમલીકરણ વ્યૂહરચના વિશે માહિતી આપી હતી. અત્યાર સુધી કર્મચારીઓને પાસ આપવાની પ્રક્રિયા મેન્યુઅલ જ કરવામાં આવી રહી છે. આ ઉપરાંત રેલવે કર્મચારીઓ પાસે ઓનલાઈન ટિકિટ બુક કરવાની પણ સુવિધા નહોતી.
કર્મચારી ગમે ત્યાંથી ઓનલાઈન અરજી કરી શકશે
ER-PASS મોડ્યુલ એચઆરએમએસ પ્રોજેક્ટ હેઠળ સીઆરઆઈએસ દ્વારા વિકસાવવામાં આવ્યું છે. તેને તબક્કાવાર રીતે ભારતીય રેલવે સાથે જોડવામાં આવશે. આ સુવિધાથી રેલવે કર્મચારીને ન તો પાસ માટે અરજી કરવા ઓફિસમાં આવવું પડશે અને ન તો પાસ જારી થવાની રાહ જોવી પડશે. કર્મચારીઓ કોઈપણ જગ્યાએથી ઓનલાઇન અરજી કરી શકશે અને ઈ-પાસ ઓનલાઇન મેળવી શકશે. ઈ-પાસ માટે અરજી અને તે મેળવવા માટેની સંપૂર્ણ પ્રક્રિયા મોબાઇલ પર ઉપલબ્ધ રહેશે. આના માધ્યમથી પહેલાંની જેમ પીઆરએસ / યુટીએસ કાઉન્ટરની ટિકિટ બુકિંગ સુવિધા ઉપરાંત પાસ પર ટિકિટ બુક કરવાની સુવિધા પણ આઈઆરસીટીસી વેબસાઇટ પર ઉપલબ્ધ રહેશે.
આ સુવિધા રેલવે કર્મચારીઓને રેલવે પાસનો સરળતાથી ઉપયોગ કરવામાં મદદ કરશે અને સાથે જ તમામ અધિકારીઓને પાસ ઇશ્યુ કરવાની કામગીરીમાં સરળતા રહેશે. એચઆરએમએસ પ્રોજેક્ટ ભારતીય રેલવેની સંપૂર્ણ માનવ સંસાધન પ્રક્રિયાના ડિજિટલાઇઝેશન માટેની એક વ્યાપક યોજના છે.
એચઆરએમએસમાં કુલ 21 મોડ્યુલની યોજના છે. લગભગ 97 ટકા રેલવે કર્મચારીઓની બેસિક ડેટા એન્ટ્રી એચઆરએમએસના કર્મચારી માસ્ટર અને ઇ-સર્વિસ રેકોર્ડ મોડ્યુલમાં પૂરી થઈ ચૂકી છે. સીઆરઆઈએસ પણ ટૂંક સમયમાં એચઆરએમએસ ઓફિસ ઓર્ડર મોડ્યુલ અને સેટલમેન્ટ મોડ્યુલ લોન્ચ કરવા જઈ રહ્યું છે.