ઉત્તર પ્રદેશના મેરઠમાં બેટ્સમેનને પ્રેક્ટિસ કરવા એક એવું મશીન તૈયાર કરાયું કે જે 155 કિલોમીટર પ્રતિ કલાકની ઝડપે બોલ થ્રો કરી શકે છે.
ઉત્તર પ્રદેશના મેરઠમાં તૈયાર કરાયુું એક અદભુત મશીન
ક્રિકેટમાં ભવિષ્ય બનાવનારા યુવાનોને ઉડાન આપશે
બેટ્સમેન પોતાની ઇચ્છાનુસાર આ મશીનને સેટ કરી શકે છે
ઉત્તર પ્રદેશના મેરઠમાંથી અનેક એવાં આંતરરાષ્ટ્રીય ક્રિકેટરો ઉભરી આવ્યાં છે. ત્યારે હવે આ જ કડીને આગળ લઈ જવા માટે મેરઠમાં એક ખાસ બોલિંગ મશીન તૈયાર કરવામાં આવ્યું છે. જે બેટ્સમેનને આંતરરાષ્ટ્રીય સ્તર માટે તૈયાર કરશે. આ મશીન 155 કિલોમીટર પ્રતિ કલાકની ઝડપે બોલિંગ કરી શકે છે. તેના દ્વારા દરેક ફોર્મની બોલિંગ અલગ-અલગ સ્પીડ સેટ કરી શકાય છે.
ક્રિકેટમાં ભવિષ્ય બનાવનારા યુવાનોને આપશે ઉડાન
દરેક યુવાન ક્રિકેટ રમવાનું સપનું જોતા હોય છે. ક્રિકેટે સાવ અજાણી જગ્યાએથી પણ યુવાનોને બહાર લાવવાની કોશિશ કરી છે. દરેક ક્રિકેટ રમનાર ખેલાડી મહેન્દ્ર સિંહ ધોની અને ભારત રત્ન સચિન તેંડુલકરની જેમ પોતાને સ્થાપિત કરવાનું સપનું જુએ છે. આવી સ્થિતિમાં દમદાર તૈયારી કરવી ખૂબ જરૂરી હોય છે કે જે ખેલાડીને પરિપક્વ બનાવે છે. જેથી વિશ્વસ્તરે તેનું નામ રોશન થાય.
ત્યારે આ જ પ્રકારની તૈયારી માટે તેમજ ખેલાડીઓને તૈયાર કરવા માટે મેરઠમાં એક અદભુત બોલિંગ મશીન બનાવવામાં આવ્યું છે. જેનું ઉત્પાદન સંપૂર્ણપણે ભારતમાં જ કરવામાં આવ્યું છે. BDM અને સ્વિંગ એન્ડ સ્પિન કંપનીનું આ મશીન છે. જે બોલર વિના પણ બેટ્સમેનને જબરદસ્ત તૈયારી કરાવશે. આ મશીન બોલરની જેમ જ કામ કરે છે. જે રીતે બોલર બોલને અલગ-અલગ સ્ટાઇલમાં ફેંકે છે એ જ રીતે આ મશીન પણ કામ કરે છે. એક રીતે તેને રોબોટ કહી શકાય કે જે બોલર વિના પણ બેટ્સમેનને શાનદાર પ્રેક્ટિસ કરાવી શકે છે.
અનેક વિશેષતાઓથી સજ્જ છે આ મશીન
બેટ્સમેન પોતાની ઇચ્છાનુસાર આ મશીનને સેટ કરી શકે છે અને તે મશીન પણ એ જ રીતે કામ કરશે. આપણે મેચમાં જોતા હોઇએ છીએ કે, કેવી રીતે ફાસ્ટ બોલ બેટ્સમેન તરફ આવતો હોય છે અને અનુભવી બેટ્સમેન તેની પર જોરદાર છક્કો કે ચોગ્ગો મારે છે. બેટ્સમેનને તે જજમેન્ટ પૂરી તૈયારી હોય તો જ આવી શકે છે. એ જ રીતે આ મશીનનાં આધારે બેટ્સમેન પૂરી તૈયારી સાથે મેચમાં તેનું જજમેન્ટ લઇ શકશે.
આ મશીન દરેક સ્ટાઇલમાં બોલિંગ કરી શકે છે. પછી ભલે તે સ્વિંગ આઉટ, સ્વિંગ ઓફ, સ્વિંગ બાઉન્સર, ફાસ્ટ અથવા તો સ્પિન જ કેમ ના હોય. આ મશીનના આધારે દરેક સ્ટાઇલની બોલિંગની પ્રેક્ટિસ ખેલાડી બિલકુલ આરામથી કરી શકે છે. વધુમાં તમને જણાવી દઇએ કે, આ મશીનને મશીનમાં લાગેલી ઓપરેટિંગ સિસ્ટમથી તો ચલાવી જ શકાય છે. સાથે તેને ફોન અથવા તો લેપટોપના આધારે પણ કંટ્રોલ કરી શકાશે અને મશીનને ઓપરેટ પણ કરી શકાશે. આ મશીનમાં એક જ વારમાં 36 વખત બોલ થ્રો કરી શકાય છે.
આ મશીન બનાવવાનો આઇડિયા લોકડાઉન દરમ્યાન આવ્યો હતો
ક્રિકેટ ઇક્વિપમેન્ટ્સ બનાવનારી કંપની બીડીએમના ડાયરેક્ટર રાકેશ મહાજન કહે છે કે, લોકડાઉન દરમ્યાન આ બોલિંગ મશીનને બનાવવાનો વિચાર આવ્યો અને અમે વિચાર્યું કે, હાલનાં આ સમયનો સદુપયોગ કરવામાં આવે. એટલાં માટે અમે આ મશીનને બનાવવાનો વિચાર કર્યો હતો. આ પ્રકારનાં બોલિંગ મશીન વિદેશમાં ખૂબ મોંઘા હોય છે પરંતુ તેની કિંમત અમે ખૂબ ઓછી રાખી છે. અંદાજે સાડા ચાર લાખનું આ મશીન છે. આ એક જોઇન્ટ વેન્ચર દ્વારા બનાવવામાં આવેલ છે. BDMની સાથે-સાથે સ્વિંગ એન્ડ સ્પિન કંપની પણ આ મશીનની નિર્માતા છે. આ મશીનમાં ગમે ત્યારે સ્પીડ પણ બદલી શકાય છે. ભારતમાં આવું પ્રથમ મશીન છે કે જેની અંદર આટલી બધી સુવિધાઓ આપવામાં આવી છે. આ મશીનની ઝડપ 155 કિમી પ્રતિ કલાકની છે. આ મશીનને કોઇ પણ એંગલ પર એડજસ્ટ કરી શકાય છે. તેની હાઇટમાં પણ ફેરફાર કરી શકાય છે કે જેથી દરેક રીતે બોલિંગ કરાવી શકાય.
ક્રિકેટ એકેડમીમાં ક્રિકેટ શીખનારા ખેલાડીઓ છે ખુશ
જે યુવાનો BDM ક્રિકેટ એકેડમીમાં ક્રિકેટ શીખવા અને રમવા આવે છે તેઓ આ મશીનના આગમનથી ખૂબ જ ઉત્સાહિત અને ખુશ છે કારણ કે તેઓને અલગ-અલગ ઝડપે પ્રેક્ટિસ કરવા મળી રહી છે. તેઓનું કહેવું છે કે, જો કોઈ બોલર શાનદાર બેટિંગની પ્રેક્ટિસ કરવા માટે ઉપલબ્ધ ન હોય તો પણ આ મશીન દ્વારા સારી પ્રેક્ટિસ કરી શકાય છે. BDM ક્રિકેટ એકેડમીના ક્રિકેટના કોચ સમરીશ સોમલ જણાવે છે કે, કોઈ પણ બોલર 120 અથવા 130 કિલોમીટર પ્રતિ કલાકની ઝડપે 1 ઓવરના છ બોલ ફેંકી શકાતા નથી. જ્યારે આ મશીન દ્વારા બોલિંગની સ્પીડ 155 કિલોમીટર પ્રતિ કલાકથી વધુની ઝડપે જઈ શકે છે ત્યારે કહી શકાય કે તે બેટ્સમેન માટે ખૂબ જ ફાયદાકારક છે.