ઐતિહાસિક ઘટના / હવેથી આ દેશમાં હશે બે મહિલાઓની સિગ્નેચર સાથેની કરન્સી, જુઓ ક્યારથી આવશે માર્કેટમાં

• આ બે મહિલાઓના હસ્તાક્ષર હશે ડોલર પર
• અમેરિકી સરકારે લીધો મોટો નિર્ણય 
• જાણો ક્યારથી આવશે માર્કેટમાં

દુનિયાભરની મહિલાઓ દરેક ક્ષેત્રમાં પોતાનું નામ રોશન કરી રહી છે. મહિલાઓ પોતાની ઓળખ માટે કોઈના પર નિર્ભર નથી હોતી, બલ્કે મહિલાઓ પોતાનું ભવિષ્ય જાતે જ લખી રહી છે. એવામાં અમેરિકાની કરન્સી ડોલર પર અમેરિકાની બે મહિલાઓના હસ્તાક્ષર છપાયા છે. આવું અમેરિકાના ઈતિહાસમાં પહેલીવાર બન્યું છે. આ બે મહિલાઓમાંથી એક અમેરિકન નાણા મંત્રી જેનેટ યેલેન અને ખજાનચી મેરિલિન મલેરબા છે.

અમેરિકાના ઈતિહાસમાં પહેલી વખત બન્યુ આવું 
રિપોર્ટ અનુસાર જેનેટ યેલેન અને મેરિલિન મલેરબાના હસ્તાક્ષર અમેરિકામાં પાંચ ડોલરના ચલણ પર છાપવામાં આવ્યા છે. આ બંને મહિલાઓના હસ્તાક્ષર સાથેના આ ડોલર ગુરુવારે બહાર પાડવામાં આવ્યા છે. નોટ પર હસ્તાક્ષર જાહેર કર્યા પછી, નાણામંત્રી જેનેટ યેલેને કહ્યું કે તે એક પરંપરા છે જેના હેઠળ દેશના નાણા મંત્રીના હસ્તાક્ષર યુએસ ડોલર પર હોય છે. જોકે, અમેરિકાના ઈતિહાસમાં આવું પહેલીવાર થઈ રહ્યું છે જ્યારે કોઈ મહિલા નાણાપ્રધાનનું પદ સંભાળ્યું હોય.

અમારી પહેલા સિગ્નેચર ખૂબ ખરાબ હતા
નાણામંત્રી જેનેટ યેલેને ખુલાસો કર્યો, મારા પહેલા નાણામંત્રી રહેલા મારા બે સાથીદારોના હસ્તાક્ષર એટલા ખરાબ હતા કે લોકો તેમની મજાક ઉડાવતા હતા. જેનેટ યેલેને વધુમાં જણાવ્યું હતું કે ગેથરે તેને માન્ય દેખાડવા માટે તેની સહી બદલવી પડી હતી. જેનેટે કહ્યું, મેં મારા હસ્તાક્ષરની ઘણી પ્રેક્ટિસ કરી છે.

2023થી નોટો ચલણમાં આવશે
અમેરિકાના નાણા મંત્રી જેનેટ યેલેને કહ્યું કે, આ મારી કે કરન્સી પર નવા હસ્તાક્ષરનો મામલો નથી. આ અમારી અર્થવ્યવસ્થાને વધુ મજબૂત અને સમાવિષ્ટ બનાવવાના અમારા સામૂહિક કાર્ય સાથે જોડાયેલું છે. ત્યાં જ યુએસ નાણા વિભાગનું કહેવું છે કે આ નવી નોટો ડિસેમ્બરમાં ફેડરલ રિઝર્વ સુધી પહોંચશે. આ સાથે આ નોટો 2023ની શરૂઆતથી દેશમાં ચલણમાં આવશે.