ટેક્નોસેવી પોલીસ / હોલિવૂડ ફિલ્મો જેવી ટેક્નોલોજીથી અમદાવાદ પોલીસ શહેર પર બાજ નજર રાખશે

• ગુનાખોરીના ગ્રાફ સામે આધુનિક બનશે અમદાવાદ પોલીસ 
• વીડિયો એનાલિટિકસ સોફટવેર 
• ગુનેગારોને શોધવામાં થશે સરળતા 

શહેરમાં વધી રહેલી ગુનાખોરી પર અંકુશ લગાવવા માટે શહેરના વધુ ને વધુ વિસ્તારને સીસીટીવી કેમેરા સર્વેલન્સ હેઠળ આવરી લેવાનો પ્રયાસ પોલીસ અને અમદાવાદ મ્યુનિસિપલ કોર્પોરેશને કર્યો છે. શહેરનાં ૧૩૦ જંકશન પર એક હજારથી વધુ સીસીટીવી કેમેરા લગાવી દેવામાં આવ્યા છે. જેમાં ગુજરાત ફોરે‌િન્સક સાયન્સ યુનિવર્સીટીએ તૈયાર કરેલ વીડિયો એનાલિટિકસ સોફટ્વેર ટ્રેકિંગ સિસ્ટમ અપડેટ કરવામાં આવશે. 

વીડિયો એનાલિટિકસ સોફટ્વેર ટ્રેકિંગ સિસ્ટમ પોલીસને બનશે ઉપયોગી 

પોલીસ ચોપડે નોધાયેલો કોઇ પણ ગુનેગાર જ્યારે પોતાનું વિહિકલ લઇને નીકળશે તો પોલીસની તેના પર બાજ નજર રહેશે. નાના મોટા ગુનાઓને શોધવા માટે પોલીસને સીસીટીવી ફુટેજ આશીર્વાદરૂપ બનાતા હોય છે. તેવામાં વીડિયો એનાલિટિકસ સોફટ્વેર ટ્રેકિંગ સિસ્ટમ આવી જતાં પોલીસની કામગીરી વધુ સરળ બની જશે. 

ગુનાગારોને શોધવા માટે થશે આસાની

રાજકોટમાં વીડિયો એનાલિટિકસ સોફટ્વેર ટ્રેકિંગ સિસ્ટમ અપડેટ કરી દેવામાં આવી છે. જેનાથી તેમને ગુનાગારોને શોધવા માટે આસાની રહે છે ત્યારે હવે આવનારા દિવસોમાં અમદાવાદમાં પણ આ સિસ્ટમ અપડેટ કરી દેવામાં આવશે. વીડિયો એનાલિટિકસ સોફટ્વેર ટ્રેકિંગ સિસ્ટમની ખા‌સિયત એ છે કે હજારો વિહિકલમાંથી ગુનેગારો કયા વિહિકલ પર જઇ રહ્યા છે તેને ડિટેક્ટ કરશે. આ સિવાય તેમનો વાહન રજિસ્ટ્રેશન નંબર ડિટેક્ટ કરશે. 

અત્યાધુનિક બનશે અમદાવાદ પોલીસ 

ઉદાહરણ તરીકે કોઇ ગુનેગાર લાલ કલરનાં વાહન પર આવીને ચેઇન સ્નેચિંગ કે લૂંટ જેવા ગંભીર પ્રકારના ગુનો આચરીને નાસી જાય છે તો આ સિસ્ટમ પોલીસને બહુ ઉપયોગી થશે. આ સોફ્ટવેરની ખાસીયત એ છે કે પોલીસ લાલ કલરનું વાહન જોવા માગતા હશે તો તેમને માત્ર લાલ કલરનું જ વાહન દેખાશે. પોલીસ કંટ્રોલ રૂમથી બેઠા બેઠા શહેરના તમામ લાલ કલરનાં વાહનને ટ્રેક કરી શકશે. ગુજરાત ફોરે‌ન્સિક સાયન્સ યુનિવર્સિટીએ બનાવેલા વીડિયો એનાલિટિકસ સોફટ્વેર ટ્રેકિંગ સિસ્ટમ પોલીસ માટે આશીર્વાદરૂપ બને તેવું અધિકારીઓ માની રહ્યા છે. આ સોફ્ટવેર અપડેટ કર્યા બાદ ગુનેગારોની ગતિવિધિ ઉપર નજર રાખી શકાશે અને કદાચ કોઇ કોઇ ગુનાહિત કાવતરાંને રોકી પણ શકશે.