આતંક / વાડજમાં અસામાજિક તત્ત્વોનો ત્રાસઃ ગાડીઓના કાચ તોડી આતંક મચાવ્યો 

• તાત્કાલિક પોલીસનો કાફલો ઘટનાસ્થળે પહોંચી ગયા
• બનાવ સીસીટીવી કેમેરામાં કેદ થયો હતો
• કુહાડા, લાકડાના ડંડા અને તલવાર જેવાં હથિયારથી ગાડીઓના કાચની  તોડફોડ કરી

વાડજના સોરાબજી કમ્પાઉન્ડ ખાતે અસામાજિક તત્ત્વોએ આતંક મચાવ્યો હોવાની સમગ્ર ઘટના સીસીટીવીમાં કેદ થઇ છે. આ મામલે વાડજ પોલીસ સ્ટેશનમાં ફરિયાદ નોંધવામાં આવી છે. પોલીસે આ મામલે ગુનો નોંધીને ધરપકડ કરી હતી.

મળતી માહિતી મુજબ વાડજના સોરાબજી કમ્પાઉન્ડ નજીક કેટલાંક અસામાજિક તત્ત્વોએ આતંક મચાવ્યો હતો. બેથી ત્રણ લુખ્ખાઓ છાકટા બનીને રસ્તાની વચ્ચે ઊભા રહીને પસાર થતી ગાડીઓને રોકી રહ્યા છે તેમજ હાથમાં કુહાડા, લાકડાના ડંડા અને તલવાર જેવાં હથિયારથી ગાડીઓના કાચની  તોડફોડ કરી દહેશતનો માહોલ તેમના દ્વારા ઊભો કરવામાં આવ્યો હતો. ગુંડાગર્દી  કરી તોડફોડ મચાવનાર સમગ્ર ઘટનાનો વીડિયો સીસીટીવી કેમેરામાં કેદ થઇ ગયો હતો. 

અસામાજિક તત્ત્વો રસ્તામાં પાર્ક કરેલી ગાડીઓમાં પણ તોડફોડ કરી તે બનાવ સીસીટીવી કેમેરામાં કેદ થયો હતો. તેની સાથે અહીંથી પસાર થતા લોકોને પણ રોકીને માર મારવામાં આવ્યો હોવાનું દેખાઈ રહ્યું છે. આવા તત્ત્વોને પોલીસનો કોઈ ડર ન હોય તે રીતે તેઓ રસ્તાની વચ્ચોવચ ઊભા રહીને વાહનો રોકી રહ્યા છે એટલું જ નહીં, વાહન નજીક આવતાં જ તેઓ તલવાર અને કુહાડાથી હુમલો કરે છે.

આ ઘટનાની જાણ વાડજ પોલીસને થતાં તાત્કાલિક પોલીસનો કાફલો ઘટનાસ્થળે પહોંચી ગયા હતા અને આ તત્ત્વો વિરુદ્ધમાં નોંધીને તેમની ધરપકડ પણ કરી હતી.