GIDC માંથી ઝેરી પાણી છોડવા મુદ્દે હાઈકોર્ટમાં કંપનીઓ વિરૂદ્ધ અરજી કરાઇ છે. જેમાં કંપનીઑના પાપે ઝેરી કેમિકલ નળ મારફતે લોકોના ઘરે પહોંચતું હોવાના આરોપ લગાવાયા છે.
GIDC માંથી ઝેરી પાણી છોડવા મુદ્દે હાઈકોર્ટમાં અરજી
અરજીમાં લોકોના જીવ સાથે ચેડાં કરાતો હોવાનો આરોપ
પ્રતિબંધીત કેમિકલો નિકાલ કરાતો હોવાનો દાવો
અમદાવાદ GIDC માંથી મોટી સંખ્યામાં ફેકટરીઑ આવેલી છે. જે કારખાનાના ઝેરી પાણીના નિકાલ મુદ્દે હાઈકોર્ટમાં અરજી કરવામાં આવી હતી. હાઈકોર્ટમાં કરાયેલી અરજીમાં નિયમ મુજબ ઝેરી પાણીનો નિકાલ ન કરી લોકોના જીવ સાથે ચેડાં કરવામા આવતા હોવાનો આરોપ લગાવવામાં આવ્યો હતો અને પ્રતિબંધીત કેમિકલોના ઉપયોગનો પણ ઉલ્લેખ કરાયો હતો.
GPCBના જવાબદાર અધિકારીઑ મૂકપ્રેક્ષક બનીને તમાશો જોઇ રહ્યા હોવાંની રાવ
અમદાવાદમાં કેમીકલયુક્ત પાણી છોડવા મુદ્દે થયેલી અરજીમાં ઉલ્લેખ કરાયા મુજબ GIDC માંથી અનેક ઉદ્યોગો દ્વારા ઝેરી પાણી બેફામ રીતે છોડવામાં આવી રહ્યું છે. વધુમાં અરજદારે આરોપ લગાવતા જણાવ્યું હતું કે વિશ્વમાં પ્રતિબંધીત કેમિકલોઅમદાવાદ GIDC માં આડેધડ ઉપયોગ અને નિકાલ કરવામાં આવી રહ્યો છે. એટલું જ નહિ કંપનીઓ તેનો ભૂગર્ભમાં ઠાલવી નિકાલ કરતી હોવાનું પણ જણાવાયું છે. જેના થકી જમીનમાં ઉતરેલું ઝેરી કેમિકલ નળ મારફતે લોકોના ઘર સુધી પહોંચે છે. જે નુકસાનકારક છે. વધુમાં તપાસ બાદ પણ GPCBના જવાબદાર અધિકારીઑ મૂકપ્રેક્ષક બનીને તમાશો જોઇ રહ્યા હોવાંની રાવ કરવામાં આવી છે. આથી દૂષિત પાણી મામલે NEERI સંસ્થા પાસે સર્વે કરાવવામાં આવે તેવી માંગ પણ કરવામાં આવી છે. જેને લઇને હાઈકોર્ટે GPCB ના જવાબદાર અધિકારીઑ અને રાજ્ય સરકાર સહીત અન્ય પક્ષકારોને નોટિસ આપી છે.
વલસાડ જિલ્લામાં જીઆઇડીસી વિસ્તારમાં પોલીસ સર્ચ ઓપરેશન
બીજી તરફ વલસાડ જિલ્લામાં પણ જીઆઇડીસી વિસ્તારમાં પોલીસે સર્ચ ઓપરેશન હાથ ધર્યું હતું. કંપનીમાં ચેકિંગ દરમિયાન વાપી જીઆઇડીસીમાં આવેલી હેરંબા કેમિકલ્સ નામની કંપનીમાં રેડ કરી હતી. આ રેડ દરમિયાન કંપનીના ગોડાઉનમાંથી મોટી માત્રામાં પ્રોસેસ વેસ્ટ અને મિક્સ કેમિકલ વેસ્ટ મળી આવ્યો હતો .આથી પોલીસે આ તમામ કેમિકલ વેસ્ટનો જથ્થો જપ્ત કરી જીપીસીબીને જાણ કરી હતી. બનાવની જાણ થતા જીપીસીબીની ટીમે પણ આ મામલે કેમિકલ વેસ્ટના સેમ્પલ લઇ ઊંડાણપૂર્વક તપાસ હાથ ધરી હતી. પોલીસની આ કાર્યવાહીમાં કંપનીમાંથી પ્રોસેસ વેસ્ટ જેને રીઝેક્ટેડ સેમી લિક્વિડ સોલીડ વેસ્ટ પણ કહેવામાં આવે છે. તેના અંદાજે 5,87,000 થી વધુની કિંમતનો જથ્થો અને મિક્સ સોલ્વન્ટનો 600 મેટ્રિક ટન મુદ્દા માલ જપ્ત કરી આગળની કાર્યવાહી હાથ ધરી હતી.
પોલીસની પ્રાથમિક તપાસમાં બહાર આવ્યું હતું કે કંપની દ્વારા આ કેમિકલ વેસ્ટનો જથ્થો કંપની પરિસરમાં જ સંગ્રહ કરવાનો હોય છે. પરંતુ કંપની દ્વારા કોઈ પણ જાતની પરવાનગી લીધા ગેરકાયદેસર રીતે મોટી માત્રામાં ઝેરી કેમિકલ વેસ્ટનો જથ્થો કંપની પરિસર બહાર એક ગોડાઉનમાં સ્ટોર કરવામાં આવ્યો હતો. જે ગેરકાયદેસર હતું. આ અત્યંત ઝેરી હાનિકારક કેમિકલ વેસ્ટથી નુકસાન પણ થઈ શકતું હતું. આથી આ મામલે હવે જીઆઇડીસી પોલીસે જીપીસીબીનો પણ સાથ લઇ અને ઊંડાણપૂર્વક તપાસ હાથ ધરાઇ છે.