તમારા કામનું / 5 નહીં પણ 10 લાખ સુધીની આવક થઇ શકે છે ટેક્સ ફ્રી, જાણી લો ટેક્સ પર છૂટ મેળવવાની આ ટ્રિક

• સામાન્ય રીતે પાંચ લાખ રૂપિયા સુધીની વાર્ષિક આવક પર કોઈ ટેક્સ ચૂકવવો નથી પડતો
• 5 થી 10 લાખની આવક પર 20% ઇન્કમટેક્સ ચૂકવવો પડશે
• આ ટ્રિકથી કરદાતા 10 લાખ રૂપિયા સુધીની આવક સુધી ટેક્સ ફ્રી કરાવી શકે છે

ચાલુ નાણાકીય વર્ષ પૂરું થવામાં હવે થોડો સમય બાકી છે એવામાં કરદાતાઓ પાસેથી રોકાણની વિગતો ઓફિસો દ્વારા પૂછવામાં આવી રહી છે. એટલે કે લોકોએ અત્યારથી જ નાણાકીય આયોજન શરૂ કરી દીધું છે. ખાસ કરીને આવા ટેક્સપેયર જેઓ છેલ્લી ઘડીએ રોકાણ કરે છે એવા લોકો ટેક્સ સેવિંગ માટે નવા નવા રસ્તાઓ શોધી રહ્યા છે. સામાન્ય રીતે પાંચ લાખ રૂપિયા સુધીની વાર્ષિક આવક પર કોઈ ટેક્સ ચૂકવવો નથી પડતો, તેનાથી વધારાની આવક પર ટેક્સ ભરવો પડે છે. જો કે રોકાણનો વિકલ્પ પસંદ કરીને ટેક્સપેયર પાંચ લાખ રૂપિયાથી વધુની આવક પર પણ ટેક્સમાં છૂટ મેળવી શકે છે. જણાવી દઈએ કે કરદાતા 10 લાખ રૂપિયા સુધીની આવક સુધી ટેક્સ ફ્રી કરાવી શકે છે, કેવી રીતે? ચાલો જાણીએ.. 

2.5 લાખ સુધીની ઇન્કમ ટેક્સ ફ્રી 
ઈન્કમ ટેક્સના નિયમ મુજબ વાર્ષિક 2.5 લાખ સુધીની આવક પર કોઈ કર જવાબદારી નથી. 2.5-5 લાખ રૂપિયાની આવક પર 5% ટેક્સની જોગવાઈ છે. 5 થી 10 લાખની આવક પર 30% અને 10 લાખથી વધુની આવક પર 30% ઇન્કમટેક્સ ચૂકવવો પડશે.

એટલે કે કોઈ વ્યક્તિની CTC રૂ. 10 લાખ છે. તો એ વ્યક્તિ તેની વાર્ષિક આવક અનુસાર 20 ટકા ટેક્સ સ્લેબના દાયરામાં આવે છે, પણ જો એ વ્યક્તિ ઇચ્છે તો તેને એક રૂપિયો પણ ટેક્સ તરીકે ચૂકવવો ન પડી શકે. જો કે આ માટે એ વ્યક્તિએ તમામ પ્રકારના રોકાણ વિકલ્પો પસંદ કરવા પડશે અને એ પછી તે આવકવેરામાં છૂટનો લાભ મેળવી શકે છે. 

સ્ટાન્ડર્ડ ડિડક્શન
આવકવેરાના નિયમો સ્પષ્ટપણે જણાવે છે કે 50,000 રૂપિયા સુધી સ્ટાન્ડર્ડ ડિડક્શન તરીકે ઉપલબ્ધ છે એટલે કે આ રકમ તમારી રૂ. 10 લાખની કમાણીમાંથી બાદ કરો, તો તે રૂ (10,00,000-50,000=9,50,000) થશે. 

80C હેઠળ બચત
એ બાદ તમે 80C હેઠળ 1.5 લાખ રૂપિયાનો ટેક્સ બચાવી શકો છો.જણાવી દઈએ કે  EPF, PPF, ELSS, NSC જેવી બચત યોજનાઓ આ હેઠળ આવે છે અને તમે તેમાં રોકાણ કરીને ટેક્સમાં છૂટ મેળવી શકો છો. આ સિવાય ટેક્સપેયર વ્યક્તિ બે બાળકો માટે ટ્યુશન ફીના રૂપમાં ટેક્સમાં છૂટ પણ લઈ શકો છો. એટલે કે રૂ. 9,50,000માંથી રૂ. 1,50,000 બાદ કરીએ તો ટેક્સ દાયરામાં રૂ. 8 લાખની રકમ આવશે.

હોમ લોન
જણાવી દઈએ કે હોમ લોન લેનારાઓ 2 લાખ રૂપિયાનો વધારાનો ટેક્સ બચાવી શકે છે. નોંધનીય છે કે ઈન્કમ ટેક્સની કલમ 24B હેઠળ હોમ લોન લેનારને બે લાખના વ્યાજ પર ટેક્સમાં છૂટ મળે છે અને વ્યક્તિએ વાર્ષિક આવકમાંથી પણ બાદ કરી શકે છે. એટલે કે (8,00,000-2,00,000 = 6,00,000). આ રીતે હવે ટેક્સના દાયરામાં 6 લાખ રૂપિયાની આવક આવશે.

રાષ્ટ્રીય પેન્શન સિસ્ટમ NPS
મહત્વનું છે કે નેશનલ પેન્શન સિસ્ટમ (NPS)માં વાર્ષિક રૂ. 50,000 સુધીનું અલગથી રોકાણ કરવામાં આવે તો કલમ 80CCD (1B) હેઠળ આવકવેરામાં વધારાના રૂ. 50,000 બચાવી શકાય છે. (6,00,000-50,000 = 5,50,000). આ રીતે હવે 5.5 લાખ રૂપિયાની આવક કરપાત્ર થશે.

હેલ્થ પોલિસી 
આવકવેરાની કલમ 80D હેઠળ હેલ્થ પોલિસી લઈને 25,000 રૂપિયા સુધીનો ટેક્સ બચાવી શકાય છે. આ હેલ્થ પોલિસી માં વ્યક્તિ પોતાનું, પત્ની અને બાળકોનું નામ હોવું જોઈએ. આ સિવાય જો તમારા માતા-પિતા વરિષ્ઠ નાગરિકો છે તેના નામ પર સ્વાસ્થ્ય વીમો ખરીદીને 50,000 રૂપિયા સુધીનું વધારાનું ડિસ્કાઉન્ટ મેળવી શકો છો. (5,50,000- 75,000 = રૂ. 4,75,000). આ રીતે, તમારી રૂ. 10 લાખની આવક હવે ટેક્સ દાયરાની બહાર છે.

જણાવી દઈએ કે આવકવેરાના નિયમો સ્પષ્ટપણે જણાવે છે કે રૂ. 5 લાખની આવક પર ટેક્સ રૂ. 12,500 (રૂ. 2.5 લાખના 5%) છે. આ કિસ્સામાં આવકવેરા કલમ 87A હેઠળ 12,500 રૂપિયાની છૂટ મળે છે.  તમે રોકાણનો વિકલ્પ પસંદ કરો, પછી તમારે 10 લાખ રૂપિયાની આવક પર એક રૂપિયો પણ ટેક્સ ચૂકવવો પડશે નહીં.