બરફ વર્ષા / ઉત્તર ભારતમાં શીત લહેરઃ કાશ્મીરમાં હિમસ્ખલનમાં સેનાના પોર્ટરનું મોત

• ઉત્તરપ્રદેશ, બિહાર અને પંજાબ સહિત ઉત્તર ભારતમાં શીત લહેરનો પ્રકોપ 
• દિલ્હીમાં ગઇ કાલે રાત્રે ફરી એક વાર ઝરમર વરસાદ વરસ્યો
• દિલ્હીમાં ફરી ઠંડી વધવાના અણસાર

મેરઠમાં કરા પડવાની શકયતાઓ છે. જમ્મુ-કાશ્મીરના પુંચ જિલ્લામાં બોર્ડર લાઇન પાસે ગઇ કાલે સાંજે હિમપ્રપાતમાં સેનાના એક પોર્ટરનું મૃત્યુ થયું હતું. અન્ય ત્રણને સુર‌િક્ષત બહાર કઢાયા હતા. પોલીસ અધિકારીઓએ જણાવ્યું કે શાહપુર સેકટરના એક અગ્રીમ સ્થાન પર બરફનું હિમસ્ખલનથી ચારેય પોર્ટર તેની નીચે દબાઇ ગયા હતા. સેનાના બચાવ દળે તાત્કાલિક કાર્યવાહી કરીને બરફમાંથી પોર્ટરોને બહાર કાઢવામાં સફળતા મેળવી, પરંતુ એક પોર્ટરે હોસ્પિટલમાં અંતિમ શ્વાસ લીધા હતા.

બીજી તરફ બિહારમાં પણ શીત લહેર જારી છે. જેને જોતાં પટનાની સ્કૂલોને બંધ કરી દેવાઇ છે. બિહારમાં પણ વરસાદ પડવાની શકયતા છે. રાજધાની દિલ્હીમાં ફરી એક વાર પશ્ચિમી વિક્ષોભ સક્રિય હોવાની અસરો દેખાવા લાગી છે. આ કારણે આજે પણ તેજ હવાઓ સાથે હળવો વરસાદ જોવા મળ્યો. દિલ્હીમાં અત્યારે ન્યૂનતમ તાપમાન ૧૩ ડિગ્રી સેેલ્શિયસ છે. મોસમ વિભાગના જણાવ્યા અનુસાર પશ્ચિમ વિક્ષોભના કારણે સફદરજંગ, પાલમ, લોધી રોડમાં પણ વરસાદ નોંધાયો છે.

ઉત્તરાખંડ, હિમાચલ પ્રદેશ અને જમ્મુ-કાશ્મીરમાં પણ મોટા ભાગના વિસ્તારોમાં ભારે બરફ વર્ષા થઇ હતી. હવામાન વિભાગના જણાવ્યા મુજબ આગામી ર૪ કલાકમાં ઉત્તરાખંડના ઉંચાઇવાળા વિસ્તારોમાં ભારે બરફ વર્ષાની શકયતાઓ છે. જયારે મેદાની વિસ્તારોમાં વરસાદ અને કરા પડી શકે છે. એટલું જ નહીં જમ્મુ-કાશ્મીર અને હિમાચલ પ્રદેશના વિવિધ વિસ્તારોમાં પણ કરા પડી શકે છે.

પંજાબ, હરિયાણા, ચંડીગઢ, દિલ્હી અને ઉત્તરપ્રદેશના મુખ્ય વિસ્તારોમાં આગામી ર૪ કલાકમાં કરા પડવાની શકયતાઓ છે. આ કારણે ઠંડીમાં પણ વધારો થશે. બર્ફીલી હવાઓના કારણે રાજધાની દિલ્હીનું લઘુતમ તાપમાન ચાર ડિગ્રી સુધી નીચું જશે.

પશ્ચિમી વિક્ષોભના કારણે ત્રીજા દિવસે પણ કુલુ અને લાહોલના નીચાણવાળા ક્ષેત્રોમાં વરસાદ અને ઊંચાઇવાળા ક્ષેત્રોમાં બરફ વર્ષા થઇ. મનાલીથી સોલંગનાલાનો સંપર્ક પણ કપાઇ ગયો છે. કુલુના ઘણા ભાગમાં જનજીવન અસ્તવ્યસ્ત છે. પાંચ નેશનલ હાઇવે સહિત ૪૯૩ રસ્તા બંધ થઇ ગયા છે. કાશ્મીર ઘાટીએ ફરી ઓઢી બરફની ચાદરકાશ્મીર ઘાટીએ એક વાર ફરી બરફની ચાદર ઓઢી લીધી છે. સોમવારે શરૂ થયેલો વરસાદ અને બરફ વર્ષાનો ક્રમ બુધવારે પણ ચાલુ રહ્યો હતો.