હવામાન વિભાગ દ્વારા આગામી 2 દિવસ ઉત્તર ગુજરાતમાં ભારે વરસાદની આગાહી કરાઇ છે. ઓરિસ્સા અને બંગાળ પર લો પ્રેશર બનતા 15 અને 16 ઓગસ્ટે રાજ્યમાં ભારેથી અતિભારે વરસાદ પડી શકે છે.
ઓરિસ્સા અને બંગાળ સાથે દક્ષિણ રાજસ્થાનમાં લો પ્રેસર સર્ક્યુલેશન સિસ્ટમ સર્જાતાં હવામાન વિભાગ દ્વારા રાજ્યના મહેસાણા, બનાસકાંઠા, પાટણ, અરવલ્લી, દાહોદ અને મહિસાગરમાં અતિભારે વરસાદની આગાહી કરવામાં આવી છે. તો કચ્છ, સૌરાષ્ટ્રમાં પણ સામાન્યથી મધ્યમ વરસાદની આગાહી કરાઇ છે. જ્યારે દક્ષિણ ગુજરાત અને મધ્ય ગુજરાતમાં 2 દિવસ સામાન્ય વરસાદની આગાહી કરાઇ છે. જેને લઇ માછીમારોને 5 દિવસ દરિયો ન ખેડવા સૂચના અપાઇ છે.
તો આગાહીને પગલે આજે વહેલી સવારથી સાબરકાંઠામાં વરસાદનું આગમન થયુ છે. હિમંતનગના પુણાસણ, રાયગઢ, બાખોર, ચાપલાનારા, પંથકમાં વરસાદ ખાબક્યો છે. તો આગામી 2 દિવસ ભારે વરસાદની આગાહીને લઇ માછીમારોને દરિયો ન ખેડવા સૂચના અપાઇ છે. રાજ્યમાં ઓગસ્ટ મહિનાની શરૂઆત ધોધમાર વરસાદથી થઈ છે. ગત વર્ષની સરખામણીએ અત્યાર સુધીમાં ગુજરાતમાં 48 ટકા જેટલો વધુ વરસાદ પડતાં લોકોમાં ભારે ઉત્સાહ જોવા મળી રહ્યો છે.
અત્યાર સુધીમાં સમગ્ર રાજ્યમાં 462 મીમી વરસાદ પડ્યો હતો. જેની સામે આ વર્ષે 685 મીમી વરસાદ પડી ચૂક્યો છે. છેલ્લા કેટલાક વર્ષોના વરસાદનો સિલસિલો જોતાં રાજ્યમાં સરેરાશ 816 મીમી જેટલો વરસાદ પડ્યો છે. જેથી આજ દિન સુધીમાં સરેરાશ 84 ટકા જેટલો વરસાદ પડતાં રાજ્યના 8 જેટલાં ડેમ હાઈ એલર્ટ જાહેર કરાયા હતા.