ઉત્તર ગુજરાતમાં કોંગ્રેસ મુશ્કેલીમાં મહેસાણા બાદ વધુ એક ઝટકો લાગવાની તૈયારીમાં

લોકસભા ચૂંટણી પહેલાં ગુજરાતમાં કોંગ્રેસ માટે એક પછી એક ઝટકા લાગી રહ્યાં છે. જેમાં હવે ઊંઝા તાલુકા પંચાયત પણ કોંગ્રેસ પાસેથી છીનવાઈ જવાની સ્થિતિ સર્જાઈ છે. ઊંઝા તાલુકા પંચાયતમાં પણ અવિશ્વાસની દરખાસ્ત કરવામાં આવી છે. મહેસાણા બાદ ઉંઝામાં કોંગ્રેસ વધુ એક પંચાયત ગુમાવે તેવી સ્થિતિ છે. કોંગ્રેસના 7 અપક્ષ 4 અને ભાજપના એક સભ્યએ દરખાસ્ત કરી છે. તાલુકા પંચાયતના પ્રમુખ ભરતસિંહ રાજપૂત સામે દરખાસ્ત કરવામાં આવી છે. ઊંઝા તાલુકા પંચાયતમાં કુલ 18 સભ્યોમાંથી કોંગ્રેસના 13 સભ્યો અને 4 અપક્ષ અને એક ભાજપનો સભ્ય ચૂંટાયેલો છે.

મહત્વનું છે કે કોંગ્રેસ શાસિત મહેસાણા તાલુકા પંચાયતમાં બળવો થયો હતો. ભાજપના 8 અને કોંગ્રેસના 12 સભ્યો સહિત કુલ 21 સભ્યોએ સહીઓ કરી અવિશ્વાસની દરખાસ્ત માટે તાલુકા વિકાસ અધિકારીને લેખિત અરજી કરવામાં આવી હતી. મહેસાણા તાલુકા પંચાયતના કુલ 31 સભ્યોમાંથી ભાજપ અને કોંગ્રેસના સભ્યોએ મળી તાલુકા પંચાયતના પ્રમુખ વિનુભા ઝાલા અને ઉપપ્રમુખ પ્રતાપજી ચાવડા સામે અવિશ્વાસની દરખાસ્ત મુકવામાં આવી હતી. 

આથી મહેસાણા તાલુકા વિકાસ અધિકારીએ પ્રમુખ અને ઉપપ્રમુખને અવિશ્વાસની દરખાસ્ત મુદ્દે નોટિસ ફટકારવામાં આવી છે. કોંગ્રેસ શાસિત તાલુકા પંચાયત પ્રમુખ અને ઉપપ્રમુખ સામે બળવો થતા મહેસાણાના રાજકારણમાં વધુ એકવાર ગરમાવો આવી ગયો છે.

અગાઉ પણ સત્તા છીનવાઈ ચૂકી છે

લોકસભાની ચૂંટણી જેમ-જેમ નજીક આવી રહી છે તેમ-તેમ રાજકીય માહોલમાં પણ ગરમાવો આવી રહ્યો છે. ગુજરાતમાં લોકસભાની ચૂંટણીને લઈને ભાજપ અને કોંગ્રેસ બરાબર કમર કસી રહ્યાં છે ત્યારે કોંગ્રેસને ખેડા જિલ્લામાં મોટો ફટકો પડ્યો છે. જિલ્લાની મહેમદાવાદ તાલુકા પંચાયતમાં કોંગ્રેસનાં 4 સભ્યોએ કેસરિયો ધારણ કરતાં તાલુકા પંચાયતમાં ભાજપનો ભગવો લહેરાયો છે.

ઉલ્લેખનીય છે કે ઊંઝામાં કોંગ્રેસને સૌથી મોટો ઝટકો આશાબેન પટેલના કારણે લાગ્યો હતો. આશાબેન પટેલે ઊંઝાનાં ધારાસભ્ય પદેથી રાજીનામું આપ્યાં બાદ તેઓ આખરે ભાજપમાં જોડાયાં હતાં.