જર્મનીના બર્લિનમાં ચાલી રહેલી ટેકનોલોજી ક્ષેત્રના ડેવલપર્સની કોન્ફરન્સ (IFA 2019)માં ટોચની કંપનીઓએ ઇનોવોટિવ ટેકનોલોજી અને ડિવાઇસ રજુ કર્યા છે. એચએમડી ગ્લોબલે નોકિયાની 150 કલાકની બેટરી બેકઅપ સાથેના પાવર ઇયરબડ્સ રજૂ કર્યા છે. એલજીએ 360 ડિગ્રી ફોલ્ડ થઇ શકે તેવો ડબલ સ્ક્રીનનો સ્માર્ટફોન રજૂ કર્યો છે.
વિશ્વના સૌથી મોટા એવા આ ઇલેક્ટ્રોનિક શોમાં એક એવી પણ સ્માર્ટવોચ રજૂ કરવામાં આવી છે જેને કયારેય ચાર્જ કરવાની જરુર નહીં પડે. મેટ્રિક્સ નામની કંપનીએ આઈએફએ 2019માં પાવરવોચ-2 સ્માર્ટવોચ રજુ કરી છે કંપનીનો દાવો છે કે આ સ્માર્ટવોચ તમારા શરીરની ગરમીથી ચાર્જ થશે. તેમાં 1.2 ઇંચનું બ્લેક એન્ડ વ્હાઇટ ડિસ્પ્લે, થર્મોમીટર અને સોલર ચાર્જિંગ પણ છે.
આ સિવાય તેમાં જીપીએસ અને ફિટનેસ ટ્રેકર જેવી સુવિધાઓ મળશે. સેમસંગે આ ઇલેક્ટ્રોનિક શોમાં તેના બોટ શેફ (રોબોટ)ની ઝલક બતાવી હતી. સેમસંગના બોટ શેફે બોકસમાંથી મીઠું ખાઢીને પ્લેટ પર છાંટ્યું હતું. આ રોબોટ્સ રસોઇ કરી શકે છે.
સેમસંગનો દાવો છે કે નજીકના ભવિષ્યમાં તમે આવા રોબોટ્સને હોટલમાં રસોઈ બનાવતા જોઈ શકશો. તમે કલ્પના કરો કે તમારા ઘરમાં એક અરીસો છે જેમાં સ્પીકર અને લાઈટ પણ છે. આઈએફએ 2019માં સિમ્પલ હુમેન સેન્સર મિરર હાય-ફાઇ લોન્ચ થયો છે. જેમાં બ્લૂટૂથ સ્પીકર અને વોઇસ આસીસ્ટન્ટ પણ છે. તે વાઇફાઇ અને બ્લૂટૂથથી કનેકટ થાય છે.
કંપનીનો દાવો છે કે આ મિરર ડિવાઇસ આખો રુમ ઝળહળી ઉઠે તેટલો પ્રકાશ આપી શકે છે. આ ઉપરાંત એક કંપનીએ ખાસ પ્રકારની બેબી પોઇન્ટ ઓફ વ્યું ડોલ રજુ કરી છે. આમ તો બાળકો રમે છે તેવી જ આ ડોલ છે. પરંતુ તેની આંખમાં કેમેરા છે, બાળકો જયારે રમતા હોય ત્યારે 20 સેકન્ડની વિડીયો કલીપ રેકોર્ડ કરે છે.
આ ડોલની મદદથી બાળકોના બાળપણની યાદો અનોખી રીતે કાયમ માટે કેદ કરી શકાય છે. આ ડોલમાં મોશન ડિટેક્ટર સેન્સર છે જે 720 પિક્સેલ્સના રેઝોલ્યુશન સાથેના વીડિઓ રેકોર્ડ કરી શકે છે. તેની બેટરી લાઇફ 5 કલાકની છે.