ઓપ્પો નોકિયાનો પેટન્ટ કેસ હારી ગયો છે. આ કારણે ઓપ્પો અને વનપ્લસ અત્યારે જર્મનીમાં પોતાના મોબાઇલ ડિવાઇસનું વેચાણ કરી શકશે નહીં. જાણો શું છે સમગ્ર મામલો
નોકિયાએ પોતાની એક પેટન્ટને લઈને કર્યો કેસ
Oppo અને OnePlus જર્મનીમાં મોબાઈલ વેચી શકશે નહી
નોકિયાના યુરોપિયન પેટન્ટ EP 17 04 731 નું ઉલ્લંઘન કર્યું
નોકિયાએ કર્યો Oppo અને OnePlus પર કેસ
ચીનની સ્માર્ટફોન કંપનીઓ Oppo અને OnePlus ને મોટો ઝટકો લાગ્યો છે. આ આંચકો નોકિયાના કારણે લાગ્યો છે. Nokiamob.net એક રિપોર્ટ અનુસાર, મેનહેમ રિજનલ કોર્ટે નોકિયાના પક્ષમાં પેટન્ટ વિવાદનો ચુકાદો આપ્યો છે. કોર્ટનો આ ચુકાદો નોકિયા દ્વારા દાખલ કરવામાં આવેલા કેસમાં આવ્યો છે, જેમાં કંપનીએ ઓપ્પો અને વનપ્લસ પર પેટન્ટનું ઉલ્લંઘન કરવાનો આરોપ લગાવ્યો હતો. આ પહેલા નોકિયા આ ચીની કંપનીઓ સાથે કરારની માંગ કરી રહી હતી, પરંતુ તેમ કરવામાં નિષ્ફળ રહેતા ગયા વર્ષે ચાર અલગ અલગ દેશોમાં નોકિયા એ ઓપ્પો સામે કેસ કરવામાં આવ્યો હતો.
કંપની હવે જર્મનીમાં મોબાઈલ વેચી શકશે નહી
રિપોર્ટમાં જણાવવામાં આવ્યું છે કે હવે આ નિર્ણયને કારણે ઓપ્પો અને વનપ્લસ પોતાના ડિવાઇસને જર્મનીમાં વેચી નહીં શકે. જોકે આ કાયમી માટે પ્રતિબંધ નથી. ઓપ્પો સામેના પેટન્ટ વિવાદમાં નોકિયાએ પહેલી જીત મેળવી છે. જો કે આ મામલે આ પહેલો નિર્ણય છે. ઓપ્પો અને તેની સાથે સંકળાયેલા વનપ્લસ જર્મનીમાં મોબાઇલ ઉપકરણો વેચી શકશે નહીં જે નોકિયાના યુરોપિયન પેટન્ટ EP 17 04 731 નું ઉલ્લંઘન કરે છે.
શું છે સંપૂર્ણ મામલો ?
આ પેટન્ટને લઈને કહેવામાં આવ્યું છે કે તે એક એવી ટેકનોલોજી છે જે વાઇફાઇ કનેક્શનને સ્કેન કરવાથી બચાવે છે. 2021 માં, નોકિયાએ ઓપ્પો સામે પેટન્ટના ઉલ્લંઘનને લઈને એશિયા અને યુરોપના ઘણા દેશોમાં દાવો માંડ્યો હતો. જેમાં ભારત, યુકે, ફ્રાન્સ અને જર્મની જેવા દેશોનો સમાવેશ થાય છે.
નોકિયાએ શું કહ્યું ?
આ મામલે નોકિયાએ કહ્યું છે કે, તેની પેટન્ટ ટેક્નોલોજીનો ઉપયોગ કંપની દ્વારા માન્ય લાયસન્સ વગર કરવામાં આવ્યો હતો. રિપોર્ટ અનુસાર આ કેસમાં દાવો કરવામાં આવ્યો છે કે ઓપ્પોએ નોકિયાના સ્ટાન્ડર્ડ એસેન્શિયલ પેટન્ટ્સ અને નોન-એસઇપી જેમ કે UI/UX અને લાઇસન્સ વિના સિક્યોરિટી ફીચર્સનો ઉપયોગ કર્યો હતો. નોકિયામોબના એક રિપોર્ટ અનુસાર નોકિયાએ આ કેસ પર કહ્યું છે કે, ઓપ્પોએ તેના ફેયર અને રીઝનેબલ પ્રસ્તાવને નકારી કાઢ્યો હતો. જે બાદ તેમની પાસે કોર્ટમાં જવાનો જ રસ્તો બાકી રહ્યો હતો.